II. Ioane 1 - Iaai Bible 1901 (New Caledonia)

¹ INYA hingat oge me sihnalimen ka ishola adre ûca me lakon, hnyat oge me hnyok kodra hnyi hnathu; ke ca hake inya bi, ke ödra hia minya ae hnyi khanʼ ödra hnathu;

² ûnyi hnyi hnathu ame laba eû hnyita, kʼ ame he ka e unyita nyiele balua:

³ ame he ka e unyita, ibe-tengiö baû, me ibetengiö, me ûsoköu ûnyi ge Khong a Kamen, ke ûnyi ga Iesu Keriso a Nokon Kamen, hnyi hnathu me ibetengiö.

⁴ Inya oge me senyin gan hmâ, anyin oge me wâ a ga vheno hnathu ke je lakom, helâ me hnanyibu ate me kap ûnyi ge Kamen.

⁵ Ke walang ang oge me ûjongi u ishola, ca helâke oge me set köu hnanyibu a teb ûnyi, ke so bi hnöta hna hu ûnyi hnyi can, a gʼ ate me ibetengiököu.

⁶ Ke walang ibetengiö, ka habe, ate me he ka hnu hoton anyin ta je hnanyibu. Walang hnanyibu öbun e löng ûnyi hnyi can, mʼ öbun e he ka vheno e.

⁷ Anyin ae se hia tavat iyawo eang hmeledrany, hnyat adre me ca hmehmelâ a ga o Iesu hnyi unyin. Haba at eling ame omono, ke iwahnaihmiony me Keriso.

⁸ Ō ʼbun aû, wâ e nye hia but gabun ta je ûnyi öhmun e hia but huliwan, ke so öbun e kap hwaban ae unöngöt.

⁹ Haba at ame ûne kʼ ame ca tethmâ hnyi hna ûne anyin Keriso, me Khong ame ca laba unyin: ke haba at ame tethmâ hnyi hna ûne anyin Keriso, me hu but gan Kamen me Nokon minya.

¹⁰ E ka o ke at köbun, kʼ ame ca hom bi hna ûne eang, me câ he ka kap e ka hnyi um-öbun je uma, ke ca italofa bi më:

¹¹ anyin a haba at ame italofa më, me ame hnyi hanen anyin je huliwa ae kong.

¹² E hu but gak ta je hofuc ae se hia he ka sihnalimen köbun, ke ca bewek he ka set hnyi peipa me köiö sisit, ke so bi oge me gejon he ka o but köbun, me ûhnenamö iohnyimak, me me hwâdâ anyibun senyin.

¹³ Ame italofa köu hnen lakon ke momo adre ûca.