Hna Omanenâ 22 - Iaai Bible 1901 (New Caledonia)

¹ KE e ame omanenâ könya wagewiny köiö möt ae alai helâ me uselat, ame di hnyi theron anyin Khong me Arenio,

² hnyi wanben getheniny. Ke e hnyi li baten wagewe ûöiny möt, at ame wa wan a twelv je bongon, ke ame wa hnyi je tehi hia: ke haba ta je lan ûö me hnân omelö ta je hnyei.

³ Ke ba hmetu bi hnaûhango: ke ame he ka e bi hnyi wanben theron anyin Khong me Arenio;

⁴ ke ame he je lathnyabainy ka huliwa kâu; ke adre me he ka wâ hnyimakan; ke e hon baridra ien.

⁵ Ke ame ca he hmetu ka lit; ke ca ûnyi hnathu bi kodra lamepa, me melaminy seûno; anyin a he Than a Khong ka melamidra: ke adre me he ka musi nyiele nyiele balua.

⁶ Ke haingen könya ka habe, Wale hofuc ae wisa me hnathu: ke haba Than a Khongon ta je hanon je perofeta ame kunâ anyin angela he ka omanenâ ka lathnyabainy ta je ûnyi ame he ka ie o.

⁷ Hnahic hnen at ame löng hoton ta je hofuc adre perofeta hnyin tusi ang.

⁸ Ke inya Ioane at ame löng me wâ ta je ûnyi e. Ke hnyi ûen oge me löng me wâ, me oge me ta ju hnyi hmelen li can angela, at ame omanenâ könya ta je ûnyi e.

⁹ Me e ame ha könya, ka habe, Ohe, ca ânyâ, iny athnyaba möu me je perofeta a je liamekeiny möu, me tavat adre me löng hoton hofuc hnyi tusi ang: khudrung ju ka Khong.

¹⁰ Ke haingen könya, ka habe, Ca ohmâ haten ta je hofuc adre perofeta hnyin tusi ang; anyin ae hakekeny jut ûen.

¹¹ Haba at ae ca wisa, me ame he bala bi ka ca wisa: ke haba at ae ikiki, me ame he bala bi ka ikiki: ke haba at ae wisa, me ame he bala bi ka ânyâ wisa: ke haba at ae kap, me adre me he bala bi ka okabâ.

¹² Wâ bi, oge me he ka ie o; ke e unyik hwaban, he ka ve ham ka tavat e ûcû me anyidra ta je huliwa.

¹³ Inya Alefa me Omega, wale bân me biliny, a can me obiny.

¹⁴ Hnahic hnen tavat adre me hneû anyidra ta je ûkhaû, me me ûcû kodra he ka he ka hnyi ûöiny möt, me he ka dit ka hnyi je homagöuleiny taun.

¹⁵ Eû hnyi hoton ta je kuli, me tavat tren khong, me tavat bi ûnyi monu, me tavat ûhlingö, me tavat adre me hmi ka je hnatheat, me tavat hia adre me weny me mâdrâ thoi.

¹⁶ Inya Iesu oge hia but kunâ anyik angela he ka thumetu öbun ge ta je ûnyi e hobi kâu ta je ekalesia. Inya khûen me Nöku Davita, ke okhû lany ae hadröngöc.

¹⁷ Ke haingen Hanu me hlu a teb faipoipo, ka habe, Aiö u. Ke so ame ha minya at ame löng, ka habe, Aiö u. Ke haba at ae beic, me he but jem: ke haba at e weny, me hom bâûâ ju köiöiny möt.

¹⁸ Inya oge me ha wia ka tavat hia adre me löng ta je hofuc adre me perofeta hnyi tusi ang, ka habe, A ne he bi ke at ka bi hanen ta je hofuc e, me ame he minya Khong ka bi hanen kâu ta je mok adre sihnalimen hnyi tusi ang:

¹⁹ ke a ne ke at ame ohia ke ong hofuc adre perofeta hnyi tusi ang, me ame he Khong ka ohia jekhon hnyi ûöiny möt, me ûnyi hnyi taun ae kap, wale adre me sihnalimen hnyi tusi ang.

²⁰ Haba at ame ha wia ta je ûnyi eang, me e ame ha, ka habe, Eke: oge me he ka ie o. Amen: Than lö, Iesu, aiö u.

²¹ E so e unyin wakap ibetengiö baû anyin Than Iesu. Amen.