Hna Omanenâ 4 - Iaai Bible 1901 (New Caledonia)

¹ HWABAN ta je ûnyi e, oge me wâ, ke wâ bi adre bia but khong hwanumen drany, ke haba hofuc a bân oge me löng helâ me hwan khoto ame fuc könya, me ha, ka habe, Ölö thö kââng, me oge me he ka omanenâ köu ta je ûnyi ame he ka o nyiele.

² Ke oge me ie dit ka hnyi Hanu: ke wâ bi, e hu theron adre ip hnyi drany, ke ke at ame laba hon theron;

³ ke helâ me veto jasepi me sadio at ame tabâ; ke haba wajileufat ame wâdrâ igigilo theron, ke ame manen dut helâ me semerado.

⁴ Ke twente foa je theron igigilo theron: ke oge me wâ hon ta je theron wahingat a twente foa ödrin e ve tabâ, kʼ ödrin e khavâ je ûkhaû ae hau, kʼ ödrin e bicâ je korona gol.

⁵ Ke ame he but ûheny hnyi theron je hucuce, me je hofuc, me hendreng. Ke seven ta je lamepa ame hiâ hnyi hnyimakan theron, wale je Hanon Khong a seven;

⁶ ke e hnyi hnyimakan theron köiö ae alai helâ me uselat; ke e hnyi wanben theron kʼ ödrin e igigilo theron vak ta ûnyi ae möt, kʼ ödrin e unöngöt ge je ecmak hnyi hnyimakan me hoton.

⁷ Ke haba ûnyi ae möt a bân, me helâ me liona, ke haba ûnyi ae möt a loiny, me helâ me nokon kau, ke haba ûnyi ae möt a kuniny, me hu hnyimakan helâ me at, ke haba ûnyi ae möt a vakiny, me helâ me aeto ame gâ.

⁸ Ke haba je ûnyi ae möt a vak, me ve hu gadrin je labenyidrin a siks, ke ödrin unöngöt hnyi je ke keihen ke eû hnyin ge je ecmak; ke ödrin e ca menâ hnyi lany me lit he ka ha, ka habe, E kap, e kap, e kap Than a Khong, At ae khana hia, waleji adrem, ke walang ang, ke ame he ka o.

⁹ Ke e ka he je ûnyi ae möt ka ogânâ, me ogöranyâ, me ole ka at ame tabâ theron, wale ae möt nyiele nyiele balua,

¹⁰ me ame he wahingat a twente foa ka ta but hnyi hnyimakan at ame tabâ theron, me khudrung kâu, waleji at ae möt nyiele nyiele balua, me khûâ anyidrin je korona hnyi hnyimakan theron me ha, ka habe,

¹¹ U thibi ae ûcû, Than a Khonguhmun, he ka kap hna ogânâ, me hna ogöranyâ, me man: anyin a u je op ta je ûnyi hia thithö, ke haba ta je ûnyi e me hobi kâu wem, ke u je op minya.