Hna Omanenâ 14 - Iaai Bible 1901 (New Caledonia)

¹ KE oge me wâ, ke wâ bi Arenio ame tot hon bucen Ziona ke e unyin tavat a wan haded ke fâte foa thauzan, ke adre hia but sihnalimen ien, ke ien Kamen hnyi hon je baridra.

² Ke oge me löng hofuc ûnyi hnyi drany, helâ me hwan je wagewe ae se hia, ke helâ me hwan hendreng ae gan: ke haba hwan oge me löng, me helâ me hwan tavat adre me khumöngö anyidra ta je kitara:

³ ke adre me khumöngö helâke khumöng a teb ûnyi hnyi hnyimakan theron, ke hnyi hnyimakan je ûnyi ae möt a vak ke wahingat: ke ba at ae khana he ka nâ khumöng e, ke so thibi tavat eling a wan haded ke fâte foa thauzan, tayat adre me ûco ûnyi hnyi hmeledrany.

⁴ Ödrin je hnyat a ca hamödrin okongu ödrin unyin omomo; anyin a ödrin so. Ödrin je hnyat adre me hnu hoton Arenio ka hnyi je dok ame he hnyin. Ödrin je hnyat adre ûco unyin tavat, me hnân wan a bân hobi kâu Khong me Arenio.

⁵ Ke ba thoi adre me wâ hnyi je hnyimödra, anyin ae ba hnyikongudrin.

⁶ Ke oge me wâ ke angela minya ame gâ ethö hnyi wanben drany, ke unyin e ûthumetu ae so ame ca ba balua he ka khetâ ka tavat adre me laba hnyi hmeledrany, ke ta je tribu, ke ta je hwen hnyei, ke tavat;

⁷ ke e ame ha ge ifucin ae gan, ka habe, Outen ju Khong, me ham kâu hna ogânâ; anyin a o but ûen ûhnei gan: ke khudrung ju kâu at a op drany, me hmeledrany, me köiö me je an ame pupua.

⁸ Ke ame he hoton e ke angela, at a loiny, kʼ ame ha, ka habe, A ū but, A ū but Babulona ae gan, waleji at ame kunâ ta je hnyei hia he ka ijem wainainy tang hmonyin hnyi bi ûnyi monu a e.

⁹ Ke ame he hotudru ke angela a kuniny, kʼ ame ha ge ifucin ae gan, ka habe, A ne hu at ame khudrung ka meno, ke we e, kʼ ame kap haten e hnyi hon bariny, a ne hnyi hnyamen,

¹⁰ wale at ame he minya ka ijem wainainy tang hmonyin anyin Khong, wale adre penapena ke adre me ca ûhaniken, hnyi kaiainy anyin tang hmonyin; ke adre me he ka ovecâ e hnen meic me teio hnyi hnyimakan ta je angela ae kap, ke hnyi hnyimakan Arenio:

¹¹ ke ame sâ goranyai nyiele balua hainy hna oveci ödra; ke adre me ca menâ bi hnyi lany me lit tavat adre me khudrung ka meno ke we e, me tavat hia adre me kap haten ien e.

¹² Wale hok hnyok anyin wakap, tavat adre me löng hoton hnanyibu anyin Khong, me labageju kö Iesu.

¹³ Ke oge me löng hofuc ûnyi hnyi drany ame ha könya, ka habe, Sihnalimen ju, ka habe, Hnahic hnen wamok, tavat adre me mok unyin Than hwân walang ang: eke, ame ha Hanu, mʼ adre me menâ thö ûnyi hnyi anyidra ta je huliwa; anyin ame tha hnu hotudra anyidra ta je huliwa.

¹⁴ Ke oge me wâ, ke wâ bi, ûlâ ae hau; me ke at ame laba hon ûlâ helâ me ke nokon at, ame bicâ korona gol, ke e hnyi hnyamen hele hnân subö hwit ae so hwan.

¹⁵ Ke haba ke angela ame didrut ûnyi hnyi hnyin uma kap, ame ha ge hwan ae gan ka at ame laba hon ûlâ, ka habe, Inâ but ânyâm hele hnân subö hwit, me subâ but; anyin a o but ûen he ka subâ; anyin ae ti hmahmat ut hmeledrany.

¹⁶ Haba at ame laba hon ûlâ ame inâ but ka hnyi hmeledrany anyin hele hnân subö hwit; me a meno but hmeledrany.

¹⁷ Ke haba ke angela ame didrut ûnyi hnyi uma kap ethö hnyi drany, ke hu minya gan hele hnân subö hwit ae so hwan.

¹⁸ Ke haba ke angela ame didrut ûnyi! hnyi taben hut, ae hu man gan hon meic: ke e ame ha ge hwan ae gan ka at ae hu hele hnân subö hwit ae so hwan, me ha, ka habe, Inâ ju ânyâm hele hnân subö hwit ae so hwan, me meno je de vine hnyi hmeledrany; anyin ae mat hmonyin je wan vineiny.

¹⁹ Haba angela ame inâ but anyin hele hnân subö hwit kâ hnyi hmeledrany, me meno vineiny hmeledrany, me khûâ but ka hnyi hna hlic vine wale ûnyi hnân hlic vine ae gan hmâ anyin tang hmonyin anyin Khong.

²⁰ Ke adre me uto ju hnyi hna hlic vine hnyi hoton taun, me ame hingölö but dra ûnyi hnyi hna hlic vine ke ne o but hnyi toiny hnyimen hors, ke haba ûlauen me khaca thauzan ke siks haded je satadia.