Heberu 9 - Iaai Bible 1901 (New Caledonia)

¹ E HNATHU, haba ûbihinyköu a bân, me e hu hnyin ta je hanymen hmi, me dok ae kap, a wale hnyi hmeledrany.

² Anyin adre me penapena ke uma menâ, wale at a bân, ke e hu eiö hnyin, taben lamepa, me laulau, me areto hnân omanenâ; adre hwenyi ien e, ka habe, Dok ae Kap.

³ Ke hnyi hoton singiny a loiny hnyeule adre hwenyi ien, ka habe, E ti Kap;

⁴ ke eling taben meic gol, me tangen ûhihi-nyköu adre tube ge gol, ke eû hnyin e kaia gol ae hu mana hnyin, me uci anyi Arona ame vhong, me li taben ûhihinyköu;

⁵ ke e hon e li kerubi ae hmanenang ödru me tot ethö cicö taben ibetengiö; e ca khanʼ öhmun he ka ha wia ta je ûnyi e walang ang.

⁶ Ke a hia but penapena helâe ta je ûnyi e, me ame dit bala thö tavat bihut ka hnyi uma menâ a bân, he ka mâdrâ je huliwa;

⁷ ke haba hnyi uma menâ a loiny, ame hake dit at bihut ae beönua, a okhaca hnyi huna, ame ca he baû bi ke ame hom dra minya, wale e ame hudo hobi kâu bi, me ta je monu minya anyin tavat:

⁸ ke haba Hanu Kap ame omanenâ ûnyi eang a ödra tiga ca omanenâ gethen ka hnyi dok ae kap waleji kʼ ame tiga tot uma menâ a bân;

⁹ wale ûhoûcû hnyi ûen eang; waleji hnyi hnödra hna labö hudo ta je bwihlany me ta je hut, ae ca khana he ka obekhötâ at ame hmi, ge anyin ûnykûm sa,

¹⁰ anyin a hake e thibi (ta je jeû me hnân ic me hna osûâ ae ve bongon), ta je hwakecin unyin, adre otilâ ke ne o but hnyi ûen he ka ohâtâ hmetoâ.

¹¹ Ke ame o but Keriso hnân at bihut ae nua hnyi ta je ûnyi ae so ame he ka o, ûnyi hnyi uma mano ae beönua me bekböt, adre ca mâdrâ ge je hnyam, wale, a ca ûnyi bi eang hmeledrany,

¹² ke ca ûnyi minya bi ge dren ta je got, me nokon kau, ke ûnyi ge hing dren bi, e ame okhaca dit ka hnyi dok ae kap, anyin a hia but ûco möt ame ca ba balua.

¹³ Anyin a ne khana dren ta je got me ta je bolok, me dren nokon kâu a momo adre jijingâ hon tavat ae kong, a ne khana ûnyi eling he ka okabâ ke ne o but ame obosoâ unyin,

¹⁴ awe, e ca beönua bi dren Keriso, waleji a hamen hudo e bi, ae ba hnyikongon, ka Khong, ûnyi ge Hanu a e balua bi, he ka obosoâ anyibun ûnykûm sa hnyi ta je huliwa ae mekiny mʼ öbun e he ka huliwa ka Khong ae mötî

¹⁵ Ke anyin a wale, e thibi at ûsoköu hnyi ûhihinyköu ae teb ûnyi me me he tavat adre hawâ ka kap hna ha bânâ wale jekhoû ame ca ba balua, anyin ae hu mok hnân bi hwaban ta je hna hanyâûâ hmelen ûhihinyköu a bân.

¹⁶ Anyin a ne hu ûbihinyköu, me ame he ka hu minya mok at ame ha ûbihinyköu, me me hwâdâ bi.

¹⁷ Anyin ame he ka hwâdâ ûhihinyköu hwaban mok: hawa, e ûnyi hnathu e ka tiga möt at ame ânyâ?

¹⁸ Anyin a wale adre me ca ohmâ ûhihinyköu a bân, e ka ba dra hnyin.

¹⁹ Anyin a hia but Mose ha ka tavat hia ta je ûnyi hia adre me hûna hoton hnanyibu, me e ame hom dren je nokon kau, me got, tha e me köiö, me leûnen mamoe ae dra, me hisop, me e ame dukâiâ tusi me tavat hia thithö,

²⁰ me ha, ka habe, Walang dren ûhihinyköu, waleji a hûna köbun hnen Khong.

²¹ Ke e ame dukâiâ ge dra uma menâ me ta je omjehen huliwa hia.

²² Ke wakhalet thiju ta je ûnyi adre me ca obosoâ ge dra hnyi hnanyibu, ke ba minya hna thang ut hulo e ka ca hingölö dra.

²³ Anyin a wale e ûcû he ka obosoâ je tulutiny ta je ûnyi hnyi drany hnen ta je ûnyi e; ke ûcû he ka obosoâ ta je ûnyi hnyi drany hnen ta je hut ae beönua hon e.

²⁴ Anyin ame ca dit Keriso ka hnyi dok ae kap adre me ânyâ ge je hnyam, wale tulutiny ûnyi ae hnathu; ke so bi ka hnyi hing drany he ka manen walang ang hnyi hnyimakan Khong hnân hobi köta:

²⁵ ke ca hamen he ka osehia hudo e; helâ me at bihut ae nua ame dit ka hnyi dok ae kap hnyi ke huna me ke huna, me ke dra a ca dren;

²⁶ anyin a ne helâe me ûcû kâu he ka osehia vec hwân hnyi hna bi taben hmeledrany: ke walang ang hnyi obiny ta je dö adre hia but omanenâ e me me he ka ohia hulo ge hnen hna hamen hudo e bi.

²⁷ Adre me ip ka tavat he ka okhaca mok, ke hwaban e ûhnei;

²⁸ helâe minya Keriso, adre me okhaca hudo e he ka vadren ta je hulo anyin tavat ae se hia, me e ame he ka olo manen ka tavat adre me halubahingen e, ke ca ha bi ge hulö, ke hnân omelö.