Hna Omanenâ 5 - Iaai Bible 1901 (New Caledonia)

¹ KE oge me wâ hnyi hnyam a metân at ame laba hon theron, tusi adre set hnyin me hoton, adre ohmâ haten ge je hna ohmâ a seven.

² Ke oge me wâ angela ae hwege ame khetâ ge ifucin ae gan, ka habe, le at ae ûcû he ka lau tusi, me khong je hna ohmâ haten?

³ Ke ba at hnyi drany, ke ba minya hnyi hmeledrany, ke ba minya eû hnyi hmelen hmeledrany ae khana he ka lau tusi me wâ e.

⁴ Ke oge me tenge gan hmâ, anyin ae ba at adre wâ ae ûcû he ka lau tusi, me wâ e:

⁵ ke haba ke at hnyi wahingat ame ha könya, ka habe, Ca tenge: wâ bi, e hwege Lionainy tribu Juda, Khûen anyi Davita, he ka lau tusi, me khong je hna ohmâ haten e a seven.

⁶ Ke oge me wâ hnyi wanben theron, me vak ta ûnyi ae möt, me hnyi wanben wahingat, ame tot ke Arenio, helâke adre hia but hlingâ, seven je faoiny, ke seven je emakan, wale je Hanon Khong a seven, adre kunâ ka hnyi hmeledrany hia thithö.

⁷ Ke e ame o but me hom e ûnyi hnyi hnyamen a metân at ame tabâ theron.

⁸ Ke e a hia but hom tusi, haba je ûnyi ae möt a vak, me wahingat a twente foa adre me tha ta ju hnyi hnyimakan Arenio, e ve hu gadra je kitara, me je kaia gol ae unöngöt ge je uto ae bo so, wale je hic hijin wakap.

⁹ Ke adre me khumöngö khumöng a teb ûnyi, ka habe, U thibi a u ûcû he ka hom tusi, me khong je hna ohmâ haten: anyin adre hlingö u, ke u je ûco hobi kâu Khong ge drâm tavat ûnyi hnyi ta je tribu hia thithö, me je hwen hnyei, me je hnyei me tavat,

¹⁰ me wiʼ ödra hnân dokhu me tavat bihut hobi kâu Khonguhmun; ke adre me musi eang hmeledrany.

¹¹ Ke oge me wâ, me löng ifucin ta je angela ae se hia igigilo theron, me ta je unyi ae möt me wahingat; ke haba ûsehiaidra me helâ me ten thauzan ta je ten thauzan, ke je thauzan ta je thauzan;

¹² ke adre me ha hnen ifucin ae gan, ka habe, E ûcû ka Arenio waleji adre hlingâ he ka kap man, me tang omjeû, me metâ, me tang hwege, me hna ogöranyâ, me hna ogânâ, me hna haisoâ.

¹³ Ke oge me löng ta je ûnyi hia adre op ethö hnyi drany, me hnyi hmeledrany, me eû hmelen hmeledrany, me eû hnyi köiö, me ta je ûnyi hia thithö hnyi je dok eling, adre me ha, ka habe, E so e unyin at ame taba theron, me Arenio minya, hna haisoa, me hna ogöranyâ, me hna ogânâ, me man nyiele nyiele balua.

¹⁴ Ke haingen vak ta ûnyi ae möt, ka habe, Amen. Me ame ta ju wahingat me khudrung.