Genese 30 - Iaai Bible 1901 (New Caledonia)

¹ KE a wâ but Rakela a gʼ ame ca hnöku nöku Jekob, me Rakela ame hmönyin ka tuhan, me ha kö Jekob, ka habe, Ha nökuk ut, wâ inye mokcu.

² Ke Jekob ame hmönyin kö Rakela, me haingen, ka habe, Hawa inya ang hnen Khong, waleji at ame behanö u ge ta je wanakat?

³ Ke haingen, ka habe, Wâ bi anyik hlu jia Bila, hom ju e, ke e ame he ka hnokoâ hobi könya, me me hu nökuk minya ûnyi gan.

⁴ Me e ame ham kâu anyin hlu wale Bila hnân âiân: ke Jekob ame hom e.

⁵ Me Bila ame erkin dut, me e ame hnokoâ nöku Jekob a da.

⁶ Me haingö Rakela, ka habe, A hia but Khong owisa könya, me löng hok hofuc, me ham könya nökuk da: anyin a wale e ame hwenyi ien Dana.

⁷ Ke ame erkin hmetu Bila hlu anyi Rakela, me e ame hnokoâ nöku Jekob da a loiny.

⁸ Me haingö Rakela, ka habe, E gan hmâ but hnök hna ûsöu me tuhök, ke oge hon dut: me e ame hwenyi ien Nafatali.

⁹ Ke a wâ but Lea a ga mwi thö, me e ame hum Zilepa a anyin hlu, me ham kö Jekob hnân âiân.

¹⁰ Me Zilepa hlu anyi Lea ame hnokoâ nöku Jekob a da.

¹¹ Me haingö Lea, ka habe, A o but hnahic! me e ame hwenyi ien Gada.

¹² Ke Zilepa hlu anyi Lea ame hnokoâ nöku Jekob ke da a loiny.

¹³ Ke haingö Lea, ka habe, Oge senyin dut, anyin ame he ka hawo nya me senyin hnen ta je hlu: ke e ame hwenyi ien e Asera.

¹⁴ Ke ame he Reubena hnyi ûen meno hwit, kʼ ame wâ ta je dudai hnyi utkânâ, me e ame hom but e kö Lea a hinyen. Ke haingö Rakela kö Lea, ka habe, Ö u haök ge je dudai anyin nokom.

¹⁵ Me haingen kâu, ha habe, Hawa, ûnyi ae ûhnyûkong e, a u je hia but hûgûnâ öiök ke u me he minya ju ka hûgûnâ je dudai anyin nökuk? Ke haingö Rakela, ka habe, Anyin a wale e ame he ka tha e möu eâu hnyinghet hwaban je dudai anyin nokom.

¹⁶ Ke Jekob ame o but ûheny hnyi hna belök hnyi sahac, kʼ ame he Lea ka iouny me, me ha, ka habe, U ma he ka tha e mönya; anyin ae hnathu oge ûcû u hwaban je dudai anyin nökuk. Me e ame tha e me hnyi hnyinghet eling.

¹⁷ Ke Khong ame löng kö Lea, ke e ame erkin dut, me hnokoâ nöku Jekob baga a thabûnginy.

¹⁸ Me haingö Lea, ka habe, A hia but Khong ham könya hwabök, anyin a oge ham anyik hlu ka öiök: ke e ame hwenyi ien Isakara.

¹⁹ Ke ame erkin hmetu but Lea me hnokoâ ke da a siksiny kö Jekob.

²⁰ Ke haingö Lea, ka habe, Khong ame hia but ham könya tang omjeû ae so; ame he öiök ka laba so mönya walang ang, anyin oge hia but hnokoâ lakon je baga a siks: ke e ame hwenyi ien e Zebulona.

²¹ Ke hwaban dö e, e ame hnokoâ in, me hwenyi ien Dina.

²² Ke Khong ame ûnykûmi Rakela, me Khong ame löng kâu me ohnokoâ e.

²³ Me e ame erkin dut, kʼ ame hnokoâ da: me ha, ka habe, A hia but Khong hom hna haikongu nya:

²⁴ ke e ame hwenyi ien Josefa, me ha, ka habe, E so Iehova ame ham minya ke da a nökuk.

