Hna Omanenâ 10 - Iaai Bible 1901 (New Caledonia)

¹ KE oge me wâ ke angela ae man ame utut ûheny hnyi drany, ame khavâ ûlâ; ke e wajileufat hnyi hon ban, ke helâ me seûno hnyimakan, ke haba li can me helâ me li hmolom a meic;

² ke e hnyi hnyamen ong tusi adre lau: ke e ame uto köiö ge can a metân, me hot ge can a meny;

³ ke e ame ha hwegiâ helâ me ifucin liona: ke e ame fuc, me ame lung je hendreng a seven.

⁴ Ke hnyi ûen ame lung je hendreng a seven, me oge me he bi ka sihnalimen: me oge me löng hofuc ûnyi hnyi drany, ka habe, Okeceâ ju haten ta je ûnyi a ha je hendreng a seven, ke ca sihnalimen bi.

⁵ Ke haba angela wale oge me wâ ame tot hon köiö me hot, me ame ogöranyâ hnyamen a metân hnyi drany ai,

⁶ me khemanyin ge at ae möt nyiele nyiele balua, waleji a at ame op drany me ta je ûnyi a e hnyin, me hmeledrany me ta je ûnyi a e hnyin, me köiö me ta je ûnyi a e hnyin, ka habe, E ba hmetu ûen:

⁷ ke hnyi ta je bonginy ifucin angela a seveniny, e ka he bi ka tûâ trutru, me ame he ka umo ju ûnyi ae iyong anyin Khong, hoton ûthumetu ae so e ame haimemenâ ka lathnyabainy a ta je perofeta.

⁸ Ke haba hofuc oge me löng ûnyi hnyi drany, me ame ha hmetu könya, ka habe, He thö ka hom tusi adre lau waleji hnyi hnyamen angela ame tot hon köiö me hot.

⁹ Me oge me he thö ka angela me ha kâu, a e ame he ka ham könya ong tusi. Me e ame ka könya ka habe, Hom dö, me an ju; ke ame he ka hiny hnyi hnyekom, ke so bi ame he ka hnebwia hnyi hnyimâm helâ me hani.

¹⁰ Me oge me hom ong tusi ûnyi hnyi hnyamen angela, me an dut; me ame hnebwia hnyi hnyimök helâ me hani: ke oge me hia but an me ame hiny jut hnyi hnyekuk.

¹¹ Me adre me ha könya, ka habe, E ûcû köu he ka perofeta hmetu ge tavat me ta je hnyei me ta je hwen hnyei me ta je than ae se hia.