Hna Omanenâ 6 - Iaai Bible 1901 (New Caledonia)

¹ KE oge me wâ Arenio ame khong khaca hnyi je hna ohmâ haten a seven, ke oge me löng ke at hnyi je ûnyi ae möt a vak ame ha helâ me ûlunginy hendreng, ha habe, Aiö u.

² Ke inya oge me wâ, ke wâ bi, hors ae hau, ke hu cafana unyin at ame tabâ; ke adre me ham kâu korona: me e ame he but, kʼ ame ton, kʼ ame he bi ka ton.

³ Ke e a hia but khong hna ohmâ haten a loiny, me oge me löng ûnyi ae möt a loiny, ame ha, ka habe, Aiö u.

⁴ Me ame o but ke hors ae dra: ke adre me ham ka at ame tabâ he ka hom ûsaköu ûnyi eang hmeledrany, mʼ adre me he ka ûhlingödra köu ödra: kʼ adre me ham kâu hele vat ae gan.

⁵ Ke a hia but khong hna ohmâ haten a kuniny, me oge me löng ûnyi ae möt a kuniny ame ha, ka habe, Aiö u. Ke inya oge me wâ, ke wâ bi hors ae hlit; ke hu tulut adre ûnö hnyi hnyamen at a tabâ.

⁶ Ke oge me löng hnyi wanben ta je ûnyi ae möt a vak helâke ifucin at, ame ha, ka habe, Ama okhaca unöngöt tulut ge hwit hwaban denari a khaca, ke okun unöngöt tulut ge bali hwaban denari a khaca; ke ca okongo bi wakaco me waina.

⁷ Ke a hia but khong hna ohmâ haten a vakiny, me oge me löng ifucin ûnyi ae möt a vakiny ame ha, ka habe, Aiö u.

⁸ Ke inya oge me wâ, ke wâ bi hors ae löhau: ke Mok ien at a tabâ: ke Hedis ame tha he hoton. Ke adre ham ködru musi he ka hlingâ ke keihen hmeledrany a vakiny, ge hele vat, me hmiâ, me mok, me je meno ae ûhûlû hnyi hmeledrany.

⁹ Ke a hia but khong hna ohmâ haten a thabûnginy, me oge me wâ hnyi hmelen taben hut je hanon tavat adre hlingâ can hofuc hwan Khong, me can hnödra hna ohnatho:

¹⁰ ke adre me ha hwegiâ, ka habe, Tabony Than lo, at ae kap me hnathu, ke ne o but kehö u me ca he ka hnö me bi hwaban dröhmun hon tavat adre me laba eang hmeledrany?

¹¹ Me adre me ve ham kodra ke ûkhaû ae hau; ke adre me ha kodra, ka habe, adre me he ka halubahingen ûen ae okhulit, ke ne o but ame bekhöt dö je aten huliwa a hanödra, me ta je liamekeiny mʼ ödra, wale a tavat adre me he ka hlingâ helâ me ödra.

¹² Ke oge me wâ e ame khong hna ohmâ haten a siksiny, me ame gan hmâ but hwiöi; me ame hlit ut seûno helâ me mano a leûnen meno, ke haba tehi hia, me helâ me dra;

¹³ ke haba ta je okhûiny drany, me ame kökölu but ka hnyi hmeledrany, helâ me ûö meta ame khûâ degecâ wan ae tiga but, a jijingâ hnen ang ae hwege.

¹⁴ Ke adre me vhec dö drany helâ me tusi adre vhec; ke adre oc hia ta je bucen me je bomene ûnyi hnyi hnen bi.

¹⁵ Ke haba ta je thaniny hmeledrany, me ta je tuhan, me je taben vat ae nua, me tavat tren omjeû, me tavat ae hwege, me ta je athnyaba hia, me tavat he baû hia, adre me ve ikhölö hnyi je hmonop me je khūth hnyi ta je bucen;

¹⁶ me adre me ha ka ta je bucen me je kic, ka habe, Öbun na kolu takû öhmun ju, me oiyongi öhmun dut ge hnyimakan at ame laba hon theron, me ûnyi minya ge tang hmonyin anyin Arenio:

¹⁷ anyin a o but bongudra bong ae gan hmâ hmonyin hnyin; ke ie at ae khana he ka tot.