Hna Omanenâ 19 - Iaai Bible 1901 (New Caledonia)

¹ KE hwaban ta je ûnyi e inya oge me löng helâke hwan tavat ae se hia ethö hnyi drany adre me ha, ka habe, Haleluya; E unyin Khonguta möt, me hmanenang, me man:

² anyin ae hnathu me wisa hnen hna bi hwaban; anyin a hia but bi hwaban ka momo hnyi gethen ae nua, at ame okongoâ hmeledrany ge anyin bi ûnyi monu, ke a hia but bi hwaban kâu can dren lathnyabainy.

³ Ke adre me ha hnathu, ka habe, Haleluya. Ke ame hai goranyai nyiele nyiele balua hainy momo.

⁴ Ke haba wahingat a twente foa, ke ta ûnyi a vak ae möt, me ödrin e ta ju me khudrung ka Khong at ame tabâ theron, me ha, ka habe, Amen; Haleluya.

⁵ Me ame o but hofuc ûnyi hnyi theron, ka habe, Ogânâ thö Khonguta öbun je lathnyabainy, me tavat adre me outen e, tavat ae ûhnyûkong, me tavat ae gan.

⁶ Ke oge me löng helâke hwan tavat ae se hia, ke helâke hwan ta je köiö ae se hia, ke helâke hwan hendreng ae gan hmâ ame ha, ka habe, Haleluya: anyin a Than a Khonguta Ataekhanahia ame musi.

⁷ E so ate me senyin me hobâ, ke so ate me ham kâu hna ogânâ: anyin ame o but Arenio he ka faipoipo, ke a hia but âiân hamen penapena e.

⁸ Ke adre me hna kâu he ka khavâ mano lino ae ûhnyûkong nân ae hadröngöc ke ba hnyikongon: anyin a haba mano lino, me wale hwakecin ae wisa anyin wakap.

⁹ Ke haingen könya, ka habe. Sihnalimen ju, ka habe, Hnödra hnahic adre me hawâ ka hnyi bijeûiny faipoipo anyin Arenio. Ke haingen könya, ka habe, Wale hofuc ae hnathu hwan Khong.

¹⁰ Me oge me ta ju hnyi hmelen li can he ka khudrung kâu. Ke haingen könya, ka habe, Ohe, u ma ca ânyâ: anyin a iny athnyaba möu me je liamekeiny möu, tavat adre hom hna ohnathu Iesu: khudrung ka Khong: anyin a haba hna ohnathu Iesu me wale hanon hna operofeta.

¹¹ Ke oge me wâ drany adre khong; ke wâ bi hors ae hau, ke haba li ien at ame tabâ e me Wisa me Hnathu; ke e ame hnei me vat hnyi hwakecin ae wisa.

¹² Haba li emakan, me bâhlân meic, ke se hia je korona hon ban; ke hu ien adre set wale ae ca khana hnen at, ke ka hake e thibi.

¹³ Ke adre okhaûâ e ge ûkhaû adre osisidrâ ge dra: ke adre me ha ien, ka habe, Logo anyin Khong.

¹⁴ Me ame he hoton, je utbavat hnyi drany, adre me tabâ je hors ae hau, adre khavâ mano lino ae ûhnyûkong nân, ae hau me ba hnyikongon.

¹⁵ Ke ame o but ûnyi hnyi hnyimen hele vat ae so hwan, me me he ka kot kâu ta je hnyei: ke e ame he ka musi ödra ge osö fao: ke e ame ututo hnyi hna hlic vineiny tang hmonyin ae gan anyin Khong Ataekhanahia.

¹⁶ Ke e ame khavâ khaûen, ke adre set ke ien hnyi jevan, ka habe, TUHAN TA JE TUHAN ME THANINY TA JE THAN.

¹⁷ Ke oge me wâ ke angela ame tot hnyi seûno; ke e ame ha ge hwan ae gan, ame ha ka ta je meno ame gâ ethö, ka habe, Ai öbun ka ûkhacaköu ka hnyi bijeû ae nua anyin Khong;

¹⁸ mʼ öbun e he ka an viny ta je than, me viny ta je taben vat, me viny tavat ae hwege, me viny ta je hors me tavat adre me tabâ, me viny tavat hia thithö, tavat adre hna bâûâ me ta je athnyaba, me tavat ae ûhnyûkong me gan.

¹⁹ Ke oge me wâ meno me ta je thaniny hmeledrany, me anyidra je utbavat adre me ûkhacaköu he ka vat me at ame tabö hors me anyin utbavat.

²⁰ Me adre me kât meno ae hiny; me perofeta thoi minya waleji at ame ânyâ ta je haten hnyi hnyimakan, hnân omono tavat adre me kap haten meno, mʼ ödra minya adre me khudrung ka at ae we e: ke adre me khûʼ ödru meli ödru ka hnyi nem a meic ame hiâ ge teio:

²¹ ke adre me hlingâ je kolon ge hele vat anyin at a tabö hors, wale hele vat ame o but ûnyi hnyi hnyimen: kʼ ame sekon dö je meno ame gâ hia ge je unyidrin.