Genese 9 - Iaai Bible 1901 (New Caledonia)

¹ KE Khong ame hahnahici Noa, me je lakon, me ha ködrin ka habe, Si but, me dudu but, me dedo hmeledrany.

² Kʼ ame he ka ot gabun me hiny gabun ta je meno hia eang hmeledrany, me je meno ame gâ ethö, me ta je ûnyi hia adre iyâûâ monoâ kânâ, me ta je wâ hia eû hnyi köiö, adre hnʼ ödra but ka hnyi hnyamöbun.

³ Haba ta je ûnyi hia ame bwebwet ae möt ame he ka hnân ö ʼbun; oge hia but ham köbun hia helâji me ta je ûö ae ometu ae hat.

⁴ Ke öbun e ca he ka tha an utiö me melen, wale ûnyi a dren.

⁵ E hnathu oge me he ka bi hwaban dröbun, wale anyibun möt; oge me he ka bi hwaban e ka ta je meno hia: me tavat minya, oge me he ka bi hwaban melen at ka liamekeiny më.

⁶ Haba at ame hingâlâ dren ke at, me ame he bi ka hingâlâ dren hnen ke at: anyin adre op at e me we Khong.

⁷ Ke haba öbun, si but, me dudu but; hnokoâ gânâ eang hmelen, me dedo hnyin.

⁸ Ke Khong ame ha kö Noa me je lakon unyin, ka habe,

⁹ Wâ bi, inya oge me otilâ anyik ûhihinyköu möbun, me je mâtrân hwaböbun,

¹⁰ me ta je ûnyi hia ae möt unyibun, a je meno ame gâ, me je meno a vak can, me je menoiny hnyot hia unyibun eang hmeledrany; a ta je meno hia ʼa didrut ûhedra hnyin aka, wale ta je meno hia eang hmeledrany.

¹¹ Ke oge me he ka otilâ anyik ûhihinyköu möbun; ke adre me ca he hmetu ka subâ degecâ ta je ûnyi hia ae möt ge köien uoû; ke haba khaca ame ca he hmetu uoû ka ohia hmeledrany.

¹² Ke Khong ame ha, ka habe, Walang haten anyik ûhihinyköu möbun, me ta je meno ae möt hia unyibun, ke ne o but hnyi ta je dö nyiele balua:

¹³ ka habe, Oge me ip anyik wajeleufat hnyi ûlâ, me hnân haten anyik ûhihinyköu me hmeledrany.

¹⁴ Ke inyʼ ka he ka hom ke ûlâ ka hnyi hon hmeledrany, me, ame he ka manen wajeleufat hnyi ûlâ,

¹⁵ me oge me he ka ûnykûme anyik ûhihinyköu, wale möbun, me ta je ûnyi hia ae möt ae ve bongon; ke haba köio ame ca he hmetu ka uoû me ohia je ûnyi hia ae möt.

¹⁶ Ke ame he ka e wajeleufat hnyi ûlâ; ke oge me he ka wâ e, me ûnykûme ûhihinyköu anyin Khong ame ca ba balua, me ta je ûnyi ae möt ae ve bongon eang hmeledrany.

¹⁷ Ke Khong ame ha kö Noa, ka habe, Wale haten ûhihinyköu oge hia but otilâ me ta je ûnyi hia ae möt eang hmelen.

¹⁸ Ke walang je laku Noa ödrin e didrut ûhedrin hnyin aka, jia Sema, me Hama, me Jafeta: haba Hama me kamö Kanana.

¹⁹ Haba ödrin kun ta laku Noa: ke ûnyi gadrin bi adre khavâ hmeledrany hia hnen at.

²⁰ Ke Noa ame hwân ka belök, me e ame ta hnyei vine:

²¹ ke e ame ijem waina, me monu but; ke e ame mokut thu eiö hnyin umen uma mano.

²² Ke haba Hama a kamö Kanana ame wâ kamen ame mokut thu, me thumeto li liamekeiny më eû hnyöu.

²³ Ke haba Sema me Jafeta ödru me hom ûkhaû, me lau hon li abenyidru, me he nulötudru, me okhâûâ kamödru ame mokut thu; ke ödru me hnyi-maködru eû, mʼ ödru me ca wâ kamödru ame mokut thu.

²⁴ Ke a hmak dö Noa hwaban hna ic waina, me khana hna ânyâ kâu hnen nokon a wakeiat.

²⁵ Ke e ame ha, ka habe, E ka mok Kanana; E ame he ka bi athnyabainy lathnya-bainy je liamekeiny më.

²⁶ Ke e ame ha, ka habe, Haisoi Iehova, Khongu Sema; Me hamö Kanana ka bi athnyabainy.

²⁷ E so Khong ame olawö Jafeta Me me he ka laba hnyi ta je uma mano umö Sema. Kʼ ame he Kanana ka bi athnyabainy.

²⁸ Ke haba möt anyi Noa hwaban uoû, me, kun ta haded ke fifte ta je huna.

²⁹ Ke haba ta je bong hia bongu Noa, me, nain haded ke fifte ta je huna: ke ame mokcu.