Hagai 2 - Iaai Bible 1901 (New Caledonia)

¹ HABA hnyi tehi a seven, hnyi bong a twente waniny tehi, me ame o but hofuc ho Iehova a deny Hagai perofeta ame ha, ka habe,

² Ha thö walang ang kö Zerubabela nöku Sealetiela gavenainy Juda, ke Josua nöku Jozadaka at bihut ae nua, ke kolon tavat, ka habe,

³ Ia gabun a kolon at a wâ uma eang hnyi hmanenanginy a bân? ke hawa ge hnobun hna, wâ walang ang? hawa ca helâ me thatûnyi hnyi je hnyimaköbun?

⁴ Ke walang ang, Zerubabela lö, hwege thö, haingö Iehova; ke hwege thö u Josua nöku Jozadaka at bihut ae nua; ke hwege thʼ öbun tavat hia aten hnyei, haingö Iehova, ke huliwa thö: anyin a tha inya but möbun haingö Iehova tuhan sabaoth,

⁵ hoton hofuc oge me ûhi-hinyköuâ mʼ öbun hnyi ûen öbun e he but ûhebun Aigupito, kʼ ame laba hanuk unyibun: ca ot bi öbun.

⁶ Anyin a walang hna ha hnö Iehova tuhan sabaoth, ka habe, Okhaca biju, ke ca bec bi, me oge me he bi nya ka jijingâ drany ke hmeledrany, ke köiö ke kânâ;

⁷ ke oge me he ka jijingâ ta je hneyi hia, ke ame he ka o ta je ûnyi wale ame weny ta je hnyei hia, ke oge me he ka öunöngötâ uma eang ge hmanenang, haingö Iehova tuhan sabaoth.

⁸ Haba sileva, me anyik, ke anyik gol, haingö Iehova tuhan sabaoth.

⁹ Ame he bi ka gan hmâ hmanenanginy uma eang a biliny hon uma a bân, haingö Iehova tuhan sabaoth: ke oge me he ka ham ûsoköu hnyi dok ang haingö Iehova tuhan sabaoth.

¹⁰ Hnyi bong a twente foainy tehi a nain hnyi huna a loi Dariu, ame o but hofuc ho Iehova a deny Hagai perofeta, ame ha, ka habe,

¹¹ Walang hna ha hnö Iehova tuhan sabaoth, ka habe, Hnö thö walang ang tavat bihut hnyi hnanyibu, ka habe,

¹² A ne ke at ame hom uthmeno ae kap hnyi baten khaûen, ke ame ne he khaûen ka kâlâ areto, ame ne öt jeû, ame ne waina, ame ne wakaco, ame ne ke jeû, hawa ame he ka kap? Ke haingen tavat bihut, ka habe, E ba.

¹³ Haba Hagai ame ha, ka habe, A ne ke at ame bo kong ge ûnyi ae mok ame kâlâ khaca hnyi ta je ûnyi eling, hawa, ame he ka bo kong? Ke haingen tavat bihut, ka habe, E bo kong ut.

¹⁴ Haba Hagai ame thu me ha, ka habe, Helâe tavat ang, ke helâe hnyei ang hnyi hnyimakök haingö Iehova; ke helâe ta je huliwa hia anyin je hnyamödra; ke haba ûnyi adre me hudo eling me e bo kong ut.

¹⁵ Ke walang ang, ö öbun ûnykûme ju hwân hnyi bong ang ke ne o but ehac, hnyi ûen a ödra tiga ca hia but ip ke veto hon ke veto hnyi uma umo Iehova:

¹⁶ hwân hnyi je bong hia eling, ame ne o at ka hnyi hna khon hwit a twente je tulut, me ame ten biju; ame ne he ke at ka hnyi tangen waina he ka sâû fifte je tulut, me ame twente biju.

¹⁷ Oge me kuc öbun ge meleca me om, me we wahma hnyi ta je huliwa hia anyin je hnyamöbun; ke so bi öbun e ca hwio könya haingö Iehova.

¹⁸ Ö öbun ûnykûme ju, hwân hnyi bong ang ke ne o but ehac, hwân hnyi bong a twente foainy tehi a naininy, hwân hnyi hna bi taben uma umö Iehova, ûnykûme ju.

¹⁹ Hawa e hu hatong hnyi omhani? eke, ame ca wa bi ivine, me imeta, me rimona, me elaio; hwân hnyi bong ang oge me he ka ohnahici öbun.

²⁰ Ke ame olo o hofuc ho Iehova kö Hagai hnyi bong a twente foainy tehi, ame ha, ka habe,

²¹ Ha thö kö Zerubabela gavenainy Juda, ka habe, Oge me he ka jijingâ drany me hmeledrany:

²² ke oge me he ka ohnyimenâ hnyikânâi je theroniny je dökhu, me ohia tang hwegien je dökhuiny je hnyei; ke oge me he ka ohnyimenâ hnyikânâi je kariota me tavat adre me tabâ, ke ame he ka ta je hors me tavat adre me tabâ, ge hele vat anyin je liamekeiny mödra.

²³ Hnyi bong eling, haingö Iehova tuhan sabaoth, oge me he ka hum u Zerubabela, nöku Sealetiela, athnyabaik, haingö Iehova, me wiö u helâ me ûnyi hnân ohmâ haten: anyin oge hia but ûcö u, haingö Iehova tuhan sabaoth.