Heberu 6 - Iaai Bible 1901 (New Caledonia)

¹ ANYIN a wale, e so ate me umo hâiâ hna ûne a bân ge bongon Keriso, mʼ ate me he bi ka hnyi bongon ae bekhöt; ke ca he hmetu bi ka ip taben ietra hnyi ta je huliwa ae mok, ke labageju ka Khong,

² ke bongon bapataiso, ke hna ip hnyam, me möt hmetu ûnyi hnyi hna mok, me hna owisa nyiele balua.

³ Ke ate me he ka ânyâ e, e ka weny Khong.

⁴ Ke haba tavat adre bân ka omelamâ, waleji adre me drem cubecâ bwihlany ûnyi hnyi drany, me hnyi kap Hanu Kap,

⁵ me drem cubecâ hofuc ae so anyin Khong, me je maniny dö ame he ka o,

⁶ ke adre me kolu hmetu, me pason hmetu he ka ohâti ödra ka hnyi ietra; anyin adre me osatauroâ hmetu bi kodra Nokon Khong, me ohmehma manenâ e.

⁷ Anyin a haba kânâ, me ame ijem we ame laba ta ka hnyin, kʼ ame okûâ jeû ae ûcû kodra adre me belökâ e, me hu but gan hnahic ûnyi ge Khong:

⁸ ke ame ne okûâ ûö ae ûdedö, me watetaföcö, me adre me degec; ke hakekeny jut ka hnyi hnaûhango; ke haba hnyi obiny, adre me he ka thong degecâ e.

⁹ Ke hnyat a oûnykûmik lö, öhmun e ûnykûme gabun ta je ûnyi ae so hon e, me ta je ûnyi ae hu möt hnyin, ke so bi öhmun e fuc helâe:

¹⁰ anyin a ca hwakecin ae ca wisa Khong, me me he ka hnying anyibun huliwa, me ibetengiö öbun e omanenâ ka hnyi ien, wale hnyi hnobun hna bi athnyabainy wakap, me labö bi athnyabaidra.

¹¹ Ke e wehmun mʼ öbun e he ka ve omanenâ tang hwege eling ka hnyi gejon ae gan hmâ ke ne o but obiny:

¹² mʼ öbun e ca he ka tavat laba baû, ke so bi he ka hnu hotudra ae hu gadra ta je hna ha bânâ.

¹³ Ke hnyi ûen Khong ame ha bânâ kö Aberahama, me e ame ka khemanyin gan bi, anyin ae ca khana he ka khemanyin ge ke at ae nua hon e bi,

¹⁴ haingen, ka habe, E hnathu oge me he ka ti ohnahici u, me ti osehia je mâtrânâm.

¹⁵ Ke hwaban hnen hna hok hnyok me ame hu gan hna ha bânâ.

¹⁶ Anyin a hwakecin tavat he ka khemanyin ge at ae gan: ke haba ûhihi-nyköu me wale obiny hnân ohnatho hnyi anyidra ta je iwatretra hia thithö.

¹⁷ Waleling me me weny Khong he ka ti omanenâ ka ta je mâtrâniny hna ha bânâ, anyin musi a gʼ ame ca wia, me e ame bi hanen ju ge khemanyin:

¹⁸ mʼ ate me he ka hu hnâu sihwegi öta, ge lo li ûnyi ae ca khana he ka wia, ke ca khana Khong he ka thoi hnyin, wale öta ate me kec ut he ka kât hmâ gejon adre ip hnyi hnyi-maköta;

¹⁹ wale gejon ate me hu, helâ me iuniny hanu, ame hnathu me hmâ ke ame dit eiö hnyin hnyeule adre bi singiny;

²⁰ waleji ame didro kâu Iesu at a bân hobi köta, anyin adre me wia e me me at bihut ae nua nyiele balua helâ me bongu Melekisedek.