Hna Omanenâ 16 - Iaai Bible 1901 (New Caledonia)

¹ KE oge me löng ifucin ae gan hnyin uma kap ame ha ka je angela a seven, ka habe, He thʼ öbun ka hingâlâ je kaiainy tang hmönyin anyin Khong ka hnyi hmeledrany.

² Me ame he but at a bân me hingâlâ anyin kaia ka hnyi hmeledrany; me ame o but anyû ae kong me ikiki ka hnyi hon tavat ae hu gadra haten meno, ke hon tavat minya adre me khudrung ka at ae we e.

³ Haba at a loiny ame hingâlâ anyin kaia ka hnyi köiö; me me wia e me helâ me dren komok; me ame mokcu ta je ûnyi hia ae möt eû hnyi köiö.

⁴ Ke haba at a kuniny ame hingâlâ anyin kaia ka hnyi je wagewe, me je an ame pupua; me ame dra but.

⁵ Ke oge me löng angelainy je köiö ame ha, ka habe, U thibi Wisa, a u walang ang me adrem, u At ae Kap, anyin a u je bi hwaban helâe:

⁶ anyin a adre me hingâlâ dra dren wakap me ta je perofeta, ke u je habelidra ge dra: ae ûcû kodra.

⁷ Ke oge me löng taben hut ame fuc, ka habe, Eke, Than a Khong Ataekhanahia lö, e hnathu me wisa hnâm je hna bi hwaban.

⁸ Ke haba at a vakiny ame hingâlâ anyin kaia ka seûno; me adre hna kâu he ka le tavat ge meic.

⁹ Me ame hlâ tavat hnen kahwa ae gan: me adre me haikongoâ ien Khong wale at ae hu man hon ta je mok e; ke adre me ca ietra bi me he ka ogânâ e.

¹⁰ Ke haba at a thabunginy ame hingâlâ anyin kaia hon theron anyin meno; me ame menekholom but dokhon dokhu; ke adre me hohoc je bohmödra ge vec,

¹¹ ke adre me haikongoâ Khongon drany can anyidra ta je vec me hnödra je anyû; ke adre me ca ietra bi ta je hwakecidra.

¹² Ke haba at a siksiny ame hingâlâ anyin kaia ka hnyi wagewe ae gan Euferate; me ame hme thö köiö, mʼ adre me he ka penapena ke gethen deny je than ûhedra e jimeyo.

¹³ Ke oge me wâ je hanu ae kong a ödrin kun helâ me je rana ödrin e he but ûnyi hnyi hnyimen drakona, me ûnyi hnyi hnyimen meno, me ûnyi hnyi hnyimen perofeta thoi:

¹⁴ anyin a ödrin je hanu anyin je demoni, ödrin a ânyâ je haten; wale ödrin e he ka ta je than hia hyin hmeledrany he ka ûkhacaköu ödra ka hnyi vat hnyi bong ae gan bonginy Khong Ataekhanahia.

¹⁵ (Wâ bi, oge me he ka o helâ me at venöu. Hnahic hnen at ame hmâkâ, me tuö anyin je ûkhaû, wâ e nye he ka he thu, mʼ ödra wâ thö anyin hmehma.)

¹⁶ Ke ödrin e ûkhacaköu ödra hnyi dok adre hwenyi ien hwen Heberu, ka habe, Amagedo.

¹⁷ Ke haba at a seveniny ame hingâlâ anyin kaia ethö hnyi wanben; me ame o but hwan ae gan ûnyi hnyi uma kap, ûnyi hnyi theron ame ha, ka habe, Adre hia but ânyâ:

¹⁸ me ame manen dutʼje hucuce, me je hofuc, me je hendreng; ke e hu hwiöi ae gan hmâ, e ba khaca a helâe hwân ehac ge ibi hu at hnyi hmeledrany, e ba hwiöi ae gan me hwege helâe.

¹⁹ Me ame subâ kunâ but taun ae gan, kʼ ame ū but je taun hnyi je hnyei: ke adre me ûnykûme Babulona taun ae gan hnyi hnyi makan Khong he ka ham kâu kaiainy wainainy anyin tang hmonyin.

²⁰ Kʼ ame kec dö je bomene hia, kʼ adre me ca wâ hmetu je bucen.

²¹ Ke ame ta but ûnyi anyi drany ka hnyi hon tavat we wahma he gan hmâ, haba ihmakiny je owe, me helâ me khaca talan: kʼ ame haikongoâ Khong hnen tavat can mok eling a we wahma; anyin ae gan hmâ hmonyin mok e.