Genese 46 - Iaai Bible 1901 (New Caledonia)

¹ KE Isaraela ame he me anyin lap hia, me o hnyi Bere-seba, me hudo eling je hut ka Khongu Isaaka a kamen.

² Ke Khong ame ba kö Isaraela hnyi hna omanenâ hnyi hnyinghet, ka habe, Jekob, Jekob lö. Me e ame ha, ka habe, Inya ang.

³ Ke e ame ha, ka habe, Inya Khong, a Khongon kâmâm: ca ot he ka he Aigupito ai; anyin oge me he ka wiö u eling me hnyei ae gan:

⁴ oge me he ka tha he möu Aigupito ai; kʼ oge me he bi nya ka hum u hmetu ûheny e: kʼ ame he Josefa ka hlec li emâkâm.

⁵ Ke Jekob ame he thö ûheny Bere-seba: ke je laku Isaraela adre me hum Jekob a kamödrin, me lakudrin ae ûhnyûkong, me je laöiödrin hon je ûkat ame kunâ hnö Farao me hnân tabödrin.

⁶ Ke ödrin e hom minya haledrin ta je hnahat, me tang omjehedrin waleji ae hu gadrin hnyi Kanana, me o Aigupito, wale Jekob me anyin lap hia a tha e me:

⁷ je lakon obaga, me laöbiny obaga, a tha e me, me je lakon wahlu me je laöbiny wahlu, me mâtrâniny hia thithö ame tha he me Aigupito ai.

⁸ Ke walang je ien laku Isaraela ödrin e o Aigupito, a Jekob me lakon obaga: jia Reubena nöku Jekob a atö.

⁹ Ke haba je laku Reubena; jia Enoka, me Palu, me Hezerona, me Karemi.

¹⁰ Ke haba je laku Simeona; jia Jemuela, me Jamina, me Ohada, me Jakina, me Zohara, me Saulo nokon momo Kanana.

¹¹ Ke haba je laku Levi; jia Geresoma, me Kohatha, me Merari.

¹² Ke haba je laku Juda; jia Era, me Onana, me Sela, me Farez, me Zera: ke a mokcu Era me Onana hnyi hnyei Kanana. Ke lo li laku Farez, jia Hezerona me Hamula.

¹³ Ke haba je laku Isakara; jia Tola, me Pua, me Jobu, me Simerona.

¹⁴ Ke haba je laku Zebulona; jia Sereda, me Elona, me Jalela.

¹⁵ Wale je laku Jekob hnö Lea hna hnokoâ hnyi Padanarama, me Dina a nokon hlu; ke haba hnyat hia thithö je lakon obaga me wahlu, me, ödrin thöte theri.

¹⁶ Ke haba je laku Gada; jia Zifiono, me Hagi, me Suni, me Ezebona, me Eri, me Aroda, me Areli.

¹⁷ Ke haba je laku Asera; jia Iemina, me Ieseva, me Iesevi, me Beria, me Sera a hanidrin: ke lo laku Beria; jia Heberu, me Malekiela.

¹⁸ Wale je laku Zilepa hnö Labana hna ham kö Lea a nokon, kʼ ame hnokoâ me Jekob, ödrin sikstin.

¹⁹ Ke haba li laku Rakela öiö Jekob; jia Josefa me Beniamina.

²⁰ Ke adre hnokoâ lo laku Josefa hnyi hnyei Aigupito, jia Manase me Eferaima, wale hnö Asenatha nöku Potifera, at bihut hnyi Ona.

²¹ Ko haba je laku Beniamina; jia Bela, me Bekera, me Asebala, me Gera, me Naamana, me Eki, me Rosa, me Mupima, me Hupima, me Areda.

²² Wale je mâtrâni Jekob me Rakela, haba hnyat hia, me, fortin.

²³ Ke haba nöku Dana; jia Husima.

²⁴ Ke haba je laku Nafatali; jia Jazela, me Guni, me Jezera, me Silema.

²⁵ Wale je laku Bila hnö Labana hna ham kö Rakela a nokon, kʼ ame hnöku ödrin je laku Jekob: ke haba hnyat hia, me, ödrin seven.

²⁶ Haba tavat hia a tha he me Jekob Aigupito ai, wale a hnokoâ, ke ca ha bi je laûngû Jekob, me, ödrin sikste siks hia thithö;

²⁷ ke lo laku Josefa e ame hnokoâ hnyi hnyei Aigupito: kʼ ödrin sevente tavat hia hnyi lap anyi Jekob, wale tavat ödrin e o hnyi hnyei Aigupito.

²⁸ Ke e ame kunâ bânâ Juda kö Josefa me me he ka kû Gosena kâu; me ödrin e o but hnyi hnyei Gosena.

²⁹ Ke Josefa ame penapena anyin kariota, me he Gosena ai he ka iouny me Isaraela a kamen; ke ödru me iouny dö, me Josefa ame ta ju hon nyin, me tenge beû hmâ hon nyin.

³⁰ Ke haingö Isaraela kö Josefa ka habe, Hnö nya but walang ang he ka mok, anyin oge wâ thö hnyimâkâm a u möt.

³¹ Ke Josefa ame ha ka je liamekeiny me, me lap anyin kamen, ka habe, Oge me he ka thumetu Farao, me ha kâu, ka habe, A o thö könya je liamekeiny mönya, me lap anyi cica ûhedrin hnyi hnyei Kanana;

³² kʼ ödrin je hnyat tuö mamoe, anyin a odrin hnyat tuö omeno ehac: kʼ ödrin e hia but hom je hnahat mamoe a haledrin, me je hnahat kâu, me anyidrin ta je ûnyi hia.

³³ Ke e ka he Farao ka haö ʼbun, me hnei öbun, ka habe, Ieû huliwa a öbun khenen kâu?

³⁴ me öbun e he ka ha, ka habe, Öhmun lathnyabaem hnyat tuö meno hwân hnyi hidröu a öhmun ke ne o but walang ang öhmun me lakamöhmun: mʼ öbun e he ka laba hnyi hnyei Gosena; anyin a at Aigupito adre me ikikiâ hnyat tnö mamoe.