Hna Omanenâ 7 - Iaai Bible 1901 (New Caledonia)

¹ KE hwaban e oge me wâ je angela a vak ödrin e tot hnyi vak ta ke keihen hmeledrany, kʼ ödrin e kât vak ta ang hnyi hmeledrany, me me ca he ka hwege ang ka hnyi hmeledrany, me köiö, me ke ûö a khaca.

² Ke inya oge me wâ ke angela ame o jimeyö, ke e unyin hna ohmâ haten anyin Khong ae möt: ke e ame hongot ge ifucin ae gan ka je angela a vak waleji adre ham ködrin he ka okongo hmeledrany me köiö,

³ ame ha, ka habe, Ca okongo bi hmeledrany, me köiö, me ta je ûö, ke ne o but öhmun e ohmâ haten lathnyabainy Khonguta hon je baridra.

⁴ Ke oge me löng ûseidra tavat adre ohmâ haten, me ödrin wan haded ke fâte foa thauzan tavat adre me ohmâ haten, ûnyi hnyi ta je tribu hia anyin lakon Isaraela.

⁵ Twelv thauzan tavat adre ohmâ haten ûnyi hnyi tribu anyi Juda: Ke twelv thauzan ûnyi hnyi tribu anyi Reubena: Ke twelv thauzan ûnyi hnyi tribu anyi Gada:

⁶ Ke twelv thauzan ûnyi hnyi tribu anyi Asera: Ke twelv thauzan ûnyi hnyi tribu anyi Nafatali: Ke twelv thauzan ûnyi hnyi tribu anyi Manase:

⁷ Ke twelv thauzan ûnyi hnyi tribu anyi Simeona: Ke twelv thauzan ûnyi hnyi tribu anyi Levi: Ke twelv thauzan ûnyi hnyi tribu anyi Isakara:

⁸ Ke twelv thauzan ûnyi hnyi tribu anyi Zebulona: Ke twelv thauzan ûnyi hnyi tribu anyi Josefa: Ke twelv thauzan adre ohmâ haten ûnyi hnyi tribu anyi Beniamina.

⁹ Hwaban ta je ûnyi e inya oge me wâ, ke wâ bi, tavat ae se hia hmonyin, wale ae ca khana ke at he ka aû, a ödra ûnyi hnyi ta je hnyei hia, me ta je tribu, me tavat, me je hwen hnyei, adre me tot hnyi hnyimakan theron, ke hnyimakan Arenio, kʼ adre khavâ je ûkhaû ae hau, ke e hnyi je hnyamödra je lan pama;

¹⁰ ke adre me ha hwegiâ, ka habe, Haba möt me ûnyi ge Khonguta at ame laba hon theron, me ûnyi ge Arenio.

¹¹ Ke haba ta je angela, me adre me ûtitilen igigilo theron, me igigilo wahingat ke ta je ûnyi ae möt a vak; me adre me ta ju hnyi hnyimakan theron me khudrung ka Khong,

¹² me ha, ka habe, Amen: Hobi kâu Khonguta hna haisoâ, me hmanenang, me metâ, me ole, me hna ogânâ, me man, me hwege nyiele nyiele balua. Amen.

¹³ Me ame ha ke at hnyin wahingat, ame ha könya, ka habe, Ie tavat eang adre me khavâ je ûkhaû ae hau, ke ûhedra ua?

¹⁴ Ke haingök kâu, ka habe, Than lö, e khanö u. Me e ame ha könya, ka habe, Ödra ang adre me he but ûnyi hnyi vec ae gan hmâ, ke adre me hneû anyidra je ûkhaû, me ohaûâ hnyi dren Arenio.

¹⁵ Anyin a wale ödra but hnyi hnyimakan theron anyin Khong; ke adre me bi athnyabainy hnyi lany me lit hnyi umen uma: ke haba e at ame tabâ theron, me e ame he ka tubi ödra ge umen uma menâ.

¹⁶ Adre me ca he hmetu ka mekihnânem, ke adre me ca he minya ka beic; ke ame ca he ka li ödra hnen seûno me kahwa:

¹⁷ anyin ame he Arenio ka hat ödra, waleji a e hnyi wanben theron, ke e ame he ka lili ödra ka hnyi köiöiny möt ame pupua: ke ame be Khong ka kot degecâ ta je deköiö hia ûnyi hnyi ta je emaködra.