Genese 7 - Iaai Bible 1901 (New Caledonia)

¹ HABA Iehova ame ha kö Noa, ka habe, Aiö u me ânyâm lap hia ka hnyin aka; anyin a oge hia but wâ a u wisa hnyi hnyimakök hnyi dö ang.

² U ma he bi ka hom unyâm, ûnyi hnyi ta je meno a vak cadra ae bo so ûsa seven, baga me momo; ke ûnyi hnyi ta je meno a vak cadra ae ca bo so, ûsa lo, baga me momo;

³ ke ûnyi hnyi ta je meno ame gâ ethö ûsa seven, baga me momo: me me hu mâtrân eang hmeledrany hia thithö.

⁴ Anyin a seven biju ta je bong me oge me he ka ota we ka hnyi hmeledrany hnyi fâte ta je lany ke fâte ta je lit; ke oge me he ka ohia eang hmeledrany ta je ûnyi hia ae möt waleji oge hia but op.

⁵ Haba Noa ame ânyâ helâ me hna hûna hnö Iehova kâu.

⁶ Ke siks haded ta je hunai Noa, ke e but uoû eang hmelen.

⁷ Me ame tha didrö Noa ka hnyin aka, me lakon, me âiân, me lâiân je lakon, can köiö ame uoû.

⁸ Haba ta je meno a vak can ae bo so, me je meno a ca bo so, me ta je meno ame gâ, me ta je ûnyi hia thithö adre me iyâûâ kânâ,

⁹ adre me dit ûsa lo ka hnyin aka kö Noa, baga me momo, helâ me hnen Khong hna hûna kö Noa.

¹⁰ Ke hwaban je bong a seven, ame o but uoû eang hmeledrany.

¹¹ Haba hnyi huna a siks hadediny möt anyi Noa, hnyi tehi a loiny, hnyi bong a seventininy tehi, haba hnyi bong eling ame patrutrua thö ta je pupuainy köiö ae gan hmâ, kʼ adre khong ut je mamalamainy drany.

¹² Kʼ ame ta we balua eang hmeledrany hnyi fâte ta je lany ke fâte ta je lit.

¹³ Haba hnyi bong eling a khaca ame tha didrö ka hnyin aka Noa, me Sema, me Hama, me Jafeta je laku Noa, me öiö Noa, me kun a lâiân je lakon;

¹⁴ ödrin, me ta je menoiny hnyot hia hoton je bongudrin, me ta je meno hia a vak can hoton je bongudrin, me ta je ûnyi ae iyâû, wale ame iyâûâ kânâ hoton je bongudrin, me ta je meno ame gâ hoton je bongudrin, me ta je meno ae ve bongon hia.

¹⁵ Ke adre me didrö kö Noa ka hnyin aka, ûsa lo ûnyi hnyi ta je unyin hia wale ae hu homenâiny möt eû hnyidra.

¹⁶ Ke haba tavat adre me dit hnyin, adre me didrö, baga me momo, a ta je unyin hia thithö, hoton hna hûna hnen Khong kâu: ke Iehova ame hlöng ut hwanumen.

¹⁷ Ke e bi uoû hnyi hmeledrany fâte ta je bong; ke ame gan tot köiö, me ame matö göranyai aka hon hmeledrany.

¹⁸ Ke ame khibi but köiö, kʼ ame khibi tot hmönyin eang hmelen; me ame matö aka hon köiö.

¹⁹ Ke ame ti khibi gan hmâ but köiö hon hmeledrany; me tube but ta je bucen hia ae beu hmâ eang hmeledrany.

²⁰ Ame khibi thö köiö fiftin kubit ibeûen göranyai; me ka iyong ut ta je bucen.

²¹ Ke ame mokcu ta je ûnyi hia ame bwebwet eang hmelen, a ta je meno ame gâ, me meno a vak can, me menoiny hnyot, me ta je ûnyi hia ame iyâû waleji adre iyâûâ kânâ, me tavat hia:

²² waleji a mokcu ta je ûnyi hia ae hu homenâiny möt hnyi je hnyingöidra, me ta je ûnyi hia hon hnyei.

²³ Ke adre ohia but ta je ûnyi hia thithö ae möt eang hmelen, wale at, me meno a vak can, me ûnyi ame iyâû, me meno ame gâ ethö; ke a hiʼ ödra but ûnyi eang hmelen; ke hake Noa thiju, me hnyat a tha e më hnyin aka.

²⁴ Ke e bi köiö eang hmelen khaca haded ke fifte ta je bong.