Genese 33 - Iaai Bible 1901 (New Caledonia)

¹ KE Jekob ame bwele me wâ, ke wâ bi, Esau ame he jem me tavat a vak ta haded. Me e ame khenâ but je wanakat kö Lea, me Rakela, me li athnyaba a li momo.

² Ke e ame ip li athnyaba momo me je lakudru hnyi hnyimakan, ke hwabö-drin jia Lea me je lakon, ke a bili Rakela me Josefa.

³ Ke e ame he bânâ, me oseven nom hnyikânâi ke ne o but ame hakekeüyâ tuhan.

⁴ Ke Esau ame wadring me iouny më, me delûâ e, me ta hon nyin, me ûcimhnyimak më: kʼ ödru me ûtengiö.

⁵ Ke e ame bwele me wâ je momo me je wanakat; me haingen, ka habe, Ie hnyat ang unyâm! Ke haingen, ka habe, wale je lakuk hnen Khong hna betenge gak a athnyabaem.

⁶ Ke ame o but li athnyaba momo, ödru me je lakudru me nom ju.

⁷ Ke ame o but minya Lea me je lakon me noin ju: ke hwaban e ame o but Josefa me Rakela me nom ju.

⁸ Ke e ame ha, ka habe, Hawa gam ge ta je hnahat hia oge ûkhanö më? Me e ame ha, ka habe, Wale hnân elâm ibetengiö gam könya tuhök.

⁹ Ke Esau ame ha, ka habe, E gan hmâ anyik ta je ûnyi; keik lö, ame ka hnen biju unyâm ânyâm ta je ûnyi.

¹⁰ Ke haingö Jekob, ka habe, Ohe, e ba, ö u betenge gak me kap ju anyik bwihlany: anyin oge wâ hnyimâkâm, helâ me man at ame wâ hnyimakan Khong, kʼ u je kap soi nya.

¹¹ Ö u kap ju anyik betenge adre hom köu; anyin a hia but betenge gak Khong, anyin e gan hmâ anyik ta je ûnyi. Kʼ ame ûjengö e, me e ame kap ju.

¹² Ke e ame ha, ka habe, Aiö u ötin e he, ke ama bök.

¹³ Ke haingen kâu, ka habe, E khana tuhök a e sënyin dut je wanakat, ke je hnahat mamoe me kâu adre me ûasin: ke adre me ne alen hwegiâ hnyi bong a khaca, me ame ne he ka mok hia ta je hnahat meno.

¹⁴ E so u ma he tuhök ka bâm, ke bilik biju athnyabaem: ke oge me he ka omise, helâ me tulutiny ûheny je meno hnyi hnyimakök, me helâ me ûheny je wanakat, ke ne o but oge me o unyâm tuhök e Seira.

¹⁵ Ke Esau ame ha, ka habe, E so oge me ip biju unyâm ke je athnyabaik. Ke haingen, ka habe, Hnân eû? U ma he tuhök ka betenge gak.

¹⁶ Ke Esau ame he hmetu hnyi bong eling hnyi gethen Siera ai.

¹⁷ Ke Jekob ame he Sukotha ai, me otilâ umen uma, me ânyâ ta je uma baelelu hobi kâu haleny ta je meno: anyin a wale adre hwenyi ien dok eling Sukotha.

¹⁸ Ke Jekob ame o ka hnyi taun Sekema ke hnahic, wale hnyi hnyei Kanana, ge ioiny ûheny Padan-arama; me hunuma cicö taun.

¹⁹ Ke e ame ûco utkânâ wale ame otilâ hnyin umen uma mano, ûnyi ge je laku Hamora, kamö Sekema, hwaban je mone a khaca haded.

²⁰ Ke e ame otilâ taben hut, me hwenyi ien e El-eloe-Isaraela.