Iakobo 2 - Iaai Bible 1901 (New Caledonia)

¹ HNYAT me lakeiny mönya lö, ca he öbun ka wâhmakhmeto at hnyi hna hom labageju anyin Tuhöta Iesu Keriso, a Tuhan hmanenang.

² Anyin a ne didro ke at ka hnyi anyibun ûkhacaköu, ae hu wen banyen a gol, ke ûkhaû ae mec, ke ame dit minya ke at ae theduoc me ûkhaû ae kong;

³ me öbun e wâhmakhmeto at ame khaû so, me ha kâu, ka habe, Laba ju eang hnyi dok ae so; ke haingöbun ka at ae theduoc, Tot ju u e, ame ne, Laba ju eang hmelen taben li cak;

⁴ hawa, öbun e ca oûnyihnatho ke at hon ke at, mʼ öbun hnyat owisa ae kong je ûnykûmenödra?

⁵ Hnyat me lakeiny a oûnykûmik lö, löng ju öbun; hawa, ame ca ûca hnen Khong watheduoc eang hmeledrany he ka tren omjeû hnyi labageju, mʼ adre me he ka hu dokhu waleji e ame ha bânâ ka tavat adre me hnyok kâu.

⁶ Ke öbun e oûnyûkongo ta je theduoc. Hawa, ame ca okongu öbun hnen tavat tren omjeû, kʼ adre me lili öbun ka hnyi taben owisa?

⁷ Hawa, adre me ca haikongoâ ien ae so waleji adre wenyö iöbun hnyin?

⁸ Ke so bi öbun e ne löng hoton hnanyibu ae beönua, helâ me hna sihnalimen, ka habe, U me be ka betenge ge at ame laba hakekenyi u helâ me u bi, mʼ öbun e ânyâ ling so:

⁹ ke öbun e ne wâhmakhmeto tavat, me öbun e ânyâ ling monu, ke hwâdâ thö ge hnanyibu, a öbun hnyat hanyâûâ hnanyibu.

¹⁰ Anyin a haba at ame he ka löng hoton je hnanyibu hia, kʼ ame hanyâûâ thibut khaca, me helâke a hanyâûâ hia but.

¹¹ Anyin a baba at, waleji ame ha, ka habe, Ca he ka bi ûnyi monu, me ame ha minya, ka habe, U ca he ka ûblingö. Ke u je ne ca bi ûnyi monu, ke u at ûhlingö bi, me u at ame hanyâûâ hnanyibu.

¹² E so öbun e ha hofuc, ke so öbun e huliwa, helâ me hnyat adre me he ka owisʼ ödra bi ge hnanyibu ame hna bâûâ.

¹³ Anyin a haba at ame ca betenge, me adre me ca he bi ka betenge gan hnyi hna ûhnei: anyin ame hobeluâ ibetengiö hnyi ûhnei.

¹⁴ Hnyat me lakeiny mönya lö, ieû troban a ne ha ke at, a ga hu gan labageju, kʼ ame ca hu bi ta je huliwa? hawa, e khana labageju eling he ka omelö e?

¹⁵ A ne he thu ke liamekeiny a baga ame ne momo, ke ba jeû gadrin hnyi ke bong me ke bong,

¹⁶ ke ke at gabun ame ha ködrin, ka habe, He thö me hnahic, kahwa ju, me sekom dö; ke öbun e ca ham bi kodra ta je ûnyi ae ûcû ka unyin; ieû troban e?

¹⁷ Ke helâe labageju, e ka ca tha e me huliwa me a ka mok ut.

¹⁸ Eke, ame he ke at ka ha, ka habe, E hu but gam labageju, ke hu but inya gak ta je huliwa: omanenâ thö könya ânyâm labageju ae ba huliwa hnyin, ke oge me he inya ka omanenâ hnen anyik je huliwa.

¹⁹ U me kap, ka habe, Khaca thibi Khong; e so e: je demoni minya adre me kap me öbubuny.

²⁰ At ae monu lö ca bekhanö u ae ûnyi baû bi labageju e ka ba huliwa?

²¹ Hawa, adre ca haiwisai Aberahama a kamöta ge ta je huliwa, hnyi hnen hna hudi Isaaka a nokon hnyi hon tap?

²² U me wâ a gʼ ame tha huliwa labageju me anyin ta je huliwa, ke ame obekhotâ labageju hnen ta je huliwa;

²³ me ame hwâdâ thö hofuc adre sit, ka habe, Aberahama ame labageju ka Khong, me adre me hâiâ e kâu hnân hwakecin ae wisa; me adre me hwenyi ien e, ka habe, Ihuminy Khong.

²⁴ Awe, öbun e wâ but a gʼ adre me haiwisa at hnen ta je huliwa, ke ca hnen thibi labageju.

²⁵ He helâe minya, adre ca haiwisai Rahaba momo hnyi gethen ge ta je huliwa hnyi hnen hna kap soâ li at ecmak me kunʼ ödru hnyi ke gethen bi?

²⁶ Anyin a helâke mok ut unyin, e ka ba hanu, me helâe minya labageju, a mok ut e ka ba huliwa.