Iakobo 1 - Iaai Bible 1901 (New Caledonia)

¹ INYA Iakobo athnyabainy Khong me Than Iesu Keriso, anyik italofa ka ta je tribu a twelv adre vese ehee.

² Hnyat me lakeiny mönya lö, e so öbun e he ka ûnykûme a hnân senyin gan hmâ e ka o köbun ta je ûcûbic ae ve bongon;

³ anyin ae khanʼ öbun a gʼ ame okûâ hokhnyok he ka cubec anyibun labageju.

⁴ Ke so ame he hokhnyok ka huliwa bekhötâ, mʼ öbun e he ka bekhöt me wisa, ke ba ûnyi ae hia.

⁵ A ne ke at gabun ae ba metâ gan, me so e ame sumâtâ unyin Khong, at ame ham gânâ ka tavat hia thithö, kʼ ame ca û bi; me adre me he ka ham kâu.

⁶ Ke so e ame sumat hnyi labageju, ke ba loloâ: anyin a haba at ame lolo, me ûcû me waköiöiny köiö ame oû ang dö me hûnyûnye but.

⁷ Ke ca he at eling ka ûnykûme a e ame he ka hu ke ûnyi ûnyi ge Than;

⁸ e at ame lolo hnyok, kʼ ame okokok hnyi deny ta je gethen hia thithö.

⁹ E so ame senyin liamekeiny ae theduoc hnyi hna ogörânyâ e:

¹⁰ ke so ka at tren omjeû he ka senyin hnyi hna ohnyikânâ e: anyin a e ame he ka hia helâ me vongon hnaonying.

¹¹ Anyin ame uto seûno me ang ae kahwa hömnyin; me ame ie meleca thö önying, me ame kolu but vongon, ke ame hia but hmanenanginy; ke helâe ame he ka hia at tren omjeû hnyi deny ta je gethen.

¹² Hnahic hnen at ame hokhnyokâ ûcûbic: anyin a at ka hia but cubecâ, me e ame he ka hu koranainy möt, wale a ha bânâ Than ka tavat adre me hnyok kâu.

¹³ Ca he ke at ka ha, at ka cubecâ e, ka habe, adre cubic nya ûnyi ge Khong: anyin e pason he ka cubec Khong ge ûnyi ae kong, ke e ame ca cubec minya ke at:

¹⁴ ke adre me ve cubec tavat, a gʼ adre lili Ödra hnen je wedra bi ae kong, me iyawâ.

¹⁵ Ke e ka erkin dut weny ae kong me ame hnokoâ but hulo: ke e ka at hnathu but hulo me e ame hnokoâ but mok.

¹⁶ Ca monu öbun hnyat me lakeiny mönya a oûnykûmik.

¹⁷ Haba ta je bwihlany hia ae so me ta je hna ham bâûâ ae hmanenang, me ûnyi ethö ge Kamen melam, waleji ame ca ok, ke ba ong haten hwio gan.

¹⁸ E ame hnöku öta ge hwan hofuc ae hnathu hoton weny, mʼ ate me he ka helâke je wan a bân ge ta je ûnyi e ame op.

¹⁹ Hnyat me lakeiny mönya a oûnykûmik lö, e khanʼ öbun dut e. Ke so e he tavat hia ka ie löng, me bec he ka fuc, me bec he ka hmonyin:

²⁰ anyin a ca hnân he ka okûâ hwakecin ae wisa anyin Khong, hmonyin anyin at.

²¹ Anyin a wale, degec ut ikiki hia me monu ame si but, ke kap ju ge hnyok ae menyik hofuc adre tā, wale ae khana he ka omelö je hanubun.

²² Ke ânyâ thʼ öbun hoton hofuc ke ca löng thibi, a helâe öbun e ka omonu öbun bi.

²³ Anyin a ne ke at ame löng hofuc me ame ca mâdrâ bi, e ûcû e me at ame selâdrâ hnyimakan hnyi uselat:

²⁴ anyin a e ame ka wâ e, me ame hmetu but ke ame ie hnying ut bongon e bi.

²⁵ Ke haba at ame selâdrâ hnyi hnanyibu ae wisa waleji ame hnʼ öta, me tet hmâ hnyin, ca at ame löng me hnying bi, ke at bi ame ânyâ me huliwa, ame he ka hnahic at ang hnyi anyin huliwa.

²⁶ A ne hu ke at ame ûnykûme a e ame hmi, ke e ame ca noc bi bohmen ke e ame omonoâ hnyekon bi, awe, haba hmi anyin at e, me ûnyi baû bi.

²⁷ Walang hwakecin hmi ae kalaöt me ba hnyikongon hnyi hnyimakan Khong a Kamen, ka habe, he ka senâ je nakahme me je safac hnyi anyidra vec, me hamen he ka tuö e, me me ca hu hnyikongon hnen hmeledrany.