Heberu 4 - Iaai Bible 1901 (New Caledonia)

¹ ANYIN a wale e hu but gata hna ha bânâ he ka dit ka hnyi hnen hna menâ, me so ate me he ka ot, wâ e nye ca ûcû bi keihen gabun.

² Anyin adre hia but khetâ köta je ûthumetu ae so helâ mʼ ödra: ke ba troban kodra hofuc adre me löng, anyin adre me ca ûhûjâköu ödra hnen labageju me tavat adre me löng.

³ Ke haba öta tavat ate me labageju, me ate me dit ka hnyi hna menâ; helâ me hnen hna ha, ka habe, Helâji me hnok hna khemanyik hnyi anyik hmonyin, Me adre me ca he ka dit ka hnyi hnok hna menâ: ke so bi a um dö ta je huliwa hwân hnyi hna bi taben hmeledrany.

⁴ Anyin a e ame ha hnyi ke hofuc, ame ha ge bong a seveniny, ka habe, Ame menâ Khong hnyi bong a seveniny hwaban anyin ta je huliwa;

⁵ ke wale hmetu ang, ka habe, Adre me ca he ka dit ka hnyi hnok hna menâ.

⁶ Anyin a wale, adre ip bala bi a gʼ ame he keihen ka dit ka hnyin, ke haba hnyat adre bödra ka khetâ ûthumetu ae so kodra adre me ca dit can anyidra ca labageju,

⁷ me e ame thu ke bong, kʼ ame ha a deny Davita, hwaban ta je huna ae se, ka habe, Hnyi bong ang, helâ me hna ha ehac, ka habe, Hnyi bong ang, öbun ka he ka löng ifucin, Ca onâkâ bi je hnyekubun.

⁸ Anyin a ne hia but omenʼ ödra Josua, me, ame ne ca he hmetu bi Khong ka ha; ke bong.

⁹ Anyin a wale adre ip bala bi hna menâ helâ me sabath hobi kâu laten Khong.

¹⁰ Anyin a haba at ame hia but dit ka hnyi anyin hna menâ, me e ame hia but menâ minya hwaban anyin ta je huliwa, helâ me Khong hwaban anyin ta je huliwa.

¹¹ Anyin a wale e so ate me hwege he ka dit ka hnyi hna menâ eling, wâ e nye û but ke at e ka he ka ûcûcubongo ca ûling eling.

¹² Anyin ae möt hofuc hwan Khong, me hwege huliwa, me so hwan hon hele vat a lo homakan, ame dâ me subâ luâ but hnyok me hanu, me hna hûjö je jeien unyin me onyen jeien, ke ame ie wâ cicöâ ta je ûnykûme me ta je weny hnyok.

¹³ Ke ca iyong bi ke unyi adre op hnyi hnyimakan: ke ame ve he thu me manen wia but ta je ûnyi hia thithö ka hnyi li emakan at, wale ate me he ka ve omanenâ kâu hwakecita.

¹⁴ Ke hu but gata hing at bihut ae nua, at ame hia but vheno drany ethö, wale Iesu a Nokon Khong, anyin a wale e so ate me kât hmâ anyita hmi.

¹⁵ Anyin ae ca hu bi gata at bihut ae nua at ame ca hnyi vec hnyi anyita ta je sënyin; ke so bi at adre hia but cubec ge ta je ûnyi hia thithö helâ möta, ke ba bi anyin hulo.

¹⁶ Anyin a wale e so ate me he ka hwege ûhakekenyâ theroniny ibetengiö baû, mʼ ate me he ka kap ibetengiö, me wâ ibetengiö baû hnân he ka hadruʼ öta hnyi ûen ae ûcû.