²⁵ Ke a hia but Rakela hnöku Josefa, haba Jekob ame ha kö Labana, ka habe, Hnö nya but, mʼ inye hmetu ka hnyi gak, me ik hnyei.

²⁶ Hna but könya je laöiök me je lakuk, wale hwaban hnök hna huliwa köu, me hnö nya but: anyin ae khanö u huliwa waleji oge ânyâ köu.

²⁷ Me haingö Labana kâu, ka habe, A ne hu ânyâm ibetengiö könya, me halubahingen ju, anyin a oge me wâhmakhmetoâ a Iehova ame ohnahici nya gam.

²⁸ Ke e ame ha, ka habe, Ha wia thö könya hwâbâm me oge me ke ka ham.

²⁹ Me haingen kâu, ka habe, E khanö u hnök hna huliwa köu, me trobán hnök hna tuö halem ta je meno.

³⁰ Anyin ae wakhalet thibi gam ehac ke tiga hiö nya, kʼ ame si gan dut walang ang; ke a hia but Iehova ohnahici u hnyi je deny hia waleji oge wia kâu: ke haba walang ang, oge me he ka penapena hobi kâu anyik lap kehö?

³¹ Me haingen, ka habe, Oge me he ka ham ieû köu? Ke haingö Jekob, ka habe, E ba ûnyi u me he ka ham könya: ke khaca thibi ûnyi u me he ka ânyâ hobi könya, me oge me he hmetu ka hat me tuö ânyâm je hnahat mamoe.

³² Haba hnyi bong ang, oge me he ka he hnyi wanben halem ta je hnahat meno hia thithö, he ka ve ip ta je meno hia ae ûdenöny me sisit, me ta je meno ae hlit ûnyi hnyi ta je mamoe, me ta je ûdenöny me ta je sisit ûnyi hnyi ta je got: ke wale thibi e hwabök.

³³ Ke ame he ka ohnathu nya nyiele hnen hwakecik ae wisa, u ka o but ka hnyi hwabök wale hnyi hnyimâkâm: haba ta je got hia ae ca ûdenyöny bi me sisit, me ta je mamoe ae ca hlit, adre wâ unyik, wale oge hia but venâu.

³⁴ Me haingö Labana, ka habe, E so e he ka e hnâm hna ha.

³⁵ Ke e ame ve ip hnyi bong eling ta je got baga adre sihnalimen me sisit, me ta je got momo hia ae ûdenöny me sisit, mo ka hu bawen, me ta je mamoe ae hlit, me hnʼ Ödrin ka je lakon baga;

³⁶ ke e ame ûsâkâûö me Jekob hnyi kun ta bong ka he: ke Jekob ame hat ta je hnahat hale Labana a hnen bi ju.

³⁷ Ke Jekob ame hom ta je ong utö ae hat, libene, me luza, me aremoni; me e ame bi hnalimen me me manen dok ae hau hnyi je ong utö.

³⁸ Ke e ame ip je ong utö adre bi hnalimen hnyin je kumete taben belen je meno hnyi hnyimakan ta je hnahat; ke ödrin e erkin ödrin ka o ka ic.

³⁹ Ke ame erkin dut ta je hnahat cicö ta je ong utö, me je hnahat adre me hnokoâ but ta je meno ae hu hnalimen, me ûdenöny, me sisit.

⁴⁰ Ke Jekob ame ve ip ta je lakon mamoe, me wia ta je hnyimakan je hnahat ka hnyi ta je hnalimen, me ta je hlit hia hnyi hnahat hale Labana; ke e ame ke ip haleny to je meno, kʼ ame ca tha hnen me ta je hnahat meno hale Labana.

⁴¹ Ke e ka he ka erkin ta je meno ae hwege, me Jekob ame ip ta je ong utö hnyi je kumete hnyi hnyimakan ta je hnahat, mʼ adre me he ka erkin hnyi ta je ong utö;

⁴² ke ame ne mat ta je meno, e ame ca ip hmetu: waleling me me hale Labana je meno ae mat, ke hale Jekob bi je meno ae hwege.

⁴³ Me ame ti tren gan hmâ thatûnyi hnen at e, ke ti se hia haleny ta je meno, me je lathnyabainy omomo me obaga, me je kamela me asina.