Genese 35 - Iaai Bible 1901 (New Caledonia)

¹ KE Khong ame ha kö Jekob, ka habe, Todrö, he thö Bethela ai, ke laba e: me otilâ e tabon hut ka Khong, at ame manen köu, waleji hnyi hnâm hna kec ga Esau a tuhâm.

² Ke Jekob ame ha ka anyin lap, mʼ ödra hia a tha e më, ka habe, Hna but ta je hnatheat kanyua unyibun, me obosoi öbun, me khaû ju öbun:

³ kʼ ate me tot me he thö Bethela ai; kʼ oge me he ka otilâ taben hut eling ka Khong, at ame ling nya hnyi bong oge me vec hnyin, me tha e mönya eû hnyi gethen oge me he hnyin.

⁴ Ke ödrin e ham kö Jekob ta je hnatheat kanyua hia unyidra, me je wen ûnyi hnyi ta je hnyikonyödrin; ke Jekob ame ikhâlâ je ûnyi e hmelen iwajo hnyi haten Sekema.

⁵ Kʼ adre me he but: ke e gan hmâ hna outen hnyi ta je hnyei igigili ödra, kʼ adre me ca hnu hoton je laku Jekob.

⁶ Ke Jekob ame o but hnyi Luza hnyi hnyei Kanana, (wale Bethela), e me tavat hia unyin.

⁷ Ke e ame otilâ taben but e, me hwenyi ien dok eling Ele-bethela: anyin a Khong ame manen kâu e, hnyi ûen e ame kec ge tuhan.

⁸ Ke a mokcu Debora at ame hat Rebeka, kʼ adre konâm hmelen Bethela, eû hmelen iwajo: kʼ adre hwenyi ien e Alona-bakota.

⁹ Ke Khong ame manen hmetu kö Jekob, hnyi ûen e ame he ûheny Padanarama, me hahnahicâ e.

¹⁰ Ke Khong ame ha kâu, ka habe, Jekob iâm: kʼ adre me ca he hmetu ka hao u Jekob, ke Isaraela bi iâm: ke e ame hwenyi ien e Isaraela.

¹¹ Ke Khong ame ha kâu, ka habe, Inya Khong Aekhanahia: dudu but me si but; ame he ka o unyâm ke hnyei me ta je hnyei, ke ame he ka o ûnyi gam ta je than;

¹² ke haba hnyei waleji oge ham kö Aberahama me Isaaka oge me he ka ham köu, kʼ oge me he ka ham hnyei ka ta je mâtrânâm a hwâbâni.

¹³ Ke Khong ame ölö thö ûnyi gan hnyi dok e ame fuc kâu hnyin.

¹⁴ Ke Jekob ame otilâ haten hnyi dok e ame fuc kâu hnyin, veto a haten: ke e ame hingâlâ hon e hudiny hic, me hingâlâ wakaco hon.

¹⁵ Ke Jekob ame hwenyi ien dok Khong ame fuc kâu hnyin, Bethela.

¹⁶ Ke adre me he ûhedrin Bethela; ke tiga ca sâkâû bi Eferatha: kʼ ame vec hnyeku Rakela ke vec hmönyin.

¹⁷ Ke e ame tiga vec hmönyin, me haingen kâu momo ame hok wanakat, ka habe, Ca ot; anyin a u ma he ka hnokoâ ke da.

¹⁸ Ke ame tiga he ka he but banon (anyin a mokcu) me e ame hwenyi ien e Benoni: ke haba kamen ame hwenyi ien, me Beniamina.

¹⁹ Ke a mokcu Rakela, me adre me konâm hnyi gethen ka he Eferatha ai, wale (Bethelema).

²⁰ Ke Jekob ame otilâ ke haten hon: wale haten hu Rakela ke ne o but hnyi bong ang.

²¹ Ke Isaraela ame he but, me e ame otilâ umen uma mano hnyi hoton tap ae beû göranyai hnyi Edera.

²² Ke ame tiga laba Isaraela hnyi hnyei eling, me haba Reubena ame tha mokut me Bila, ke momo anyin kamen: ke a löng ut Isaraela. Ke ödrin twelv ta laku Jekob a baga;

²³ haba je laku Lea; Reubena, nöku Jekob a bân, me Simeona, me Levi, me Juda, me Isakara, me Zebulona:

²⁴ ke haba li laku Rakela; Josefa, me Beniamina:

²⁵ ke haba li laku Bila, a athnyabai Rakela; Dana, me Nafatali:

²⁶ ke haba li laku Zilepa, a athnyabai Lea; Gada me Asera: wale je laku Jekob a hnokoâ e Padanarama.

²⁷ Ke Jekob ame o kö Isaaka a kamen e Mamere, hnyi Kiriath-areba (wale Heberona), waleji hnö Aberahama me Isaaka hna laba kanyua hnyin.

²⁸ Ke haba je bong bongu Isaaka, me khaca haded ke eite ta je huna.

²⁹ Ke Isaaka ame khûö homenâ me mokcu, me e ame ûkhacaköu me lakamen, a hingat ut ke se hia bongon je bong; ke a konâm e hnö Esau me Jekob a li lakon.