Genese 42 - Iaai Bible 1901 (New Caledonia)

¹ KE khanö Jekob but ae hu jeû Aigupito, me Jekob ame ha ka je lakon, ka habe, Ieû e gabun öbun e iwahmö thibi?

² Ke haingen, ka habe, Wâ bi, oge löng ut a e hu jeû Aigupito: he thʼ öbun kâ e ka ûcû ö ʼtin mʼ ötin e möt me ca mok.

³ Me ame he ta je latuhö Josefa a libenyita he ka ûcû jeû hnyi Aigupito.

⁴ Ke Jekob ame ca kunö Beniamina kei Josefa tha e me je latuhan, anyin a haingen, ka habe, Wâ e nye o but kong kâu.

⁵ Ke ame o but je laku Isaraela he ka ûcû jeû, unyin tavat adre me o eling: anyin ae hmiâ but hnyei Kanana.

⁶ Ke Josefa ame musi hnyi hnyei, kʼ ame ûcû jeû me tavat hia hnyi hnyei: kʼ ame o but je latuhö Josefa me nom ju hnyikânâi kâu.

⁷ Ke a wâ but Josefa je latuhan, me wâhmakhmeto ödrin, me e ame bi ke at ködrin, me fuc hwege, me ha ködrin, ka habe, Öbun e mwi ua? Kʼ ödrin e thu, ka habe, Öhmun e mwi hnyi hnyei Kanana, öhmun e he ka ûcû jeû.

⁸ Ke Josefa ame wâhmakhmeto je latuhan, kʼ ödrin e ca wâhmakhmeto e bi.

⁹ Ke Josefa ame ûnykûme li bwi e ame bo gadrin, me e ame ha ködrin, ka habe, Öbun je hnyat ae kong; öbun e o but he ka ecmâkâ hnyei ae ba ûnyi.

¹⁰ Kʼ ödrin e thu kâu, ka habe, Than lö, e ba, kʼ ame o but lathnyabaem he ka ûcû jeû.

¹¹ Je lakon at a khaca öhmun hia; öhmun e hnathu, öhmun e ca he ka ecmâkâ hnyei, a öhmun lathnyabaem.

¹² Ke haingen ködrin, ka habe, Ohe, öbun e o but he ka ecmâkâ hnyei ae ba ûnyi.

¹³ Ke haingödrin, ka habe Haba öhmun lathnyabaem je liamekeiny a twelv, lakon at a khaca, hnyi hnyei Kanana; ke haba wakeiat hmönyin tha e biju me kamöhmun walang ang, ke hia but khaca.

¹⁴ Ke Josefa ame ha ködrin, ka habe, Wale hnök hna ha köbun, ka habe, öbun je hnyat ame he ka ecmâkâ hnyei:

¹⁵ ke walang hnân ohnathu öbun, ka habe, Kia inya Farao a öbun e ca he ka he ûheny ang e ka ca o minya eang keibun wakeiat hmönyin.

¹⁶ Kunâ thö ke at gabun he ka hom keibun, kʼ adre me he ka eʼ öbun me cubec hobun hofuc, öbun e ne hnathu: ke ame ne ba, kia inya Farao a öbun je hnyat ame he ka ecmâkâ hnyei.

¹⁷ Ke e ame eʼ ödrin kun ta bong.

¹⁸ Ke haba hnyi bong a kuniny Josefa ame ha ködrin, ka habe, Ânyâ thʼ öbun ûnyi ang mʼ öbun e möt; anyin a iny outen Khong:

¹⁹ öbun e ne hnathu, e so adre ca ke at gabun a je liamekeiny hnyi uma adre eʼ öbun hnyin; ke he thʼ öbun hom dö jeû ka anyibun je lap ae mekihnânem:

²⁰ kʼ öbun hmeto thö könya keibun a wakeiat hmönyin; me me ohnathoâ hobun hofuc, mʼ öbun e ca he ka mok. Kʼ ödrin e ânyâ helâe.

²¹ Ke ödrin e tha ûhnenamö, ka habe, E hnathu jönitin keitin anyin a ötin e wâ thö vecin hnyekon e, waleji e ame khöû kötin kʼ ötin e ca löng bi; waleling me me o but kötin vec eang.

