Hna Omanenâ 21 - Iaai Bible 1901 (New Caledonia)

¹ KE oge me wâ drany a teb ûnyi me hmeledrany a teb ûnyi: anyin a hia but drany a bân me hmeledrany a bân; ke ba hmetu bi köiö.

² Ke inya oge me wâ taun ae kap, Jerusalema a teb ûnyi, ame utut ûheny hnyi drany ûnyi ge Khong, adre penapena helâ me hlu ame he ka faipoipo, adre theibâ e hobi kâu âiân.

³ Ke oge me löng hofuc ae gan ûnyi hnyi theron ame ha, ka habe, Wâ bi, e unyin tavat uma menâ umen Khong, ke e ame he ka laba unyidra, ke adre me he ka lakeiny, ke ame he Khong ka tha e mʼ ödra, kʼ ame he ka Khongudrin:

⁴ ke e ame he ka kot degecâ ta je deköiö hia ûnyi hnyi ta je emaködra; ke ba hmetu bi mok; keʼ ba hmetu bi hnyok ae hmak, me tenge, me vec: a hia but ta je ûnyi a bân.

⁵ Ke ame ha at ame laba hon theron, ka habe, Wâ bi, oge me he ka ohâtâ ta je ûnyi hia thithö. Ke e ame ha, ka habe, Sihnalimen ju: anyin ae hnathu me wisa ta je hofuc e.

⁶ Ke haingen könya, ka habe, Adre hia but ânyâ. Inya Alefa me Omega, wale hwân me obiny. Oge me he ka ham bâûâ köien möt ame pupua ka at ame beic.

⁷ Ame he ka hu ta je ûnyi e hnen at ame ton; me oge me he ka Khongon, ke e ame he ka nokuk.

⁸ Ke haba tavat adre me ot, ke tavat adre me ca labageju, ke tavat ae ikiki, ke tavat ûhlingö, ke tavat bi ûnyi monu, ke tavat tren khong, ke tavat adre me hmi ka je hnatheat, ke tavat hia adre me thoi, me ame he ka hu hwajekhöûdra hnyi nem ame hiâ ge meic me teio; wale mok a loiny.

⁹ Ke ame o but könya ke at hnyi je angela a seven hnyat ae hu je kaia a seven ae unöngöt ge je mok a seven a biliny; me e ame ûhnenamö mönya, me ha, ka habe, Aiö u, oge me he ka omanenâ köu hlu âiân Arenio.

¹⁰ Me e ame hum nya hnyi Hanu ka hnyi bucen ae gan me beû goranyai, me omanenâ könya taun ae kap wale Jerusalema ame utut ûnyi hnyi drany ûnyi ge Khong,

¹¹ ke hu hmanenanginy Khong hnyin: ke haba melaminy me helâ me veto ae gan hmâ hmonyin hwaban, ke helâ me veto jasepi ae alai:

¹² ke hu hak veto ae gan me beû goranyai; ke hu je homagöule a twelv, ke twelv ta angela hnyi je homagöule; kʼ adre me sihnalimen je ien hnyin, wale je ien je tribu a twelv anyin lakon Isaraela:

¹³ kun ta homagöule jimeyö; ke kun ta homagöule hnyi hwadro; ke kun ta homagöule hnyi hwaiöu; ke kun ta homagöule jimeû.

¹⁴ Ke twelv ta taben hak veto hnyi taun, ke haba hnyi je taben eling e hu je ien je aposetolo a twelv anyin Arenio.

¹⁵ Ke haba at ame ûhnenamö mönya, me hu gan hlowe gol hnân tuluto taun, me je homagöuleiny, me je haginy veto.

¹⁶ Ke tha ûcû vak ta baten taun, ke tha ûcû ibeûen me ûlauen: ke e ame tuluto taun ge hlowe, twelv thauzan je setadia: ke tha ûcû thibi ibeûen, me ûlauen, me ibeûen goranyai.

¹⁷ Ke e ame tuluto haginy veto, me wan haded ke fâte foa je kubit, hoton tulutiny at, wale angela.

¹⁸ Ke haba hna up haginy, me je veto jasepi: ke haba taun, me gol ae so, helâ me uselat ae alai.

¹⁹ Ke adre ohmanenangâ ge je veto ae gan hwaban hia taben haginy taun. Jasepi taben a bân; safairo a loiny; kalekedoni a kuniny; semerado a vakiny;

²⁰ sadonuki a thabûnginy; sadio a siksiny; kerusolite a seveniny; berulo a eitiny; topazio a naininy; kerusopala a teniny; uakini a eleveniny; amethusa a twelviny.

²¹ Ke haba je homagöule a twelv, me je penina ling a twelv; ûsa khaca penina je homagöule: ke haba getheniny taun, me gol ae so helâ me uselat ae alai.

²² Ke ba uma kap oge me wâ e: anyin a Than a Khong Aekhanahia me Arenio uma kapiny.

²³ Ke ca ûnyi hnathu bi seûno me tehi he ka omelamâ taun; anyin ame omelamâ e honen hmanenanginy Khong, ke lamepainy Arenio.

²⁴ Ke ame he ta je hnyei ka he hnyi melaminy: ke haba je thaniny hmeledrany, me adre me sukhöûnâ anyidra hmanenang ka hnyin.

²⁵ Ke adre me ca he ka hlöng je homagöuleiny hnyi lany (ke ba lit e):

²⁶ ke adre me he ka sukhöûnâ ka hnyin hmanenanginy ta je hnyei me hna ogânâ:

²⁷ ke ame ca he ka hnyi dit kâe ke ûnyi ae kong, me at ame ânyâ ikiki me thoi: ke hake ödra thibi tavat adre sihnalimidrin hnyi tusi anyin Arenio a tusiny möt.