Hna Omanenâ 18 - Iaai Bible 1901 (New Caledonia)

¹ KE hwaban ta je ûnyi e, inya oge me wâ ke angela minya ame utut ûheny hnyi drany, ae hu musi ae gan; ke ame melam hmeledrany ge anyin hmanenang.

² Ke e ame ha ge hwan ae hwege, ka habe, A ū but, a ū but Babulona ae gan, kʼ adre wia e hnân hnyaban ta je demoni, me uma umen ta je hanu hia ae kong, me uma umen ta je meno hia ame gâ ae ikiki kʼ adre hûkotiâ.

³ Anyin a ū but ta je hnyei hia ge wainainy tang hmönyininy bi ûnyi monu anyin momo; ke ame bi ûnyi monu me je than eang hmeledrany, kʼ ame tren omjeû tavat ûcû eang hmelen ge maniny hna osenyinâ unyin momo.

⁴ Ke oge me löng ke hofuc minya hnyi drany ame ha, ka habe, Lakeik lö, he but ge momo, mʼ öbun e ca hnyi hanen anyin je hulo, me me ca o köbun anyin je mok:

⁵ anyin a o but hnyi drany anyin ta je hulo, ke Khong ame ûnykûme anyin ta je monu.

⁶ Bi hwaban ju kâu helâ me hnen hna ham, ke olo ju bi hwaban kâu hoton anyin huliwa: ke olo ju ûhaniken kâu hnyi utkaia e ame ûhaniken.

⁷ E gan hmâ hnen hna hamen ogânâ e bi, me ka osenyinâ unyin, awe, ânyâ thö kâu helâe ge vec me hlöuhlöu: anyin a haingen eû hnyi hnyekon, ka habe, Inya oge me laba a momo than, kʼ iny ca safac bi, ke oge me ca he ka wâ hlöuhlöu.

⁸ Anyin a wale ame he ka o kâu anyin je mok hnyi bong a khaca, wale mok, me hlöuhlöu, me hmiâ; ke adre me he ka thong degecâ e hnen meic; anyin ae hwege Than a Khong at ame bi hwaban kâu.

⁹ Ke ame he je thaniny hmeledrany tavat adre me bi ûnyi monu me tha senyin më ka tenge thungaû can ödrin ka wâ hainy hna thong e,

¹⁰ ke ödrin e tot sâkâû anyin a ödrin e outen anyin vec, me ha, ka habe, Ekölö, ekölö ge taun ae gan a Babulona, taun ae hwege! anyin ame o but hwaban köu hnyi awa a khaca.

¹¹ Ke ame tenge thungaû gan hnen tavat ûcû hnyi hmeledrany, anyin ae ba hmetu at ae khana he ka ûco je omjehedra;

¹² wale omjeû gol, me sileva, me je veto ae gan hwaban, me je penina, me mano lino ae ûhnyûkong nân, me mano ae udrudrâ hlit, me silek, me mano ae dra; me je uto ae bo so hia, me je kaia hia a nyon elefan, me je kaia uto hia ae gan hwaban, me bras, me fao, me veto oût;

¹³ me kinamo, me ainomo, me je ûnyi ae bo so, me muro, me libanu, me waina, me wakaco, me falawa ae so, me hwit, me je meno, me je mamoe; me je hors, me je kariota, me je unyin; me je hanon at

¹⁴ Ke a he but gam bi je wan ame weny hnyekom, ke hia but gam ta je ûnyi hia ae senem me meic, kʼ ame ca he hmetu tavat ka wâ bala.

¹⁵ Ke ame he tavat ûco ta je ûnyi e, waleji hnen momo hna otreni ödra ka tot sâkâû, anyin a ödra outen anyin vec, adre me tenge thungaû;

¹⁶ me ha, ka habe, Ekölö, ekölö ge taun ae gan, waleji ame khavâ mano lino ae ûhnyûkong nân, me mano ae udrudrâ hlit, me dra, me otheibâ ge gol, me je veto ae gan hwaban, me je penina!

¹⁷ anyin adre ohia but hnyi awa a khaca tang omjeû ae gan hmâ helâe. Ke ame tot sâkâû ta je tuhan hu, me tavat adre me kec ehe hnyi köiö, me je aten hu, me tavat adre me huliwa hnyi köiö,

¹⁸ me ha, ödra ka wâ thö hainy hna thong e, ka habe, Ewa taun ae ûcû me taun eang ae gan?

¹⁹ Me adre me khaû dröu ka hnyi je bödra, me hongot, me tenge thungaû, ka habe, Ekölö, ekölö ge taun ae gan, at ame otreni ödra hia ge omjeû tavat ae hu hudrin hu eû hnyi köiö ûnyi ge ûnyi hnathuiny ke adre otheduocâ e hnyi awa a khaca.

²⁰ U ma senyin dö gan drany lö, me öbun wakap, me ta je aposetolo, me ta je perofeta; anyin a Khong ame liia but bi hwaban kâu cabun bi.

²¹ Ke haba ke angela ae hwege ame hom veto helâke me veto adre omomono ae gan me khûâ ka hnyi köiö, me ha, ka habe, Helâe minya adre me he ka hagutâ Babulona taun ae gan, ge hna khûâ ae hwege, ke adre me ca he hmetu ka wâ e bala.

²² Ke adre me ca he hmetu ka löng unyâm hwan tavat khumöngö kitara, me ta je ûnyi khumöng, me tavat adre me tûö kowi, me tavat adre me tûö khoto; ke adre me ca he hmetu ka wâ unyâm at ame huliwan je huliwa; ke adre me ca he hmetu ka löng unyâm hwan veto hnân oamamâ;

²³ ke ame ca he hmetu ka umumelam hnyi wanbâm bâhlân lamepa; ke adre me ca he hmetu ka löng hnyi wanbâm ifucin li at ödre tep faipoipo: anyin a haba tavat ûcû unyâm, me ödrin e beönua hnyi hmeledrany: ke adre me omonoâ ta je hnyei hia ge ânyâm je bihihwakecin.

²⁴ Ke adre me wâ gan dren ta je perofeta me wakap, me tavat hia adre hia but hlingâ hnyi hmeledrany.