Hna Omanenâ 3 - Iaai Bible 1901 (New Caledonia)

¹ KE sihnalimen ju ka angela anyin ekalesia hnyi Saradi, ka habe, Walang ta je ûnyi ame ba hnen at ae hu je Hanu a seven anyin Khong, me je okhû a seven: E khanö nya but ânyâm ta je huliwa, wale ae hu iâm a u möt, kʼ u mok bi.

² Hmâkâ thö, ke ohwegiâ thö ta je kolon a ta je ûnyi ame he but ka mok: anyin oge me ca wâ ânyâm ta je huliwa a gʼ adre ohwâdâ hnyi hnyimakan Khonguk.

³ Anyin a wale ûnykûme ju hwakecin hnâm hna kap me löng; ke kât hmâ ju e me ietra. Ke u je ne ca hmâkâ, me oge me he ka o helâ me at venöu, kʼ ame ca he ka khanö u ûen oge me he ka o hnyin köu.

⁴ Ke e hu but gam tavat ae wakhalet hnyi Saradi, kʼ adre me ca hia but okânâ anyidra je ûkhaû: me adre me he ka tha he mönya kʼ adre khaû hau; anyin a ödra ûcû.

⁵ Haba at ame ton, me adre me he bi ka okhaûâ helâe ge je ûkhaû ae hau; ke oge me ca he ka kot degecâ ien hnyi tusiny möt, ke oge me he ka ha ien hnyi hnyimakö Cica, ke hnyi hnyimakan anyin ta je angela.

⁶ Haba at ae hu hnyikonyen löng ju hna ha hnen Hanu ka ta je ekalesia.

⁷ Ke sihnalimen ju ka angela anyin ekalesia hnyi Filadelefia, ka habe, Walang ta je ûnyi ame ha hnen at ae kap, ke hnathu, at ae hu gan ki anyi Davita, at ame khong, ke ba at ame he bi ka hlöng, kʼ ame hlöng, ke ba bi at ame he ka khong:

⁸ E khanö nya but ânyâm ta je huliwa (wâ bi oge hia but ip hnyi hnyimâkâm hwanuma adre hia but khong, ke ba at ae khana he ka hlöng), a gʼ ame hu gam man ae ûhnyûkong, ke u je löng hoton hok hofuc, me ca ivinoâ bi iök.

⁹ Wâ bi, oge me he ka ham keihen hanen sunago anyi Satana, wale a tavat adre me ha, ka habe, Ödra tavat Juda, ke ba bi, kʼ adre me thoi; wâ bi, oge me he ka wiʼ ödra, mʼ adre me he but jem he ka khudrung hnyi hmelen li cam, ke adre me he ka khana a oge me hia but betenge gam.

¹⁰ U je tuö hofucin hnok hna hok hnyok, anyin a wale, oge me he bi nya ka tuö u hnyi ûen ûcûbic, wale ame he ka o ka hnyi hmeledrany hia thithö, he ka cubec tavat adre me laba eang hmeledrany.

¹¹ Oge me he ka ie o: kât hmâ ju hnâm hna hu, wâ e nye he ke at ka hûgûnâ ânyâm korona.

¹² Haba at ame ton, oge me he ka wia me hnân hmolominy uma kap umen Khonguk, ke e ame ca he hmetu ka didrut: ke oge me he ka sihnalimen hnyi hon at eling ien Khonguk, me ien taun anyin Khonguk, wale Jerusalema a teb ûnyi, ame utut ûnyi hnyi drany ûnyi ge Khonguk, me iök minya a teb ûnyi.

¹³ Haba at ae hu hnyikonyen, löng ju hna ha hnen Hanu ka ta je ekalesia.

¹⁴ Ke sihnalimen ju ka angela anyin ekalesia hnyi Laodikea, ka habe, Walang ta je ûnyi ame ha hnen Amen, at ohnatho ae hnathu me wisa, waleji a at a hwân ta je ûnyi hia thithö a op hnen Khong:

¹⁵ E khanö nya ânyâm ta je huliwa, a u ca katebu bi me ca kahwa minya bi: u na katebu ju, a ne kahwa minya bi.

¹⁶ Wale me inye he ka hmitö u ûnyi hnyi hnyimök, anyin a u mage, ke ca kahwa bi me ca katebu minya.

¹⁷ Haingâm, Iny tren ta ûnyi, ke hu omjehek ut, ke ba ke ûnyi ae hia gak; ke ca khanö u bi nakaem, me kong, me theduoc, me wadröu, me he thu:

¹⁸ anyin a wale oge me ha köu he ka ûco gak gol adre degec tiren hnyi meic, me u me tren ta ûnyi; me je ûkhaû ae hau, mʼ u me he ka khavâ, me me ca manen bi hmehma wale he thu a u: me bubunyin ecmak hnân botro kâu li emâkâm, me u me bwela but.

¹⁹ Oge me nâ me kot tavat oge me betenge gadra: anyin a wale, hwege thʼ öbun me ietra ju.

²⁰ Wâ bi, inya oge me tot hnyi hwanuma me seseto: e ka hu at ame löng ifucik me khong ut hwanuma, me oge me he ka didro kâu, me tha han mē, ke tha e mönya.

²¹ Haba at ame ton, me oge me he ka ham kâu he ka tha laba mönya hon anyik theron helâji me inya oge me tuk, me oge me tha laba me Cica hon anyin theron.

²² Haba at ae hu hnyikonyen löng ju hna ha hnen Hanu ka ta je ekalesia.