Hna Omanenâ 9 - Iaai Bible 1901 (New Caledonia)

¹ KE ame tûâ thö trutru hnen angela a thabûnginy, me oge me wâ ke okhû ame kolu ûnyi hnyi drany ka hnyi hmeledrany: ke adre me ham kâu kiiny hmonop ae dit hmonyin;

² me ame o thö hai ûnyi hnyi hmonop, helâ me hainy meic ae gan hmâ; me ame hlit ut seûno me ethö hnyi wanben ge hainy hmonop.

³ Me ame o but ta je wahamon ka hnyi hmeledrany ûnyi hnyi hai; ke adre hom kodra man, helâji me maniny ta je sekopioiny hmeledrany.

⁴ Ke adre ha kodra mʼ adre me ca he ka okongoâ önyinginy hmeledrany, me ke ûnyi ae hât, me ke ûö a khaca, ke so thibi tavat ae ca hu gadra hna bi haten anyin Khong hon ta je baridra.

⁵ Ke adre hna kodra a adre me ca he ka hlingʼ ödra, ke so bi he ka oveci ödra hnyi thabûng ta tehi: ke haba anyidra vec, me helâ me vecin at ame dâ sekopio.

⁶ Ke ame he tavat ka elâm mok hnyi ta je bong eling, ke adre me ca he ka wâ; ke adre me he ka bemok, ke ame he mok ka kec gadra.

⁷ Ke haba je unyin ta je wahamon me helâ me hors adre penapena hnân vat; ke haba hon je hodra me helâ me je korona gol, ke haba je hnyimakodra me helâ me je hnyimakan at.

⁸ Ke hu gadra leûnen hodra helâ me leûnen ban omomo, he haba je nyudra me helâ me nyon ta je liona.

⁹ Ke e hu gadra ta je ûkhaûen ûlainy helâ me ûkhaûen ûlainy a fao; ke haba ûhmuhmuiny je labenyidra me helâ me ûhmuhmuiny je kariota me je hors ae se hia adre me wadring ka hnyi vat.

¹⁰ Ke hu je hmokunödra helâ me je sekopio, me je ûdöiny; ke e hnyi je hmokunödra man he ka okongo tavat hnyi thabûng ta tehi.

¹¹ Ke tuhödra angelainy hmonop ae dit hmonyin: haba ien hnyi hwen Heberu Abadon, ke hnyi hwen Heleni, me Apoluon.

¹² A um dö ke Ekölö: wâ bi lo biju li Ekölö ame he ka o.

¹³ Ke ame tûâ trutru hnen angela a siksiny me oge me löng ke hofuc ûnyi hnyi je baitoiny taben hut gol hnyi hnyimakan Khong,

¹⁴ ame ha ka angela a siksiny ae hu trutru, ka habe, Thang ut ta je angela a vak adre ca hnyi wagewe ae gan a Euferate

¹⁵ Me adre me thang ut ta angela a vak, waleji adre penapena hobi kâu awa, me bong, me tehi, me huna, mʼ odrin e he ka hlingâ ke keihen a kuniny tavat.

¹⁶ Ke haba ûseiny tavat vat a tavat tabö hors, me lo li ten thauzan ta je thauzan: oge me löng ûseidra.

¹⁷ Ke helâe oge me wâ je hors hnyi hna omanenâ, me tavat adre me tabâ ae hu ûkhaûen ûlainy meic, me uakini, me teio; ke haba ban ta je hors me helâ me ban ta je liona; ke ame o ûnyi hnyi je hnyimödra meic, me hai, me teio.

¹⁸ Ke adre me hlingâ ke keihen a kuniny tavat ge kun ta ûnyi eling ae mekiny, wale meic, me hai, me teio ame o ûnyi hnyi je hnyimödra.

¹⁹ Anyin a haba maniny ta je hors me e hnyi je hnyimödra me je hmokunödra: anyin a helâ me je on je h mokunödra ke hu ban; ke adre me okongoâ hnen je ûnyi e.

²⁰ Ke haba kolon tavat adre ca hlingâ bi ge ta je mok eling, me adre me ca ietra bi ta je huliwa anyin je hnyamödra, a gʼ adre me khudrung ka ta je demoni, ke je hnatheat gol, me sileva, me bras, me veto, me uto; a ta je ûnyi ae ca khanʼ ödra bwele, me löng, me he:

²¹ ke adre me ca ietra ge hnödra hna ûhlingö, me bi khong, me bi ûnyi monu, me venöu.