Hosea 7 - Iaai Bible 1901 (New Caledonia)

¹ KE oge me be ometo Isaraela, me ame manen bi thö hwakecin ae monu anyin Eferaima, me hulo anyin Samaria; anyin adre me thoi: ke ame didro tavat: venöu, ke haba deö at venöu adre me soh eû hnyou.

² Ke adre me ca ûnykûme bi hnyi je hnyekudra, a inya oge me ûnykûme ta je hwakecidra hia ae kong: ke walang ang ame theling ödra hnen bi anyidra ta je huliwa; ke e bi hnyi hnyimakök.

³ Adre me osenyinâ than ge anyidra bi monu, me je taben hnen anyidra je thoi.

⁴ Ödra tavat bi ûnyi monu hia; ödra helâ me wahnainyâ ame khutâ at ame inyâ; e ame ca ânyâwia hmetu meic hwân hnyi hna up falawa ke ne o but ame khibi thö.

⁵ Ke haba hnyi bong bongon tuhöta ame mok je taben ge ûkahwâiny waina; e ame ûkhöû hnyam me tavat ûhiö.

⁶ Anyin adre hia but penapena hnyekudra helâ me wahnainyâ, ke adre me mokut iyawo bi: ame mokut at ame inyâ ö dra hnyi lit hia; ke hnyi hnyomakatu e ame han helâ me meic ame ubâhlâ.

⁷ Ödra kahwa hia but helâ me wahnainyâ, ke adre me ohia tavat owisʼ ödra; a ta but anyidra je than: e ba ke at gadra ame hongot könya.

⁸ Eferaima ame ûkhacaköu me je hnyei; Eferaima ame helâ me ong areto adre ca wia.

⁹ A hia but ohia hwegien hnen je atkanyua, ke ca khana bi: eke, ûsa khaca but tehûen, ke ca khana bi.

¹⁰ Ke ame ohnatho hnen bi gan anyin Isaraela hnyi hnyimakan: ke so bi adre me ca hmetu bi kö Iehova Khongudrin, me elâm e, hnyi je ûnyi hia eling.

¹¹ Ke e ûcû Eferaima me biny ae ûnyibaû me ba hnyekon: adre me hongot ka Aigupito, me he Asuria ai.

¹² Ödra ka he me oge me he ka thong ûtök ert hudrin; oge me he ka hagutʼ ödra helâ me je meno ame gâ ethö: oge me he ka kuc ödra helâ me hna löng hnyi anyidra ûkhacaköu.

¹³ Ekölö gadra! anyin adre hia but he monu gak; hangʼ ödra but! anyin adre hia but hanyâûâ gak: oge me beûcû melidra, ke adre me sit hofuc thoi bi gak.

¹⁴ Ke ame ca hia but tenge je hnyekudra könya, ke adre me kuku tenge bi hon hnödra je hna mokut: adre me ûkhacaköu ge hwit me waina, kʼ adre me ûkhin fuc mönya.

¹⁵ Oge hia but nʼ ödra me ohwegiâ je hnyamödra, ke so bi adre me ûnykûme ûokonguny ûcûk.

¹⁶ Adre me hmetu ke ca kâu bi ethö gorany; ödrin ûcû me cafana ae iyawo; kʼ ame he anyidra je taben ka ta ge hele vat can ae hwege ifucidra: wale hnân hlumʼ ödra hnyi hnyei Aigupito.