Hosea 1 - Iaai Bible 1901 (New Caledonia)

¹ WALANG hofuc ho Iehova, waleji ame o ko Hosea, nöku Beeri, hnyi je bong bongu Uzia, me Jotham, me Ahaza, me Hezekia, je than Juda, ke hnyi ûö Jeroboama nöku Joasa, than Isaraela.

² Hnyi ûen Iehova ame bân ka fuc kö Hosea, me haingö Iehova kö Hosea, ka habe, He thö ka hok momo hnyi gethen ke lakon gethen: anyin ae gan hmâ bi ûuyi monu ge tavat, a gʼ adre me digic Iehova.

³ Me e ame he me hum Gomera nöku Dibelaima; kʼ ame erkin bi, me hnokoâ nokon.

⁴ Ke haba Iehova ame ha kâu, ka habe, Hwenyi ien do, ka habe, Jezerela; ke haba me okhaca me oge me he bi nya ka bi hwaban drö Jezerela ka lap anyi Jehu, ke oge me he ka bi obiny dokhu dokon lap anyi Isaraela.

⁵ Ke haba hnyi bong eling, me oge me he ka thu cafana anyin Isaraela hnyi hnyigöulen bucen anyi Jezerela.

⁶ Ke e ame erkin hmetu me nokoâ in. Ke haingo Iehova kâu, ka habe, Hwenyi ien dö e, ka habe, Lo-ruama: anyin oge me ca he hmetu ka betenge ge lap anyi Isaraela, wale he ka thang degeci ödra.

⁷ Ke so bi, oge me he ka betenge ge lap anyi Juda me omeli ödra a deny Iehova Khongudrin, ke oge me he ka omeli ödra ge cefana, me hele vat, me vat, me je hors, me tavat tabô hors.

⁸ Ke ame hia but momo hnebaio Lo-ruama, me e ame erkin hmetu me hnokoâ da.

⁹ Ke haingö Iehova, ka habe, Hwenyi ien dö, me Lo-ami; anyin a ca lakeik ut öbun, me oge me ca he bi nya ka Khongubun.

¹⁰ Ke so bi haba numerainy lakon Isaraela, me ame he ka ûcû me ûnyin köiö, wale ae ca khana bi ke at he ka tuluto me aû numerainy; ke haba hnyi dok wale adre me ha kodra, ka habe, Ca lakeik ut öbun, me adre me he bi ka ha kodra, ka habe, Öbun lakon Khong ae mot.

¹¹ Ke ame he ka ûkhacaköu je lakon Juda, me je lakon Isaraela, ke adre me he ka otilâ hobi kodra ke taben a khaca, ke adre me he ka he but ûnyi hnyi hnyei: anyin ame he ka bong ae gan bong bongu Jezerela.