Genese 6 - Iaai Bible 1901 (New Caledonia)

¹ KE hnyi ûen ame hwân ka hu tavat ae se hia eang hmeledrany, ke adre hnokoâ lakudra je hlu,

² ke haba je lakon Khong adre me wâ je lakon tavat a je hlu a ödra hmanenang; me adre me hom me laöiödra je hlu ae ve wedra.

³ Ke Iehova ame ha, ka habe, Ame ca he bala hanuk ba ûö hwege me at, anyin a e thibi unyin: ke so bi haba bonginy je bong ame he ka khaca haded ke twente ta je huna.

⁴ Haba hnyi je bong eling e hu je Nefilim eang hmelen, me hnyi je bong minya a biliny, waleji hnyi ûen ame o but ta je lakon Khong ka lakon tavat a ta je hlu, ke adre me hnokoâ lakudra: haba tavat eling waleji tavat ae hwege ehac, me tavat ae lung.

⁵ Ke a wâ but Iehova a e gan hmâ butmonuiny at eang hmeledrany, ke kong ut ta je hna ûnykûme hia eû hnyi hnyekudra hnyi ta ogo bong hia.

⁶ Ke Iehova ame ietra a gʼ ame hia but op at eang hmelen, ke e hmak ut hnyekon.

⁷ Ke Iehova ame ha, ka habe, Oge me he ka ohia at waleji oge hia but op, ûnyi hnyi kânâ; wale at, me menoiny hnyot, me ûnyi ame iyâû, me meno ame gâ ethö; anyin a khenyi but hnyekuk ge hnök hna up ödra.

⁸ Ke haba Noa ame wâ so hnyi hnyimakö Iehova.

⁹ Walang ta je dö anyi Noa. Haba Noa, at ae wisa, ke fâfâ but hnyi anyin ta je dö: haba Noa ame tha he me Khong.

¹⁰ Ke Noa ame hnokoâ ta lakon a kun, jia Sema, ma, Hama, me Jafeta.

¹¹ Ke ikiki thö hmeledrany hnyi hnyimakan Khong; kʼame unöngötö hmeledrany ge ûkonguny.

¹² Ke Khong ame wâ hmeledrany, ke wâ bi a ikiki thö; anyin a hia but tavat hia oikikiâ dedra eang hmelen.

¹³ Ke Khong ame ha kö Noa, ka habe, A o but hnyi hnyimakök obiny tavat hia thithö; anyin a unöngötö hmeledrany hnen ûkonguny ûnyi gadra; ke wâ bi oge me he ka tha ohiʼ ödra me hmeledrany.

¹⁴ Tibet ju hobi köu aka ge utö a gofa; ke u me he ka ânyâ ta je hnyeule hnyin aka, ke u me he ka okeceâ eiö hnyin me hoton ge ouge.

¹⁵ Ke walang hwakecin u ma tibet e, ka habe, kun ta haded kubit ibeûen aka, ke fifte kubit ûlauen, ke thöte kubit ibeûen gö-ranyai.

¹⁶ U ma he ka tubeaka ethö hon, ke u ma he ka oumo e ethö hnyi kubit a khaca; ke u ma he ka bi hwanumen aka hnyi ke haten; ke u ma he ha ânyâ kun ta deö dek, khaca hnyikânâi, me ke at a loiny, me kuniny, eiö hnyin.

¹⁷ Ke wâ bi, inya oge me he ka oûkhutukhavâ hmeledrany ge uoû, me me he ka ohia unyin hia ae hu hnyin homenâiny möt ûnyi eang hmelen; kʼ ame he ka mokcu ta je ûnyi hia thithö eang hmelen.

¹⁸ Ke oge me he ka otilâ hmâ anyik ûhihinyköu möu; ke u ma he ka dit ka hnyi aka, u, me je lakom, me âiâm, me lâiân je lakom a tha ödrin möu.

¹⁹ Ke u ma he ka hom ka hnyin aka ûsa lo li ûnyi hnyi ta je meno hia thithö, me me tha möt möu; ûsa khaca baga me momo.

²⁰ A je meno ame gâ, hoton bongudrin; me ta je meno a vak can, hoton bongudrin, me ta je ûnyi hia ame iyâûâ kânâ, hoton bongudrin, ame he ka o köu ûsa lo gadra hia, mʼ adre me möt.

²¹ Ke u ma he ka hom köu ûnyi ge ta je jeû hia thithö hnân han, me ûkhöûnâ unyâm; kʼ ame he ka âm, me ö ʼdrin minya.

²² Haba Noa ame ânyâ helâe; e ame ânyâ hoton ta je ûnyi hia Khong ame hûna kâu.