Heberu 3 - Iaai Bible 1901 (New Caledonia)

¹ ANYIN a wale hnyat me lakeiny ae kap lö, hanen tavat adre me hawâ ûnyi hnyi drany, ûnykûme ju Aposetolo me At bihut ae nua hnyi anyita hmi, a Iesu;

² waleji ame hnathu ka at a otilâ e, helâ me Mose minya hnyi hnyaban hia thithö.

³ Anyin adre hâiâ e, a e ûcû he ka ogânâ e hu Mose, helâ me at ame otilâ uma, ae hu hna haisoâ at e, hon uma.

⁴ Anyin ae hu tavat adre me otilâ ta je uma hia; ke Khong at ame op ta je ûnyi hia thithö.

⁵ Ke e hnathu hmonyin Mose hnyi hnyaban hia, helâ me athnyaba, hnân ohnathoâ ta je ûnyi adre me he ka ha nyiele;

⁶ ke so bi Keriso ame musi hnyi hnyaban, helâ me nokon; ke haba öta bi hnyaban eling, öta ka he ka kât hmâ ke ne o but obiny tang hwege me senyin hnyi geju.

⁷ Anyin a wale helâ me hna ha hnen Hanu Kap, ka habe, Hnyi bong ang, öbun ka he ka löng ifucin,

⁸ Ca onâkâ bi je hnyekubun, helâji me hnyi hna ohmönyinâ, Waleji hnyi bonginy ûcûbic hnyi hnyebuba,

⁹ Adre cubic nya lakamöbun hnyin, me elâm bonguk, Me wâ anyik ta je huliwa hnyi ta je huna a fâte.

¹⁰ Anyin a wale e hmak hnyekuk ge dö eling, Haingök, ka habe, Odra monu bala eû i hnyi hnyok: Ke ca khanʼ ödra dek ta je gethen;

¹¹ Me oge me khemanyik waleji hnyi anyik hmonyin, ka habe, Adre me ca he ka dit ka hnyi hnok hna menâ.

¹² Öbun âu hnyat me lakeiny lö, wâ e nye hu eû hnyin ke at gabun hnyok ae kong me ca labageju, ame oûsâkâûʼ öbun me Khong ae möt:

¹³ ke ûsihwegi öbun köu ju hnyi ke bong me ke bong, kʼ adre tiga ha bi, ka habe, Hnyi bong ang; wâ e nye okhötâ hnyekon keihen gabun ge tang iya-wöiny hulo:

¹⁴ anyin adre me wiʼ öta mʼ ate me lahanen Keriso, öta ka he ka kât hmâ hwakecin anyita labageju hnyi can ke ne o but hnyi obiny:

¹⁵ kʼ adre tiga ha, ka habe, Hnyi bong ang, öbun ka he ka löng ifucin, Me ca onâkâ je hnyekubun, helâji me hnyi hna ohmönyinâ.

¹⁶ Anyin a ia ödra, waleji adre me hnyi löng, me ohmönyinâ e hawa, ca ödra hia waleji Mose ame hom ûhedra Aigupito?

¹⁷ Ke ie tavat ame hmak hnyekon kodra hnyi je huna a fâte? hawa, ca ödra tavat adre me ânyâ hulo, waleji a kolu but je unyidra eû hnyi hnyebuba?

¹⁸ Kʼ ame khemanyin ko ia, a gʼ adre me ca he ka dit ka hnyi hnen hna menâ, hawa, ca kodra a hnyat adre me ca ûling?

¹⁹ Me ate me wâ but a ga ca khanʼ ödra he ka dit ka hnyin, anyin adre me ca labageju.