Genese 49 - Iaai Bible 1901 (New Caledonia)

¹ KE Jekob ame hawâ lakon, me ha, ka habe: Ûkhacaköu thʼ öbun, kʼ oge ame me he ka omanenâ köbun ta je ûnyi he ka o köbun hnyi ta je bong a biliny.

² Ûkhacaköu thö, me löng, öbun je laku Jekob: Ke löng ju kö Isaraela a kamöbun.

³ Reubena lö, u nökuk a atö, me manik man me hwâniny tang hwegiök; Beönuainy hmanenang, me beönuainy man.

⁴ U me bwebwet helâ me köiö, kʼ u me ca he ka beönua; Anyin a u je ölö ka hnyi hnamokut hnen kâmâm; Me okongoâ: e ame he ka hnyi hnök hnamokut.

⁵ Haba Simeona me Levi, ödru liamekeiny; Ke haba anyidru li hele vat me hnân ûokonguny.

⁶ Hanuk lö, u ma ca he ka ûne gadru; Soik lö, ca bi hanen hnödru hna ûkha-caköu; Anyin ödre hlingâ at hnyi anyidru hmönyin, Me sö can bolok hnyi hnödru hna bi gan.

⁷ E so e mok anyidru hmönyin, anyin ae hwege e; Me anyidru wathethot, anyin ae hwege oveciny; Oge me he ka ve ip ödru ûnyi Jekob, Me ovesei ödru but ûnyi Isaraela.

⁸ Juda lö, ame he je liamekeiny möu ka oganö u: Ame he hnyamâm ka e hnyi nyin je iwahnaihmiony möu: Kʼ ame he lakon kamâm ka iâû gam.

⁹ Haba Juda me nokon liona; U me he, nökuk, ûhem hnyi hanem: Kʼ ame mokut me iâû helâ me liona, Helâ me liona momo; ia ame he ka bwebwelâ e?

¹⁰ Ame ca he ka hia ûnyi Juda uci musi, Me at bi hnanyibu ûheny hnyi wanben li can, Ke ne o but ame o Silo; Kʼ ame he ta je hnyei ka löng hoton.

¹¹ Adre me he ka hûkâlâ haleny asina hnyi vine, Me nokon haleny asina hnyi vine ae so; E ame hneû je ûkhaûen hnyi waina, Me anyin imano hnyi dren ta je wan vine.

¹² Ame he ka dra li emakan ge waina, Kʼ ame he ka hau nyon hnen dân basin,

¹³ Ame he Zebulona ka laba hnyi wasaû: Kʼ ame he ka khöp unyin ta je hu; Kʼ ame he ka o hnyigöulen hnyi Zidona.

¹⁴ Asina ae hwege Isakara, A mokut hnyi wanben li umen mamoe:

¹⁵ Kʼ ame wâ dok ae so hnân menâ hnyin, Me hnyei ae hmanenang; Kʼ ame ham bajebenyin he ka hije hok Kʼ ame bi athnyaba hnyi hna khene huliwa.

¹⁶ Ame he Dana ka owisa iny hnyei, Helâ me ke tribu hnyi Isaraela.

¹⁷ Ame he Dana ka on eû hnyi gethen, Me vaipa hnyi hna cit gethen, At ame oloû ohmâiny can ta je hos, Me me kölu hoton at ame tabâ.

¹⁸ Iehova lö, oge hia but halubahingen ânyâm ûhomeli.

¹⁹ Ame he ka takû Gada hnen utbavat, Kʼ ame he bi e ka hwege hwaban.

²⁰ Ûnyi ga Asera an ae pipikhenya, Kʼ ame he ka hu gan hnân an than.

²¹ Nafatali, aila aidre hna: E ame ha hofuc ae so.

²² Josefa, anginy ûö ae wa, Anginy ûö ae wâ hnyi an; Ame iâû ta je anginy hon hak veto.

²³ Adre ti ovecâ hnen tavat fana Me fana kâu, me okongoâ:

²⁴ Ke hwege balua anyin cafana, Kʼ adre ohwegiâ li hnyamen me li benyin, Unyi ge li hnyamen thani Jekob, (Ûheny e at tuö mamoe, wale veto anyi Isaraela,)

²⁵ Wale ûnyi ge Khongon kâmâm, at ame hadruö u, Ke ûnyi ge Ataekhanahia, at ame he ka ohnahici u, Hnen ta je soiny drany ethö, Me soiny dok ae dit eû hnyikânâi, Me soiny basin, me hnyekon at ame hnokoâ.

²⁶ Haba je hnahic hna ha hnen kâmâm, me, gan hmâ Hon je hna hahnahicâ hnen je lakamök Ke ne o but ka hnyi hnyigöulen je bucen nyiele balua: Ame he ka ta hon bö Josefa, Wanben bân at waleji adre oûsakâûâ me je liamekeiny më.

²⁷ Haba Beniamina, me, luko ame olou usu kia: Hnyi hnyomakatu e ame he ka han haniny, Kʼ ame he ka khenâ hna hûgûnâ hnyi sahac.

²⁸ Wale je tribu anyi Isaraela hia a twelv; ke wale hnen hna ha ködrin hnen kamödrin me hahnahici ödrin; e ame hahnahici ödrin helâ me ûcû ködrin.

²⁹ Ke e ame hûna ködrin, me ha ködrin, ka habe, Adre me he ka oûkhacaköuö nya me lakauök: e so öbun e könim nya unyin lakamök hnyi op hnyi utkâna anyi Eferona at Heth,

³⁰ hnyi op hnyi utkâna hnyi Makepela cicö Mamere, hnyi hnyei Kanana, waleji Aberahama ame ûco tha e me utkânâ ûnyi ga Eferona at Heth, me me utkânâ khön komok;

³¹ adre me könim Aberahama me Sara a âiân eling, kʼ adre konâm eling Isaaka me Rebeka, kʼ oge konim Lea e:

³² wale utkânâ me op eû hnyin adre ûco ûnyi ge je laku Heth.

³³ Ke a um dö Jekob hûna ka je lakon, me e ame hwetö li can hnyi hnamokut me hna but hanon, kʼ adre me ukhacaköuâ e me lakamen.