²² Ke haba Reubena ame thu ködrin, ka habe, Hawa, oge ca hia but ha köbun, ka habe, ca okongoâ da; kʼ öbun e ca löng? Anyin a wale wâ bi, adre me elâm hwaban dren.

²³ Ke ca khanʼ ödrin a Josefa ame löng hmakhmeto, anyin a e ame ûhnenamö mödrin deny at ame wia hwan hnyei.

²⁴ Ke e ame he thö unyidrin, me tenge; ke e ame hmetu ködrin me ûhnenamö mödrin, me hum Simeona unyidrin me ca e hnyi hnyimaködrin.

²⁵ Ke Josefa ame kunâ he ka ounöngötâ tangödrin je tang ge hwit, me ve hitangen anyidrin je mone hnyi tangödrin je tang, me ha kamijidrin hobi kâu eû hnyi gethen: kʼ adre ânyâ helâe ködrin.

²⁶ Kʼ ödrin e ve ip ta je tang hwit hon haledrin je asina, me he but.

²⁷ Ke haba ke at gadriu ame khong tangen tang he ka han haleny asina hnyi omtabaga, kʼ ame wâ anyin mone; ke wâ bi e hnyi hnyimen tangen tang.

²⁸ Ke e ame ha ka je liamekeiny më, ka habe, Wale hmetu thö ang anyik je mone hnyi tangök tang: me ame gâ udrin, kʼ ödrin e öbubuny me ûhaköuâ, ka habe, Ieû ang a ânyâ kötin Khong?

²⁹ Ke ödrin e o but kö Jekob a kamödrin hnyi hnyei Kanana, me ödrin e thumeto e ge ta je ûnyi hia ame o but ködrin, ka habe,

³⁰ Ame fuc hwege köhmun at, wale thaniny hnyei, me ha, öhmun e ecmâkâ hnyei.

³¹ Ke haingöhmun kâu, ka habe, öhmun e hnathu, öhmun e ca ecmâkâ hnyei:

³² öhmun je liamekeiny a twelv, ke khaca thibi kamöhmun; a hia but ke at, ke haba wakeiat hmönyin e unyin kamöhmun hnyi bong ang hnyi hnyei Kanana.

³³ Ke ame ha köhmun at, wale thaniny hnyei, ka habe, Walang haten mʼ inye he ka wâhmakhmetoâ a öbun e hnathu, hnen biju ang unyik ke at gabun je liamekeiny ke hok ö ʼbun dö ka anyibun je lap ae mekihnânem, ke he thʼ öbun:

³⁴ ke hom dö könya keibun wakeiat hmönyin: ke wale oge me he ka wâhmakhmetoâ a öbun e ca he ka ecmâkâ hnyei, kʼ öbun je hnyat ae hnathu: ke oge me he ka ham hmetu köbun liamekeiny möbun, me öbun e he ka ûcû hnyi hnyei.

³⁵ Ke ödrin e ve hingâlâ önyen tangödrin je tang, ke wâ bi, ve e bi hnyi tangödrin je tang anyidrin je tang mone; ke ödrin e wâ me kamödrin anyidrin je tang mone, mʼ ödrin e ot.

³⁶ Kʼ ame ha ködrin Jekob a kamödrin, ka habe, Öbun hnyat öbun e ohia lakuk: a hiö Josefa but, ke hiö Simeona but, kʼ öbun e he minya ju ka hum Beniamina: hnân okongu nya ta je ûnyi hia thithö eling.

³⁷ Ke haingö Reubena ka kamen, ka habe, U ma he ka hlingâ lakuk li baga, iny ka ca hom hmetu e köu: hna but e ka hnyi hnyamök, ke oge me he ka hmeto e köu.

³⁸ Ke e ame ha, ka habe, Ame ca he nökuk ka tha he möbun; anyin a mokcu keiny, ke hake biju e: ke a ne o but kong kâu eû hnyi gethen öbun e he, me öbun e he ka otengiö nya kʼ iny hûen dut ke ne o but ka hnyi erkemok.