Heberu 2 - Iaai Bible 1901 (New Caledonia)

¹ ANYIN a wale, e ûcû köta he ka oûnyihnatho hmonyinâ ta je ûnyi waleji adre löng, wâ e nye haûhaû but gata.

² Anyin a ne hmâ but hofuc adre ha a deny ta je angela, ke adre bi hwaban, e me ûcû ka tayat adre me hanyâûâ hnanyibu, me ca ûling;

³ ate me he ka kâmâu ka kec möt ut, öta ka ca oûnyihnatho möt ae nua helâe? waleji a bân Than ka ha, me ame ohnatho köta hnen tavat adre hnyi löng;

⁴ ke ame munyi ohnatho mʼ ödra Khong ge ta je haten, me ta je ûöman, me ta je huliwa ae man ae ve bongon, me ta je bwihlany anyin Hanu Kap, helâ me weny.

⁵ Anyin a e ame ca ham ka ta je angela he ka muso hmeledrany ame he ka o nyiele, wale öhmun e ha gan.

⁶ Ke ame hia but, ohnatho hnyi ke hofuc hnen ke at, ka habe, Ehö at, me u me he ka ûnykûme kâu? Ke nokon at, mʼ u me he ka senâ e?

⁷ U je wia e me omi ûhnyûkong hmelen ta je angela; U je obicâ e ge hmanenang me hna ogânâ, Ke u je otilâ e hon ta je huliwa anyin li hnyamâm:

⁸ U je ip ta je ûnyi hia thithö hnyi hmelen li can. Anyin a haba hnyi hnen hna ip eû hnyi hmelen ta je ûnyi hia, me ba biju ke ûnyi adre me ca ip hnyi hmelen. Ke walang ang, öta tiga ca wâ ta je ûnyi hia eû hnyi hmelen.

⁹ Ke ate me ō Iesu, at adre hia but wia e me omi ûhnyûkong hmelen ta je angela, kʼ adre me obicâ ge hmanenang me hna ogânâ, anyin a e ame hom vecin mok, me me vheno mok hobi kâu tavat hia thithö hnen ibetengiö bâu anyin Khong.

¹⁰ Anyin ae ûcû kâu, wale at a hobi kâu ta je ûnyi hia, ke ûnyi gan ta je ûnyi hia, hnyi hnen hna hom lakon a ödra se hia ka hnyi hmanenang, e ûcû kâu he ka obekhotâ tuhan anyidra möt hnen ta je vec.

¹¹ Anyin a haba at ame okabâ, mʼ ödra hia minya adre okabi ödra, me ûnyi ge at a khaca, anyin a wale, e ca hmehma he ka hai ödra, me liamekein,

¹² ame ha, ka, habe, Oge me he ka omanenâ iâm ka je liamekeiny mönya, Oge me he ka khumöng olungi u hnyi wanben ekalesia.

¹³ Wale hmetu ang, ka habe, Oge me be ka labageju kâu. Ke walang khaca, ka habe, Ō nya bi ang me lakon a ham könya Khong.

¹⁴ Ke haba lakon, me adre me khaûʼ ödra ge viny me dren, awe, helâe minya e ame munyi helâe; me me he ka ohia hnen mok at ae tren maniny mok, wale diabolo;

¹⁵ me thong ödra but a tavat adre me hom ûhnyûkongu ödra hnen outen mok hnyi bongudra ta je bong hia thitbö.

¹⁶ Anyin ae hnathu e ame ca hadruâ ta je angela, kʼ ame hadruâ ta je mâtrâni Aberahama.

¹⁷ Wale me ka hamen e he ka wia e hēlâ me je liamekeiny më hnyi ta je ûnyi hia thithö, me me he ka at bihut ae nua ae betenge me hnathu hnyi ta je ûnyi anyin Khong, me me he ka hut bi, hnân ohia ta je hulo anyin tavat.

¹⁸ E ûcû kâu he ka hadru ödra adre cubic ödra, anyin a e ame hom vec hnyi hna cubec.