Genese 48 - Iaai Bible 1901 (New Caledonia)

¹ HWABAN ta je ûnyi e, adre me thumetu Josefa, ka habe, Wâ bi e hu mok anyin kâmâm: me e ame hom li lakon Manase me Eferaima.

² Ke adre me thumetu Jekob, ka habe, Wâ bi, ame he jem Josefa a nokom; ke Isaraela ame ham hwegien me laba thö hon hna mokut

³ Ke haingö Jekob kö Josefa, ka habe, A manen dut Khong Aekhanahia könya ehac hnyi Luza hnyi hnyei Kanana, me hahnahici nya,

⁴ me ha könya, ka habe, Wâ bi, oge me he ka ohâti u me osi u me wiö u, mʼ u ma je hnyei ae se, ke oge me he ka ham hnyei eang ka ta je mâtrânâm a hwâbâm me me em nyiele balua.

⁵ Ke walang ang haba li lakom jia Eferaima me Manase adre hnokoâ gam hnyi hnyei Aigupito, kʼ iny tiga ca o köu eang Aigupito, me ödru li lakuk bi, helâ me Reubena me Simeona.

⁶ Ke haba je lakom u ma he ka hnokoâ hwabödru, me ka je lakom bi; adre me he ka hwenyi iödrin hoton ien je liamekeiny mödrin hnyi je hwajekhöûdrin.

⁷ Ke haba ûhek Padana, me a mokcu Rakela unyik hnyi hnyei Kanana eû hnyi gethen ke hakekeny Eferatha: kʼ oge me konâm e hnyi deny ka he Eferatha ai, (wale Betheleema).

⁸ Ke Isaraela ame wâ laku Josefa, me ha, ka habe, Li ia e?

⁹ Ke haingö Josefa ka kamen, ka habe, Ödru li lakuk hnen Khong hna ham könya eang. Ke haingen, ka kabe, Hum ödru thö jem kö nya mʼ inye he ka hahnahici ödru.

¹⁰ Ke wadröu but li emakö Isaraela, anyin ae hingat ut. Me e ame hum ödru kâu; ke e ame ûcimhnyimak mödru, me delûâ.

¹¹ Ke haingö Isaraela kö Josefa, ka habe, Oge me ca ûnykûme bi he ka wâ hmetu hnyimâkâm; ke wâ bi hnen Khong hna omanenâ könya li lakom minya.

¹² Ke Josefa ame hum ödru ûnyi hnyi wanben li boucan me nom ju hnyikânâi.

¹³ Ke Josefa ame hum ödru lo, jia Eferaima hnyi hnyamen a metân ka hnyi hnyamen a me Isaraela, me Manase hnyi hnyamen a meny ka hnyi hnyamö a metö Isaraela, me lili ödru kâu.

¹⁴ Ke Isaraela ame inâ hnyamen a metân me ip hon bö Eferaima a wakeiat, me hnyamen a meny hon bö Manase, kʼ ame ip metâ li hnyamen; anyin a atö Manase.

¹⁵ Ke e ame hahnahici Josefa, me ha, ka habe, E so ame he Khong, wale hnen lakamök Aberahama me Isaaka hna he hnyi hnyimakan, a Khong waleji at ame ha ök hwân kʼ iny tiga wanakat ke ne o but hnyi bong ang,

¹⁶ waleji angela at ame omeli nya ûnyi hnyi ta je kong hia, e so e ame ohnahica li thöth; ke so adre ip hudru iök, me ien lakamök Aberahama, me Isaaka; ke so ödru me he ka ti si eang hmelen.

¹⁷ Ke Josefa ame wâ a kamen ame ip hnyamen a metân hon bö Eferaima, me ame vec hnyekon: me e ame kap göranyai hnyamen kamen he ka hai hon bö Eferaima ka hnyi bö Manase bi.

¹⁸ Ke haingö Josefa ka kamen, ka habe, Cica lö, ca helâe, anyin a atö at ang; ip dö hnyamâm a metâm hon bân.

¹⁹ Ke höcö kamen, me ha, ka habe, Nökuk lö, e khanö nya, e khanö nya; ame he minya e ka bi hnyei, kʼ ame he minya ka gan: ke so bi ame he ka ti gan keiny hon, kʼ ame he ta je mâtrâniny ka bi hnyei ae se hia.

²⁰ Ke e ame hahnahici ödru hnyi bong eling me ha, ka habe, Ame he Isaraela ka hahnahicâ gam, me ha, ka habe, E so e he Khong ka wiö u helâ me Eferaima me Manase: ke e ame ip Eferaima me at a bân, ke Manase a biliny.

²¹ Ke haingö Isaraela kö Josefa, ka habe, Wâ bi, Oge me he but ang ka mok: ke ame he Khong ka tha e möbun, me hum öbun hmetu ka hnyi hnyei lakamöbun.

²² Ke inya oge hia but ham köu ke hwajekhon a khaca hon je liamekeiny möu, waleji oge me hûgûnâ ûnyi hnyi hnyamen at Amora ge anyik hele vat me anyik fana.