Genese 4 - Iaai Bible 1901 (New Caledonia)

¹ KE Adamu ame khana âiân jia Eva; me ame erkin dut me hnöku Kaina, ke haingen, ka habe, Oge hia but kap at ûnyi ga Iehova.

² Ke e ame hnokoâ hmetu jia Abela a keiny. Haba Abela, me, at tuö mamoe, ke haba Kaina, me, at belökâ kânâ.

³ Ke hwaban ke ta je bong, haba Kaina ame hom ke troban kânâ hnân hut kö Iehova.

⁴ Ke haba Abela, e ame hom ûnyi hnyi hna hat mamoe je lakon a bân me je meno ae pipikhenya. Ke Iehova ame oûnyihnathu Abela me anyin hut:

⁵ kʼ ame ca oûnyihnathu Kaina me anyin hut. Me Kaina ame hmönyin gan hmâ, me khöt ut hnyimakan.

⁶ Haba Iehova ame ha kö Kaina, ka habe, Ieû gam u me hmönyâm? kʼ ame khöt hnyimâkâm geû?

⁷ U je ne ânyâ so, hawa adre me ca he ka köp u? ke u ka ca ânyâ so, awe, ame bate-tot hulö hnyi hwanuma: kʼ ame ke ka e hmelâm weny, ke u ma he ka musö e.

⁸ Ke Kaina ame thumetu Abela a keiny. Ke tiga ödru hnyi ta hnyei haba Kaina ame tot kö Abela a keiny, me hlingâ.

⁹ Ke Iehova ame ha kö Kaina, ka habe, Ewa Abela a kem? Ke e ame thu, ka habe, E ca khanö nya: hawa, inya at tuö keik?

¹⁰ Ke e ame ha, ka habe, Ieû e u je ânyâ? ame tönge könya ifucin dren kem ûnyi hnyi kânâ.

¹¹ Ke walang ang u je hnaûha-ngö but ûnyi ge kânâ, waleji a memang ut me cem dren kem ûnyi hnyi hnyamâm;

¹² u ka belökâ kânâ, ame ca he hmetu ka ohwenyingâ gânâ; ke u ma he bi u ka at baû, me at he monu eang hmeledrany.

¹³ Ke haingö Kaina ko Iehova, ka habe, E gan hmâ hwaban könya ke ca khanö nya he ka hok hnyokâ.

¹⁴ Wâ bi u je hia but obö nya hnyi bong ang ûnyi hnyi hon kânâ: ke oge me he ka iyong ut hnyimâkâm; ke oge me he bi nya ka at baû me he monu eang hmelen; wale mʼ adre me he ka hlingö nya hnen tavat hia adre me he ka ō nya.

¹⁵ Haba Iehova ame ha kâu, ka habe, Anyin a wale, haba at ame he ka hlingö Kaina, me, adre me he ka ibi oseven bi hwaban hmetu kâu, Ke haba Iehova ame bi hatö Kaina, wâ e nye hlingâ hnen ke at ame he ka wâ e.

¹⁶ Ke Kaina ame he but ûheny hnyi hnyimakö Iehova, me laba hnyi hnyei Noda, Edena ke e deiö.

¹⁷ Ke Kaina ame khana thö âiân; me e ame erkin dut me hnöku Enoka: ke e ame otilâ ke taun, me hwenyi ien taun, hoton ien nokon, jia Enoka.

¹⁸ Ke Enoka ame hnöku Irada: ke Irada ame hnöku Mehujaela: ke Mehujaela ame hnöku Methusaela: ke Methusaela ame hnöku Lameka.

¹⁹ Haba Lameka ame hok lo momo; Ada ien ke at, ke Zila ien ke at.

²⁰ Ke Ada ame hnöku Jabala: e kamen tavat adre laba hnyi je uma mano, me tren meno.

²¹ Haba ien keiny, me, Jubala: e kamen tavat hia adre khenen hom kitara me utköwi.

²² Ke haba Zila, me e ame hnöku Tubala-kaina, at ame op ta je ûnyi hia a bras me fao hnân subâ: ke haba Naama hani Tubala-kaina.

²³ Ke haingö Lameka ka li âiân, ka habe, Ada me Zila lö, löng ju hok hofuc; Öbu laöiö Lameka lö, tevelöng ju ifucik: Anyin oge hia but hlingâ at, oge aatö gan, Ke hidröu, anyin a e ame okongu nya:

²⁴ Adre ne he ka oseven bihwaban ga Kaina, A we, sevente seven ga Lameka bi.

²⁵ Ke Adamu ame khana hmetu âiân; me e ame hnokoâ da, me hwenyi ien Setha: anyin a haingen, A hia but Khong ham könya ke mâtrân hwabö Abela; anyin a hia but Kaina hlingâ.

²⁶ Ke haba Setha, adre hnokoâ nokon ke da; ke e ame hwenyi ien Enosa: wale ûen ame bi hwân tavat he ka hawâ iö Iehova.