Hna Omanenâ 2 - Iaai Bible 1901 (New Caledonia)

¹ SIHNALIMEN ju ka angela anyin ekalesia hnyi Efeso, ka habe, Walang ta je ûnyi ame ha hnen at ame kât ta je okhû a seven hnyi hnyamen a metân, wale at ame he hnyi wanben je taben lamepa gol a seven:

² E khanö nya ânyâm ta je huliwa, me ânyâm vec, me hnâm hna hok hnyok, me hnâm hna hûkotiâ tavat adre me bi ûnyi monu, ke u je cubec hnyat adre me ha, a ödrin ta je aposetolo, ke ba bi, ke u me wâ a ödra tavat thoi;

³ ke u je hok hnyok me lingvec can iök, ke u me ca sënyin bi.

⁴ Ke so bi e hu gak ûnyi ang gam, a u me hna degecâ wem a bân.

⁵ Anyin a wale ûnykûme ju hnâm hna ta hnyin, me ietra ju, me ânyâ thö ta je huliwa a bân; ke a ne ba, oge me he ka o köu he ka hom! taben ânyâm lamepa ûnyi hnyi hnen, u ka ca ietra.

⁶ Ke hu gam ûnyi ang a u me hûkotiâ ta je huliwa anyin at Nikolao, waleji oge me hnyi hûkotiâ.

⁷ Haba at ae hu hnyikonyen löng ju hna ha hnen Hanu ka ta je ekalesia. Haba at ame ton, me oge me he ka ham köu he ka han ûnyi hnyi ûöiny möt, walethö hnyi Paradaiso anyin Khong.

⁸ Ke sihnalimen ju ka angela anyin ekalesia hnyi Semurina, ka habe, Walang je hofuc ame ha hnen at a bân ke a biliny, waleji a mokcu ke a möt hmetu thö.

⁹ E khanö nya ânyâm ta je huliwa, me ânyâm theduoc (ke u me tren ta ûnyi), me bi gan anyin tavat adre me ha, a ödra tavat Juda, ke ba bi, ke sunago ödra a umo Satana.

¹⁰ U ma ca outen ta je ûnyi ame he ka oveci u: wâ bi, ame he diabolo ka khûâ keihen gabun ka hnyi uma ceat, mʼ adre me he ka cubic öbun: ke ame he ka libenyita je bonginy vec a öbun. U ma hnathu ju ke ne o but ka hnyi mok, me oge me he ka ham köu koronainy möt.

¹¹ Haba at ae hu hnyikonyen, long ju hna ha hnen Hanu ka ta je ekalesia. Haba at ae hwege, me ame ca he ka vec hnen mok a loiny.

¹² Ke sihnalimen ju ka angela anyin ekalesia hnyi Peregamo, ka habe, Walang ta je hofuc ame ha hnen at ae hu gan hele vat a lo homakan ae so hwan:

¹³ E khanö nya dok u me laba hnyin, wale hnyi theron anyi Satana: ke u je kât hmâ iök, me ca ivinoâ labageju könya, waleji hnyi je bong bongu Anetipa ae hnathu, at ame ohnathu nya, waleji adre hlingâ unyibun, hnyi dok ame laba hnyin Satana.

¹⁴ Ke e hu gak ke ta je ûnyi gam, anyin ae hu but unyâm keihen tavat adre me kât hna ûne anyi Balaama, waleji at ame nâ kö Balaka he ka ip ûnyi hnân othoâ hnyi hnyimakan Isaraela, waleji he ka an ta je ûnyi adre hudo ka ta je hnatheat, me he ka bi ûnyi monu.

¹⁵ Ke e hu minya unyâm keihen tavat adre me kât helâe ta je hna ûne anyin tavat Nikolao.

¹⁶ Anyin a wale ietra ju; e ka ba, oge me he ka ie o köu, me vat mʼ ödra ge hele vatiny hnyimök.

¹⁷ Haba at ae hu hnyikönyen, löng ju hna ha hnen Hanu ka ta je ekalesia. Haba at ame ton, me oge me he ka hân ge mana ae iyong, ke oge me he ka ham kâu ke veto ae hau, ke e hnyi veto ien a teb ûnyi adre set, ae ca khana at, ke so bi at ame kap.

¹⁸ Ke sihnalimen ju ka angela anyin ekalesia hnyi Thuataira, ka habe, Walang ta je ûnyi ame ha hnen Nokon Khong, at ae hu li ecmak helâ me bâhlân meic, ke helâ me bras ae hadröngöc li can:

¹⁹ E khanö nya but ânyâm ta je huliwa me ibetengiö me labageju, me hnâm hna bi atök, me ânyâm hok hnyok, ke beönua ânyâm ta je huliwa a biliny bon a bân.

²⁰ Ke so bi e hu but gak ûnyi eang gam, a u je hna ka momo jia Jezebela, at ame ha ka habe, e perofeta momo; ke e ame ûne me cubec je atök he ka bi ûnyi monu me hnyi an je hna hudo ka ta je hnatheat.

²¹ Ke oge me ham kâu ûen he ka ietra; ke e ame höcö he ka ietra anyin je bi ûnyi monu.

²² Wâ bi oge me khûâ ka hnyi hna mokut walang ang me tavat adre me bi ûnyi monu më, me me vec gan hmâ thö, at ka ca ietra anyin ta je huliwa.

²³ Ke oge me he ka hlingâ lakon ge mok; ke ame he ta je ekalesia ka khanʼ ödra, ka habe, inya ang at ame elâm ta je ûnykûme me ta je hnyok: ke oge me he ka ve ham köbun hoton anyibun ta je huliwa.

²⁴ Ke inya oge me ha köbun je ke keihen hnyi Thuataira, wale tavat ae ca hu gadrin hna ûne eling, ke ca khanʼ ödra hwakecin ae dit anyi Satana, helâ me hnödra hna hat oge me ca ip hubun ke hok.

²⁵ Ke kâ hmâ ju öbun ta je ûnyi öbun e hu, ke ne o but oge me o.

²⁶ Ke haba at ame ton, kʼ ame vheno anyik ta je huliwa ke ne o but obiny, me oge me he ka ham kâu musi hon ta je hnyei:

²⁷ ke e ame he ka musi ödra ge osö fao, helâ me hnödra hna sa omomono je kaia kânâ; helâji me hnok hna kap ûnyi ge Kamök;

²⁸ ke oge me he ka ham kâu okhû lany.

²⁹ Haba at ae hu hnyikonyen, löng ju hna ha hnen Hanu ka ta je ekalesia.