Heberu 10 - Iaai Bible 1901 (New Caledonia)

¹ ANYIN a haba hnanyibu, a hmenon ta je ûnyi ae so ame he ka o, ke ca; tha ûcû me ta je ûnyi eling, me pason bala he ka obekhötâ tavat adre me ûhakekenyi hnen ta je hut adre me hudo huyi je huna, wale adre me labö hudo.

² Anyin a ne helâe, hawa, adre me ca he bi ka oumo ka hudo, anyin a adre ne okhaca obosoâ tavat adre me hmi, me adre me ca he hmetu bi ka hmak hnyok can hulo?

³ Ke haba hnyi je hut eling me adre me labö ha hmetoâ ta je hulo hnyi ke huna me ke huna.

⁴ Anyin e pason he ka ohia ta je hulo ge dren ta je bolok me got.

⁵ Anyin a wale, e ame ha hnyi ûen e ame o eang hmeledrany, ka habe, E ca wem bi hut adre me hlingâ me hut, Ke u je penapena unyin hobi könya;

⁶ U me ca senyinâ je hut adre le ae bekhöt me ta je hut can hulo:

⁷ Me oge me ha, ka habe, Khong lö, wâ bi oge o but (adre me sihnalimiʼ nya hnyi tusi adre vhec) He ka ânyâ wem.

⁸ Haingen ethö, ka habe, Ta je hut adre hlingâ, me ta je hut, me ta je hut adre me le ae bekhöt, me ta je hut can hulo, u me ca wem, ke u me ca senyin ka hnyin (wale adre me hudo hoton hnanyibu),

⁹ kʼ ame ha minya, ka habe, Wâ ju, inya oge me o but he ka ânyâ wem. E ame ohia at a bân, me me he ka otethmâ at a loiny.

¹⁰ Ke adre we okabi öta hnen weny eling, hnyi hna okhaca hudo unyi Iesu Keriso.

¹¹ Ke haba tavat bihut hia, me adre me tot hnyi je bong balua me bi athnyaba, me hudo bala je hut a khaca ien, wale a ca khana he ka ohia hulo:

¹² ke haba e, hwaban hnen hna hudo hut a khaca can ta je hulo nyiele balua, me e ame laba ju hnyi ke keihen metân Khong;

¹³ ke hwân eling e ame lubahingen bala ke ne o but adre me wia ta je iwahnaihmiony më me taben li hnyeûcan.

¹⁴ Anyin a hnen hut a khaca e ame hia but obekhöta nyiele balua tavat adre okabi ödra.

¹⁵ Ke ame ohnathoâ minya köta Hanu Kap: anyin a hwaban hnen hna ha, ka habe,

¹⁶ Walang ûhihinykön oge me he ka ânyâ mʼ ödra Hwaban ta je bong e, haingen Than; Ka habe, Oge me he ka ip anyik ta je hnanyibu hnyi je hnyekudra, Ke oge me he ka sihnalimen e minya hnyi je ûnykûmenödra; waleling me me ha, ka habe

¹⁷ Ke haba anyidra je hulo me hnödra hna hanyâûâ, me oge me ca he hmetu ka ûnykûme.

¹⁸ Ke a ne ohia e, me ba hmetu but hut can hulo.

¹⁹ Anyin a wale, hnyat me lakeiny lö, e hu but gata hnyok ae hwege he ka dit ka hnyi dok ae kap ûnyi ge dro Iesu,

²⁰ hnyi gethen e ame okabâ hobi köta, a gethen ae teb ûnyi me möt, a deny singiny, a wale unyin;

²¹ ke hu at bihut ae beönua ame muso hnyaban Khong;

²² e so ate me hakekenyâ ge hnyok ae hnathu ame kât hmâ labageju, ke je hnyekuta adre dukâiâ ûnyi hnyi ûnykûm sa ae kong, ke adre hneû je unyita hnyi köiö ae alai:

²³ e so ate me kât hmâ hmi ate me gejon me ca loloâ bi; anyin ae hnathu bi at ame ha bânâ:

²⁴ ke so ate me ûnykûmeköuâ, me me he ka kû ibetengiö me ta je huliwa ae so;

²⁵ me ca he ka degec anyita ûkhacaköu, helâ me hwakecin keihen, ke so he ka ûsihwegeköu; ke hwege ju helâe, öbun ka wâ bong ae hakekeny jut.

²⁶ Anyin ate ne ânyâ hulo ge weta, öta ka hia but wâ ûnykûme hnathu, me ba hmetu bihut can ta je hulo,

²⁷ ke so bi he ka halubahingen me ot ae gan hmâ, ge hna he ka ûhnö, me wathethot ame ubâhlâ, wale ame he ka an ohia je iwahnaihmiony.

²⁸ Haba at ame hûkotiâ hnanyibu anyi Mose, me a mok ut hnyi hna ohnathoâ hnen li at a lo ame ne kun, kʼ adre ca betenge gan:

²⁹ hawa, öbun e ûnykûme ae ca ûcû bi hwaban ae gan hmâ hon e ka at ame uto hnyikânâi Nokon Khong, me ûnykûme a ûnyi ae ca kap dren ûhihinyköu hnân okabâ e, me okongoâ Hanon ibetengiö baû?

³⁰ Anyin ae khanʼ öta but at ame ha, ka habe, Hamök he ka bi hwaban, ke oge me he ka oûco. Ke wale hmetu ang, Ame he Than ka hnö lakeiny.

³¹ Hnân outen hmonyin he ka ta ka hnyi li hnyamen Khong ae möt.

³² Ke ûnykûme thʼ öbun je bong eji a bân, wale hwaban hna omelami öbun, mʼ öbun e hokhnyokâ ju vat ae gan hmâ a ta je vec;

³³ walang khaca, ka habe, Adre me wiʼ öbun mʼ öbun e hnân hamâ, can je haikongoâ me ta je vec; ke walang khaca, a öbun e tha e mʼ ödra waleji adre me okongoâ helâe.

³⁴ Anyin a öbun e vec betenge ka tavat adre me ca, ke öbun e hokhnyok senyinâ hnödra hna söh anyibun ta je ûnyi, ke khanʼ öbun a gʼ ame hu gabun tang omjeû ae ûnyi hnathu, kʼ ame tethmâ bi.

³⁵ Anyin a wale, ca degec bi tang hwegi öbun, wale ae hu hwaban ae gan hmâ hnyin.

³⁶ Anyin ae ûnyi hnathu köbun he ka hokhnyok, me me hu gabun hna ha bânâ, öbun ka hia but ânyâ weny Khong.

³⁷ Anyin ae okhulit biju ûen Me ame he ka o but at, wale at ame he ka o, kʼ ame ca he ka bec.

³⁸ Ke ame he ka möt atök ae wisa hnen labageju: Ke ame ne hmetuhmetu but, me ame ca he bi hnyekuk ka senyin kâu.

³⁹ Ke haba öta, me ca lahanödra hnyat adre me hmetuhmetu ka hnyi hnaûhango; ke lahanödra bi hnyat adre me labageju ke ne o but hnyi melen hanu.