Hna Omanenâ 15 - Iaai Bible 1901 (New Caledonia)

¹ KE oge me wâ ke haten hnyi drany ae gan rae hnân lâiâ, a seven je angela ae hu je mok a biliny a seven, anyin adre umo hnyi hmonyin anyin Khong.

² Ke oge me wâ köiö helâ me uselat adre ûhaniken me meic; ke ödra minya tavat adre me hwege hon meno, ke hon we e, ke hon numerainy ien e, ke adre me tot hnyi köiö uselat, ke ve hu gadra je kitara anyin Khong.

³ Ke adre me khumöngö khumöng anyi Mose athnyabainy Khong, ke khumöng minya anyin Arenio, ka habe, E gan hmâ ke hnân lâiâ ânyâm ta je huliwa, Than a Khong Ataekhanahia; e wisa me hnathu dem je gethen, u Tuhan ta je dö.

⁴ Than lö, ie at ame ca he ka ot me ogânâ iâm î anyin a hake u ke thibi at ae kap; anyin ame he ka o ta je hnyei hia thithö he ka khudrung hnyi hnyimâkâm; anyin adre hia but omanenâ ânyâm ta je huliwa ae wisa.

⁵ Ke hwaban e inya oge me wâ, ke wâ bi adre me khong ut hnyi drany uma kapiny uma menâ at ame ohnatko:

⁶ me ame didrut ûnyi hnyi hnyin uma kap je angela a seven, ke hu gadrin je mok a seven, ödrin e theibâ veto ae alai me hadrö-ngöc, ke ödrin e oweikâ je ûlaidrin ge wen a gol.

⁷ Ke haba ke at hnyi je ûnyi a vak a möt ame ham ka je angela a seven je kaia a seven ae unöngöt ge tang hmonyin anyin Khong ae möt nyiele nyiele balua.

⁸ Me ame unöngötö uma kap ge hai ûnyi hnyi hmanenang anyin Khong, me ûnyi hnyi maniny man; ke ba at ae khana he ka didro ka hnyi uma kap, ke ne o but ame hwâdâ thö je mok a seven anyin je angela a seven.