Hna Omanenâ 11 - Iaai Bible 1901 (New Caledonia)

¹ KE adre me ham könya hlowe helâ me uci: ke ke at ame ha könya, ka habe, Todrö, tuluto ju uma kap umen Khong, me taben hut, me tavat adre me khudrung eû hnyin.

² Ke haba hnyeule hoton uma kap, hnen ju, ca ke ka tuluto; anyin adre hia but ham e ka ta je hnyei: ke adre me he ka uto taun ae kap hnyi ta je tehi a fâte tu.

³ Ke oge me he ka hna ka li at ohnathu nya he ka perofeta hnyi ta je bong a wan thauzan tu haded ke sikste, adre khaû ödru ge mano ae gan nân.

⁴ Walang li elaio, me li taben lamepa ame tot hnyi hnyimakan Khongon hmeledrany.

⁵ Ke a ne he ke at ka beokongu ödru, me ame o but meic ûnyi hnyi li hnyimödru he ka thong je iwahnaihmiony mʼ ödru: ke a ne beokongu ödru hnen ke at, e ûcû he ka hlingâ helâe minya at e.

⁶ E unyidru man he ka hlöng drany me me ca he ka ta we hnyi ta je bonginy perofeta a ödru; ke e hu gadru man hon ta je wagewe he ka wia me me dra, me he ka kot hmeledrany ge ta je mok hia helâ me wedru.

⁷ Kʼ ödru ka hia but umo hnödru hna ohnatho, me ame he meno at ame o but ûnyi hnyin hmonop ae dit hmonyin ka vat mʼ ödru, me ton hudru, me hlingʼ ödru.

⁸ Ke haba li unyidru ame mokut hnyi getheniny taun ae gan, haba ien hoton hanu, me Sodoma, me Aigupito, waleji adre osatauroâ hnyin Tuhödru.

⁹ Ke haba keihen ûheny hnyi ta je hnyei me ta je tribu me ta je hwen hnyei, me tavat adre me wâ li unyidru hnyi kun ta bong me haf, ke adre ca hna but he ka konâm li i unyidru hnyi erkemok.

¹⁰ Ke haba tavat adre me laba eang hmeledrany, me adre me senyin gadru me hobâ; ke adre me he ka ûhamköuâ ta je bwihlany; anyin a li perofeta eling ödru me ovecâ tavat adre me laba eang hmeledrany.

¹¹ Ke hwaban kun ta bong ke haf, me ame dilic ödru hnen hanuiny möt, ke ödru me todrö; me ame o but ot ae gan hmâ kodra adre me ō ʼdru.

¹² Me ödru me löng hofuc ae gan hmâ ûnyi hnyi drany ame ha ködru, ka habe, Ölö thö kââng. Me ödru me ölö thö hnyi dranyai hnyi ûlâ; kʼ ame ōô ʼdru hnen je iwahnaihmiony inʼ ödru.

¹³ Ke hu hwiöi ae gan hnyi awa eling, me ame ū but ke keihen a libenyitainy taun; ke haba hwiöi, me ame hlingâ tavat a seven thauzan: me ame ot je kolon, mʼ adre me ogânâ Khongon drany.

¹⁴ A um dö Ekölö a loiny, wâ bi, ame he ka ie o Ekölö a kuniny.

¹⁵ Ke adre tûâ trutru anyin angela a seveniny; me ame o je hwan hofuc ae gan hnyi drany, ame ha, ka habe, Haba dokhu dokhon hmeledrany, me adre hia but wia hnân hobi kâu Tuhöta me Keriso a anyin: me e ame he bi ka musi nyiele nyiele balua.

¹⁶ Haba wahingat a twente foa, hnyat ödrin e tabâ anyidrin je theron hnyi hnyimakan Khong, me ödrin e ta ju hnyikânâi, me khudrung ka Khong,

¹⁷ me ha, ka habe, Öhmun e ole köu Than a Khong, Ataekhanahia, a u walang me kâû adrem; anyin a u je hia but hom manâm man ae gan hmâ, ke u je muso.

¹⁸ Ke ame hmonyin ta je hnyei ke ame o but ânyâm hmonyin, ke ûen he ka ûhnö tavat adre mokcu, me he ka ham hwaban ka lathnyabaem a ta je perofeta, me wakap, me tavat adre me okabâ iâm, tavat ae ûhnyûkong me tavat ae gan; me he ka ohnaûhangöi ödra adre me ohnaûhangoâ hmeledrany.

¹⁹ Ke adre me khong uma kap umen Khong walethö hnyi drany; me ame manen dut hnyi umen uma tangen anyin ûhihinyköu; me ame o but je hucuce, me je ifucin, me je hendreng, me hwiöi, me we wahma ae gan.