Genese 47 - Iaai Bible 1901 (New Caledonia)

¹ KE Josefa ame he me thumetu Farao, ka habe, A o thö cica me je liamekeiny mönya, me haledrin je hnahat mamoe me haledrin je hnahat kau, me anyidrin ta je ûnji hia ûnyi hnyi hnyei Kanana; ke wâ bi, ödrin dut hnyi hnyei Gosena.

² Ke e ame hom ke je liamekeiny mē, a ödrin thabûng, me hum ödrin ka hnyi hnyimakö Farao.

³ Ke haingö Farao ka je liamekeiny më, ka habe, Ieû öbun e khenen kâu? Ke haingödrin kö Farao, ka habe, Öhmun hnyat tuö mamoe a lathnyabainy, öhmun me lakamöhmun.

⁴ Ke haingödrin kö Farao, ka habe, Öhmun e o but he ka laba kanyua hnyi hnyei; anyin ae ba an je hnahat haleny lathnyabaem; anyin ae gan hmâ hmiâ hnyi hnyei Kanana: ke ö u he walang ang ka hnʼ öhmun a lathnyabaem ka laba hnyi hnyei Gosena.

⁵ Ke Farao ame ha kö Josefa, ka habe, A o thö köu kâmâm me je liamekeiny möu:

⁶ waleû hnyei Aigupito hnyi hnyimâkâm; olabā ju kâmâm me je liamekeiny möu hnyi kânâ ae hoso; e so ödrin e laba hnyi hnyei Gosena: ke e ka khanö u ke je hnyat ae meta unyidrin, otilʼ ödrin dö he ka musi hnyi ta je hnahat a halek.

⁷ Ke Josefa ame hum Jekob a kamen ka hnyi hnyimakö Farao: ke Jekob ame hahnahici Farao.

⁸ Ke haingö Farao kö Jekob, ka habe, Ve but ta je bonginy hunaiâm?

⁹ Ke Jekob ame thu kö Farao, ka habe, Khaca haded me thöte ta je huna oge me he kanyua hnyin; wakhalet thibi me kong ta je hunainy möt a inya, ke ca tha ûcû me je bonginy hunainy möt anyin lakamök hnyi je bonginy hnödrin hna he kanyua hnyin.

¹⁰ Ke Jekob ame hahnahici Farao, me he ûheny ûnyi Farao.

¹¹ Ke Josefa, ame olabâ kamen me je liamekeiny më, me ha gadrin hnyi hnyei Aigupito, hnyi kânâ ae hoso, hnyi hnyei Ramese, helâ me hna hûna hnö Farao.

¹² Ke Josefa ame han kamen, me je liamekeiny më, me lap anyin kamen hia ge areto, hoton anyidrin je lap.

¹³ Ke ba areto hnyi hnyei hia; anyin ae gan hmâ but hmiâ; ke mat ut hnyei Aigupito me hnyei Kanana hnen hmiâ.

¹⁴ Ke Josefa ame ûkhacaköuâ ta je mone hia ûnyi hnyi hnyei Aigupito me ûnyi hnyi hnyei Kanana, hwaban je hwit adre me ûco: ke Josefa ame hom ta je mone ka hnyi uma umo Farao.

¹⁵ Ke ba but mone hnyi hnyei Aigupito me hnyei Kanana, me ame he but at Aigupito hia kö Josefa me ha, ka habe, Ö u ha öhmun: anyin a ieû ohmun e he ka mok hnyi hnyimâkâm? anyin ae ba but mone.

¹⁶ Ke haingö Josefa, ka habe, Hom but jem halebun ta je meno; ke oge me he ka ha öbun hwaban halebun ta je meno e ka ba but mone.

¹⁷ Ke adre me hom kö Josefa haledrin ta je meno: ke Josefa ame ham ködra areto hwaban ta je hors, me je mamoe, me kâu, me je asina: ke e ame ha ödra ge areto hnyi huna eling hwaban haledra je meno.

¹⁸ Ke a um dö huna eling, me adre me o but kâu hnyi huna a loiny, me haingödra kâu, ka habe, Öhmun e ca he ka ikhâlâ gam than a e ba but anyihmun mone; ke e but unyâm than halehmun ta je meno; ke ba hmetu ke ûnyi a anyihmun hnyi hnyimâkâm than, ke so bi je unyihmun me ihmun je hnyei:

¹⁹ ke anyin a ieû öhmun e he ka mok hnyi hnyimâkâm, öhmun me je ihmun? ûcû öhmun dö me je ihmun hwaban areto, ke haba öhmun me je ihmun ame he ka bi athnyabai Farao: ke ha hanihmun me öhmun e he ka möt me ca mok, me me ca he ka iny wau kânâ.

²⁰ Me Josefa ame ûco ta hnyei hia hnyi Aigupito hobi kö Farao; anyin ame ve ûco hnen at Aigupito ta je idrin, anyin ae gan hmâ hmiâ unyidra: me me i Farao but kânâ.

²¹ Ke e ame hom tavat ka hnyi je taun ûnyi hnyi ke hnyigöulen Aigupito ke ne o but ka hnyi ke hnyigöulen.

²² Ke e ame ca ûco hnyei iny tavat bi hut: anyin a hnö Farao hna khenâ hwajekhon tavat bi hut, kʼ ödrin e han jekhöu Farao ame ham ködrin; waleling mʼ adre me ca ûco idrin.

²³ Ke Josefa ame ha ka tavat, ka habe, Wâ bi, oge hia but ûcû öbun me je ibun hnyi bong ang hobi kö Farao: wâ bi, walang ang ta je hanibun, he thʼ öbun ka belökâ kânâ.

²⁴ Ke e ka hwenying ut, öbun e he ka ham kö Farao je ke keihen a thabûnginy, ke haba vak ta ke keihen me hobi köbun, hnân haniny hnyei, me hnân ö ʼbun, me anyibun je lap, me an je wanakat unyibun.

²⁵ Ke haingödrin, ka habe, U je hia but omeli öhmun; ö u betenge gahmun than, kʼ öhmun e ka bi athnyabai Farao.

²⁶ Ke Josefa ame otilâ ûnyi eling hnân hnanyibu hnyi hnyei Aigupito ke ne o but hnyi bong ang, ka habe, Hobi kö Farao ta je ke keihen a thabûnginy; ke ca helâe ta hnyei iny tavat bi hut, ca i Farao bi e.

²⁷ Ke Isaraela ame laba hnyei Gosena, hnyi hnyei Aigupito; ke hu idrin eling, kʼ ödrin e hât me si gan hmâ.

²⁸ Ke haba Jekob ame laba hnyi hnyei Aigupito seventin ta huna: ke haba je bongu Jekob, wale hunainy anyin möt hia, me, khaca haded ke fâte seven ta je huna.

²⁹ Ke hakekeny jut ûen ame he Isaraela ka mok; ke e ame baö Josefa e nokon, me hûna kâu, ka habe, U je ne betenge gak, ö u inâ ju hnyamâm hmelen jevak, me ânyâ ûnyi ae so me hnathu könya; u na ca he ju ka könim nya eang Aigupito:

³⁰ ke iny ka tha mokut me lakamök u ma he ka sam nya ûheny ang Aigupito, me könim nya hnyi anyidrin hna khön komok. Ke e ame ha, ka habe, Oge me he ka ânyâ helâ me hwâm hofuc.

³¹ Me haingen, ka habe, Khemanyin dö könya: me e ame khemanyin kâu. Ke Isaraela ame nom dut hon hageny; hna mokut.