Heberu 1 - Iaai Bible 1901 (New Caledonia)

¹ HABA Khong, at ame ha adrem ka lakamöta a deny ta je perofeta hnyi je hofuc ae ve bongon, ke je deny ae ve bongon,

² me ame ha köta hnyi je bong ang a biliny a deny Nokon, at e ame wia me atö, me me he ka hu gan ta je unyi hia thithö, kʼ ame op ta je dö hia ûnyi gan;

³ ke e thibi hadröngöcin anyin hmanenang ke at a ti we e, kʼ ame otilâ hmâ ta je ûnyi bia thithö ge hwan hofuc ae man, ke a hia but hneû degecâ ta je hulo, me e ame laba ju hnyi ke keihen a metân Beönua ethö;

⁴ ke adre me onua e hon ta je angela, anyin ae hu gan ien ae nua hudrin.

⁵ Anyin a ie ke angela e ame ha kâu, ka habe, U thibi Nokuk Oge me hnöku u hnyi bong ang? Wale hmetu ang, ka habe, Oge me he bi ka Kamen, Ke e ame he bi ka Nokuk?

⁶ Ke wale hmetu ang hnyi ûen e ame oâ nokon a bân ka hnyi hmeledrany, me e ame ha, ka habe, E so ame he ka khudrung kâu ta je angela hia anyin Khong.

⁷ Ke e ame ha ge ta je angela, ka habe, E ame wia anyin ta je angela helâ me ta je hanu, Ke lathnyabainy helâ me bâhlân meic:

⁸ ke e ame hâiâ Nokon, ka habe, Haba ânyâm theron, Khong lö, me nyiele nyiele balua; Ke haba uciny hwakecin ae hnathu, me wale thibi e uciny dokhom dokhu.

⁹ U je hia but hnyokâ hwakecin ae wisa, me hociâ hwakecin ae kong; Anyin a wale a hia but hû u hnen Khong, a Khongom, Ge wakacoiny senyin hon ta je lahanâm.

¹⁰ Ke haba khaca, Than lö, u je hia but bi taben hmeledrany hnyi can, Ke haba je drany, me huliwa ling anyin li hnyamâm:

¹¹ Ame he ka hia bi; ke u me he bala bi u ka tethmâ: Kʼ ame he ta je ûnyi hia e ka bobot helâ me ûkhaû;

¹² Ke u me he ka vhec ta je ûnyi e helâ me ûkhaû beû, Ke helâ me ûkhaû, me me ke bongon bi: Ke ka u bala bi u, Ke ba obiny ta je hunaiâm.

¹³ Ke ie angela e ame ha gan hnyi je ûen hia, ka habe, Laba ju hnyi ke keihen a metök, Ke ne o but oge me he ka wia ta je iwahnaihmiony möu me hnân taben li cam?

¹⁴ Hawa, ca je hanu adre bi athnyaba ödra hia, kʼ adre kunʼ ödra he ka bi athnyaba hobi kodra adre me he ka hu möt bi?