Hna Omanenâ 17 - Iaai Bible 1901 (New Caledonia)

¹ KE ame o thö ke at hnyin je angela a seven hnyat ae hu gadrin je kaia a seven, kʼ ame ha könya, ka habe, Aiö u, oge me he ka omanenâ köu hna bi hwaban ka momo hnyi gethen, at ae nua, kʼ ame laba hon je köiö ae se hia;

² ke ta je thaniny hmeledrany adre me bi ûnyi monu mē, kʼ ame monu aten hmeledrany hnen wainainy anyin bi ûnyi monu.

³ Ke e ame hum nya hnyi Hanu ka hnyi hnyebuba: me oge me wâ momo ame laba hon meno ae dra, e unöngöt ge je ien bi gan, ke hu je ban a seven, ke je fao a ten.

⁴ Haba momo, me ame khavâ ûkhaû ae udrudrâ hlit ke dra, ke a theibâ ge gol me je veto ae gan hwaban me je penina, ke e hu hnyi hnyamen kaia gol, ke unöngöt ge je ûnyi ae ikiki, a ta je ûnyi ae kong ûnyi hnyi anyin bi ûnyi monu,

⁵ ke e hnyi hon bariny ien adre sihnalimen, ka habe, E IYONG, BABULONA AE GAN, HINYEN OMOMO HNYI GETHEN, KE TA JE ÛNYI AE IKIKI HNYI HMELEDRANY.

⁶ Ke oge me wâ momo ame monu a ijem dren wakap, ke dren tavat adre me ohnathu Iesu. Ke oge me wâ me oge me lâiâ gan hmâ.

⁷ Haba angela ame ha könyâ ka habe, Anyin a ieû u me lâiâ? Oge me he ka ha köu bongon ae iyong anyin momo, me meno a taben, ae hu je ban a seven me je faoiny a ten.

⁸ Haba meno u me wâ, me, ka e bi ehac, ke ba bi walang ang; ke e ame he ka ölö ûheny eû hnyi hmonop ae dit hmonyin me he but ka hnyi hnaûhango. Ke ame he ka lâiâ hnen tavat adre me laba hnyi hmeledrany, tavat adre me ca hia but set je iödra hnyi tusiny möt hwân hnyi hna bi taben hmeledrany, ödra ka wâ meno, a e bi ehac, ke ba bi walang ang, kʼ ame he ka o.

⁹ Ke walang hnyok ae hu metâ hnyin. Haba je ban a seven, me wale je bucen a seven, wale momo ame laba hon:

¹⁰ ke wale je than a seven, a ū but thabûng, ke ka e bi khaca, ke tiga bia bi khaca; ke e ka o but, me ûcû kâu he ka më laba.

¹¹ Ke haba meno a ka e bi ehac, ke ba bi walang, wale at a ka eitiny ke hanen hnyat a seven; ke e ame he ka he ka hnyi hnaûhango.

¹² Ke haba ta je faoiny a ten u je wâ, me, wale je than a ten, hnyat ae tiga ca hu gadrin dokhu; ke adre hna ködrin musi helâke me je than, tha ödrin me meno, hnyi awa a khaca.

¹³ Khaca thibi je hnyekudrin, ke ödrin e ham manidrin man me anyidrin musi ka meno.

¹⁴ Ame he hnyat eling ka vat me Arenio, ke ame he Arenio ka hwege hudrin, anyin e Tuhan ta je tuhan, me Thaniny ta je than; ke amo he tavat a tha ödra më ka hwege, tavat adre hawâ, me tavat adre ûca, me tavat ae hnathu.

¹⁵ Me e ame ha könya, ka habe, Haba je köiö u je wâ, waleji ame laba hon momo hnyi gethen, wale je tavat, me tavat ae se, me je hnyei, me je hwen hnyei.

¹⁶ Ke haba je faoiny a ten u je wâ, ke meno, me wale hnyat ödrin e he ka hûkotiâ momo hnyi gethen, me söh e, me ohethuâ, me an viny, me thong degecâ hnyi meic.

¹⁷ Anyin a Khong ame ip eû hnyi je hnyekudrin he ka ohwâdâ weny, me he ka tha hnyok, me ham dökhudrin dokhu ka meno, ke ne o but ame hwâdâ je hofuc hwan Khong.

¹⁸ Ke haba momo u je wâ, me wale taun ae gan, wale at ame muso je thaniny hmeledrany.