Genese 39 - Iaai Bible 1901 (New Caledonia)

¹ KE adre me hum Josefa Aigupito ai; kʼ ame ûco e hnö Potifera at Aigupito athnyabai Farao, taben hnyat tue, ûnyi: ge at Isamaela, hnyat ödrin e hom kâ e.

² Ke tha Iehova me Josefa, ke e at ae sot; kʼ ame laba hnyi hnyaban at Aigupito a tuhan.

³ Ke a wâ but tuhan a tha Iehova mē, ke levoha ame ohnahicâ hia ta je ûnyi e ame ânyâ.

⁴ Kʼ ame betenge ga Josefa, me huliwa kâu: me e ame otilâ e he ka musö hnyaban, me hna kâu anyin ta je ûnyi hia.

⁵ Ke hwân e ame otilâ e he ka musö hnyaban, me anyin ta je ûnyi hia, me Iehova ame ohnahicâ hnyaban at Aigupito; ga Josefa; ke haba hnahic ûnyi ga Iehova ame ta hon anyin ta je ûnyi hia eiö hnyi, uma, me eû hnyi utkânâ.

⁶ Me e ame hna biju anyin ta je ûnyi hia kö Josefa; ke ca khana e anyin ke ûnyi bi, ke so jeû e ame han. Ke so hmainy unyi Josefa, ke hmanenang ka wâ.

⁷ Ke hwaban e ame hinoutmhâkâ e hnen âiân tuhan; kʼ ame ha kâu momo, ka habe, Ötu he ka tha mokut.

⁸ Ke e ame höcö, me ha ka âiân tuhan, ka habe, Wâ bi, E ca khana tuhök ta je ûnyi unyik hnyi uma; kʼ a hia but hna hia anyin ta je ûnyi könya;

⁹ ke ba at ae beönua huk hnyi hnyaba eang; ke e ame ca behânâ gak ke ûnyi ke u thiju, anyin a u bi âiân: oge ma hawa ka ânyâ monu e ae gan, ke kong ka Khong?

¹⁰ Ke e ame fuc kö Josefa hnyi ta je bong hia, ke e ame ca löng kâu, he ka tha mokut mē, me tha e mē.

¹¹ Ke hnyi ke bong eling e ame didrö eiö hnyin uma ka ânyâ hûdrân; ke ba aten hnyaba eiö hnyin uma.

¹² Ke momo ame kât ûkhaûen, me ha, ka habe, Ötu ma tha mokut: ke e ame hna degecâ ju ûkhaûen hnyi hnyamen me kec ut.

¹³ Ke a wâ but a ga hia but hna degecâ ûkhaûen ka hnyi hnyamen me kec ut,

¹⁴ me e ame hawâ tavat aten hnyaban, me ha ködrin, ka habe, Wâ bi, e ame hom kötin at Heberu he ka hlumʼ ötin, e a o könya he ka tha mokut mönya me oge me hongot hwege:

¹⁵ ke e ame löng hok hwakhöû me hongot, me e ame hna degecâ bi könya ûkhaûen, me kec ut.

¹⁶ Ke momo ame ip ju ûkhaûen ke ne o but ame o tuhan ka hnyi hnyaban.

¹⁷ Ke momo ame ha kâu ta je ûnyi eling, ka habe, A o könya athnyaba at Heberu u je hom kötin, me me he ka hlumö nya:

¹⁸ me oge me khöû me hongot, me e ame hna degecâ bi unyik ûkhaûen me kec ut.

¹⁹ Ke a löng ut tuhan hofuc hwan âiân, wale a ha kâu, ka habe, Ame ânyâ helâe hnen athnyabaem: me gan hmâ anyin hmönyin kâu.

²⁰ Ke haba tuhö Josefa ame hom e me ip eiö hnyin uma ceat unyin tavat adre ca ûnyi ge than: ke e ame laba eiö hnyin uma ceat.

²¹ Ke tha Jehova me Josefa, kʼ ame betenge gan, me okûâ he ka betenge gan hnen tuhan uma ceat.

²² Ke haba tuhan uma ceat ame hna kö Josefa tavat hia adre ca hnyin uma ceat; ke haba ta je huliwa hia ödrin e ânyâ eling, me e at ame musö.

²³ Ke ame ca wâ tuhan uma ceat ke ûnyi unyin, anyin a tha Iehova me, ke Iehova ame ohnahicâ hnen hna ânyâ.