Hna Omanenâ 12 - Iaai Bible 1901 (New Caledonia)

¹ ME ame manen dut hnyi drany ke haten ae gan; wale momo at ame khavâ seûno, ke hnyi hmelen li can tehi, ke e hnyi hon ban korona a je okhû a twelv;

² ke ame erkin dut me ame vec hnyekon, ke ame tenge ge vec me me he ka hnokoâ but.

³ Me ame manen dut ke haten minya hnyi drany; ke wâ bi, wale drakona ae gan ae dra, seven je ban, ke ten je faoiny, ke seven je korona hon je ban.

⁴ Ke e ame lelo tilâ hnen hmokunen ke keihen a kuniny ta je okhûiny drany, me ame khûâ ka hnyi hmeledrany: ke haba drakona ame tot hnyi hnyimakan momo, waleji ame he but ka hnokoâ, me me he ka an nokon e ka o.

⁵ Haba momo ame hnokoâ but da, at ame he ka muso ta je hnyei hia thithö ge osö fao: ke adre ie kap nokon ka Khong, hnyi anyin theron.

⁶ Me ame kec ut momo hnyebuba ai, ke e hu gan eling dok a penapena Khong, mʼ adre me he ka hat eling hnyi ta je bong a wan thauzan tu haded ke sikste.

⁷ Ke e hu vat hnyi drany: haba Mikaela me anyin je angela ame vat me drakona; ke drakona me anyin je angela adre me vat mʼ ödra;

⁸ ke ödra ca hwege bi, ke ba hmetu bi hnödra hnyi drany.

⁹ Me adre me obâ but drakona ae gan, wale on adrem, adre hwenyi ien Diabolo, me Satana, at ame omonoâ hmeledrany hia thithö; adre obâ but ka hnyi hmeledrany, ke adre tha obâ e me anyin ta je angela.

¹⁰ Ke oge me löng hofuc ae gan hmâ hnyi drany ame ha, ka habe, A o but walang ang möt, me man, me dokhu dokhon Khonguta, me musi minya anyin Keriso a anyin: anyin adre hia but obâ at ame haikongoâ je liamekeiny mʼ öta, wale at ame haikongu ödra hnyi hnyimakan Khonguta hnyi lany me lit.

¹¹ Ke adre me hwege hon ûnyi ge dren Arenio, me hofuc adre me ohnatho; ke adre me ca hnyokâ anyidra möt ke ne o but mok.

¹² Anyin a wale senyin dö ta je drany, me tavat adre me laba hnyin. Ekölö ge kânâ me köiö: anyin ame utut köbun diabolo, ke gan hmâ anyin wathethot, anyin ae khana but ae okhulit biju ûen.

¹³ Ke a wâ but drakona a gʼ adre hia but obâ e ka hnyi hmeledrany, me e ame ovecâ momo at ame hnokoâ da.

¹⁴ Ke adre me ham ka momo li labenyin aeto ae gan, me me gâ ûnyi hnyi hnyimakan on ka hnyi hnyebuba a hnen, ke adre hat eling, hnyi ûen a khaca, me je ûen, me haf ûen.

¹⁵ Haba on ame hmita hoton momo köiö ûnyi hnyi hnyimen helâ me wagewe, me me he ka wekhet ut momo hnyi wagewe.

¹⁶ Kʼ ame hadrua momo hnen kânâ, kʼ ame memang ut kânâ me utâ wagewe a walā drakona ûnyi hnyi hnyimen.

¹⁷ Kʼ ame hmonyin drakona ka momo, me he but he ka vat me je kolon a je mâtrâniny momo, tavat adre me löng hoton hnanyibu anyin Khong, kʼ adre kât hmâ hna ohnathu Iesu: