II. Je Than 2 - Iaai Bible 1901 (New Caledonia)

¹ KE haba hnyi ûen ame he Iehova ka hum Elia hnyi drany ai a deny höu, me Elia ame tha he me Elisaia ûheny Gilegala.

² Ke haingö Elia kö Elisaia, ka habe, Ö u me laba ju ang; anyin a Iehova ame kunö nya Beth-ela ai. Ke haingö Elisaia, ka habe, Kia inya Iehova, ke kia inya u, a oge me ca he ka hnö u. Me ödru me tha he Beth-ela ai.

³ Ke ame o kö Elisaia lakon je perofeta hnyi Beth-ela me ha kâû, ka habe, Hawa, e khatö u a gʼ ame he Iehova ka hom at ame nö u ûnyi gam hnyi bong ang? Me haingen, ka habe, E khanö nya, ca ha bi.

⁴ Haba Elia ame ha kâu, ka habe Elisaia lö, ö u laba biju ang; anyin a Iehova ame kunö nya Jeriko ai. Haingen, ka haba, kia inya Iehova, ke kia inya u, a oge me ca he ka hnö u. Me ödru me tha o hnyi Jeriko.

⁵ Me ame o kö Elisaia lakon je perofeta hnyi Jeriko, me ha kâu, ka habe, Hawa e, khatö u but a gʼ ame he Iehova ka hom at ame nö u ûnyi gam hnyi bong ang? Ke e ame thu, ka habe, E, e khanö nya but; ca ha bi.

⁶ Haba Elia ame ha kâu, ka habe, Ö u laba biju ang; anyin ame kunö nya Iehova Joridano ai. Ke haingen, ka habe, kia inya Iehova, ke kia inya u, a oge me ca he ka hnö u. Me ödru me tha he.

⁷ Ke haba fifte tavat hanen lakon je perofeta ödrin e he me ûtililen cici ödru ke ûsâkâûö; ke haba ödru, ödru me tot hnyi baten Joridano.

⁸ Haba Elia ame hom anyin ûkhaû me vhec, me wâdrâ wia, me kot wagewe, me ame khekhe lo but, me ödru me he hanyâûâ hnyi dok ae mada.

⁹ Ke ödre hia but he hanyâûâ, haba Elia ame ha kö Elisaia, ka habe, Bethe ha ûnyi oge me he ka ânyâ hobi köu me adre me tiga ca hum nya gam. Haba Elisaia ame ha, ka habe, Ö u he ka olo ham könya hanom.

¹⁰ Ke e ame ha, ka habe, Ûnyi e ae hmak u je sumâtâ: ke so bi, u je ne ö nya hnyi ûen adre me hum nya gam, ame he ka helâe köu; ke ame ne ba, ame ca he ka helâe.

¹¹ Ke ödru me tiga he, me ûhnenamö, me wâ bi, kariota meic, me je hors meic, wale ame oûsâkâûödruköuödru; ke haba Elia ame ölö hnyi drany ai a deny höu.

¹² Ke haba Elisaia ame wâ e, me e ame hongot, ka habe, Cica, cica, je kariota anyin at Isaraela me aten tabô hors! Ke ame ca wâ hmetu bi e: me ame kât anyin bi je ûkhaû me kia luâ.

¹³ Ke e ame hom minya ûkhaû anyi Elia wale a kolu gan, me he hmetu me tot hnyi baten Joridano.

¹⁴ Ke e ame hom ûkhaû anyi Elia, wale a kolu gan, me kot wagewe, me ha, ka habe, Ewa Iehova Khongu Elia? ke a hia but kot wagewe me ame khekhe lo but, me Elisaia ame he hanyâûâ.

¹⁵ Ke a wâ but e ge lakon je perofeta hnyi Jeriko, hnyat ödrin e tot cicö e, me ödrin e ha, ka habe, Ame ta hanu Elia ka hnyi hu Elisaia. Me ödrin e he me ûkhanö mē, me nom ju hnyikânâi hnyi hnyimakan.

¹⁶ Ke ödrin e ha kâu, ka habe, Wâ bi, wale unyin lathnyabaem hnyat ae hwege a fifte; e so ödrin e he me elâm at ame nö u: ame ne hom e ge hanu Iehova, me khûâ ka hnyi hon keʼ bucen, ame ne hnyigöulen bucen. Me haingen, ka habe, Ca he öbun ka ûkhûnöng.

¹⁷ Ke ödrin e ûjengö e ke ne o but e ame hmehma, me e ame ha, ka habe, ûkhûnöng dö. Anyin a wale ödrin e kunâ hnyat a fifte; ke ödrin e elâm hnyi kun ta bong, ke ödrin e ca wâ bi.

¹⁸ Me ödrin e o hmetu thö kâu, ke e ame tiga laba hnyi Jeriko; me haingen ködrin, ka habe, Hawa, oge me ca ha köbun, ka habe, Ca he?

¹⁹ Ke ame ha kö Elisaia tavat aten taun, ka habe, Than lö, wâ bi, e so ûlabainy taun ang a u me wâ: ke kong bi je köiö, ke hnyei baga kânâiny.

²⁰ Me haingen, ka habe, Hom but jem könya kaia ae teb ûnyi, ke bi sâltiny. Me ödrin e hom kâu.

²¹ Me e ame he ka hnyi hna pupuainy je köiö, me khûâ sâlt ka hnyin, me ha, ka habe, Walang hofuc ho Iehova, ka habe, Oge hia but osoâ je köiö ang; kʼ ame ca he ka o hmetu mok ûnyi gan, me hnyei baga.

²² Ke adre me osoâ köiö ke ne o but hnyi bong ang, hoton hofuc ho Elisaia waleji e ame ha.

²³ Ke e ame he ûheny e Beth-ela ai; ke ame he eû hnyi gethen, me ame o je wainda ûnyi hnyi taun, me hluma e, me ha, ka habe, Hadroû, ölö thö; hadroû, ölö thö.

²⁴ Me e ame hwio me ô ʼdrin, me hângʼ ödrin hnyi iö Iehova. Me ame o li bea momo ûnyi hnyi hnyot me kiʼ ödrin je wainda a fâte tu.

²⁵ Ke e ame he ûheny e ka hnyi bucen Karemela, me hmetu ûheny e Samaria ai.