Biblia Todo Logo
Bìoball air-loidhne

- Sanasan -

Iakobo 2 - Iaai Bible 1901 (New Caledonia)

1 HNYAT me lakeiny mönya lö, ca he öbun ka wâhmakhmeto at hnyi hna hom labageju anyin Tuhöta Iesu Keriso, a Tuhan hmanenang.

2 Anyin a ne didro ke at ka hnyi anyibun ûkhacaköu, ae hu wen banyen a gol, ke ûkhaû ae mec, ke ame dit minya ke at ae theduoc me ûkhaû ae kong;

3 me öbun e wâhmakhmeto at ame khaû so, me ha kâu, ka habe, Laba ju eang hnyi dok ae so; ke haingöbun ka at ae theduoc, Tot ju u e, ame ne, Laba ju eang hmelen taben li cak;

4 hawa, öbun e ca oûnyihnatho ke at hon ke at, mʼ öbun hnyat owisa ae kong je ûnykûmenödra?

5 Hnyat me lakeiny a oûnykûmik lö, löng ju öbun; hawa, ame ca ûca hnen Khong watheduoc eang hmeledrany he ka tren omjeû hnyi labageju, mʼ adre me he ka hu dokhu waleji e ame ha bânâ ka tavat adre me hnyok kâu.

6 Ke öbun e oûnyûkongo ta je theduoc. Hawa, ame ca okongu öbun hnen tavat tren omjeû, kʼ adre me lili öbun ka hnyi taben owisa?

7 Hawa, adre me ca haikongoâ ien ae so waleji adre wenyö iöbun hnyin?

8 Ke so bi öbun e ne löng hoton hnanyibu ae beönua, helâ me hna sihnalimen, ka habe, U me be ka betenge ge at ame laba hakekenyi u helâ me u bi, mʼ öbun e ânyâ ling so:

9 ke öbun e ne wâhmakhmeto tavat, me öbun e ânyâ ling monu, ke hwâdâ thö ge hnanyibu, a öbun hnyat hanyâûâ hnanyibu.

10 Anyin a haba at ame he ka löng hoton je hnanyibu hia, kʼ ame hanyâûâ thibut khaca, me helâke a hanyâûâ hia but.

11 Anyin a baba at, waleji ame ha, ka habe, Ca he ka bi ûnyi monu, me ame ha minya, ka habe, U ca he ka ûblingö. Ke u je ne ca bi ûnyi monu, ke u at ûhlingö bi, me u at ame hanyâûâ hnanyibu.

12 E so öbun e ha hofuc, ke so öbun e huliwa, helâ me hnyat adre me he ka owisʼ ödra bi ge hnanyibu ame hna bâûâ.

13 Anyin a haba at ame ca betenge, me adre me ca he bi ka betenge gan hnyi hna ûhnei: anyin ame hobeluâ ibetengiö hnyi ûhnei.

14 Hnyat me lakeiny mönya lö, ieû troban a ne ha ke at, a ga hu gan labageju, kʼ ame ca hu bi ta je huliwa? hawa, e khana labageju eling he ka omelö e?

15 A ne he thu ke liamekeiny a baga ame ne momo, ke ba jeû gadrin hnyi ke bong me ke bong,

16 ke ke at gabun ame ha ködrin, ka habe, He thö me hnahic, kahwa ju, me sekom dö; ke öbun e ca ham bi kodra ta je ûnyi ae ûcû ka unyin; ieû troban e?

17 Ke helâe labageju, e ka ca tha e me huliwa me a ka mok ut.

18 Eke, ame he ke at ka ha, ka habe, E hu but gam labageju, ke hu but inya gak ta je huliwa: omanenâ thö könya ânyâm labageju ae ba huliwa hnyin, ke oge me he inya ka omanenâ hnen anyik je huliwa.

19 U me kap, ka habe, Khaca thibi Khong; e so e: je demoni minya adre me kap me öbubuny.

20 At ae monu lö ca bekhanö u ae ûnyi baû bi labageju e ka ba huliwa?

21 Hawa, adre ca haiwisai Aberahama a kamöta ge ta je huliwa, hnyi hnen hna hudi Isaaka a nokon hnyi hon tap?

22 U me wâ a gʼ ame tha huliwa labageju me anyin ta je huliwa, ke ame obekhotâ labageju hnen ta je huliwa;

23 me ame hwâdâ thö hofuc adre sit, ka habe, Aberahama ame labageju ka Khong, me adre me hâiâ e kâu hnân hwakecin ae wisa; me adre me hwenyi ien e, ka habe, Ihuminy Khong.

24 Awe, öbun e wâ but a gʼ adre me haiwisa at hnen ta je huliwa, ke ca hnen thibi labageju.

25 He helâe minya, adre ca haiwisai Rahaba momo hnyi gethen ge ta je huliwa hnyi hnen hna kap soâ li at ecmak me kunʼ ödru hnyi ke gethen bi?

26 Anyin a helâke mok ut unyin, e ka ba hanu, me helâe minya labageju, a mok ut e ka ba huliwa.

maintained by the British and Foreign Bible Society

Bible Society of the South Pacific
Lean sinn:



Sanasan