Genese 29 - Iaai Bible 1901 (New Caledonia)

¹ KE Jekob ame vheno deny me o ka aten hnyei e deiö.

² Ke e ame bwele me wâ bi ke hna khû an hnyi hnyei, ke wâ bi kun ta hnahat mamoe ame mokut eling; anyin adre me labö habelen ta je mamoe hnyi an eling; ke gan hmâ veto hlinginy an.

³ Ke adre me labö ûkhacaköuâ kâ e ta je mamoe hia: ke adre me tetebulo veto ûnyi hnyi hnyimen an, me söû belen ta je mamoe, me hlöng hmeto an hnen veto.

⁴ Me haingö Jekob ködrin, ka habe, Hnyat me lakeiny mönya lö, öbun e mwi ua? Haingödrin, ka habe, Öhmun je aten hnyei Karan.

⁵ Me e ame ha ködrin, ka habe, Hawa, e khanʼ öbun Labana nöku Nahora! Haingödrin, E khanʼ öhmun.

⁶ Me e ame ha ködrin, ka habe, Hawa, ame sot e? Haingödrin, ka habe, e ame sot: ke wâ bi Rakela nokon hlu ame he jem me ta je mamoe.

⁷ Me haingen, ka habe, Wâ bi, e tiga jebigö, ke tiga ca ûen he ka ûkhacaköuâ ta je meno: he thʼ öbun ka söû belen ta je mamoe, me he thö ka hān.

⁸ Ke ödrin e ha, ka habe, E ca khanʼ öhmun, e so bân ka ûkhacaköuâ ta je hnahat hia, mʼ adre me he ka tetebulo veto ûnyi hnyi hnyimen an, me waleling öhmun e he ka söû belen ta je mamoe.

⁹ Ke e ame tiga ûhnenamö mödrin, me ame o thö Rakela me ta je mamoe haleny kamen; anyin a e at ame tuö.

¹⁰ Ke hnyi ûen Jekob ame ō Rakela nöku Labana a mahinyen, me ta je mamoe hale Labana a mahinyen, me Jekob ame hakekeny me tetebulo veto ûnyi hnyi hnyimen an, me söû belen ta je mamoe hale Labana a mahinyen.

¹¹ Ke Jekob ame ûcimhnyimak me Rakela, me tenge hwege göranyai.

¹² Ke Jekob ame thumetu Rakela a e utha ge kamen, ke nöku Rebeka e: ke ame wadring hlu me thumetoâ kamen.

¹³ Ke e ka löng Labana ûthumetu ga Jekob a nokon haniny, me e ame wadring he ka iouny më, me e ame delûâ e, me ûcimhnyimak më, me su e ka hnyi hnyaban. Ke e ame aû gaga kö Labana ta je ûnyi hia.

¹⁴ Ke haingö Labana kâu, ka habe, E hnathu u hanen jeiök, me hanen utiöik. Ke khaca tehi ödru me tha laba hnyin.

¹⁵ Ke Labana ame ha kö Jekob, ka habe, Hawa, u ma huliwa gufa könya anyin a ötu liamenakaûnyin? Ha thö könya hwabâm.

¹⁶ Ke lo laku Labana li hlu: haba ien atö, me, Lea, ke Rakela ien wakeiat.

¹⁷ Ke vhihne li emakö Lea; ke khula ûdren makö Rakela, me so hmainy.

¹⁸ Ke Jekob ame weny Rakela, ke haingen, ka habe, Oge me he ka huliwa köu hnyi seven je huna hwabö Rakela nokom a wakeiat.

¹⁹ Ke haingö Labana, ka habe, E ti so könya he ka ham e köu hon hnök hna he ka ham ka ke at: tha laba ju mönya.

²⁰ Me Jekob ame huliwa seven ta je huna hwabö Rakela; ke helâke je bong ae wakhalet thibi kâu, can anyin betenge ka hlu.

²¹ Ke Jekob ame ha kö Labana, ka habe, Ham but könya öiök, anyin a um dö ta je bonguk, mʼ inye he ka tha laba më.

²² Ke Labana ame ûkhacaköuâ aten hnyei hia me bi jeû.

²³ Ke haba hnyi hnyinghet e ame hum Lea bi a nokon, me su e kâu; me ödru me tha laba.

²⁴ Ke Labana ame ham Zilepa a athnyabainy kö Lea a nokon me hnân anyin hlu.

²⁵ Ke wâ bi, hnyi hnyomakatu Lea bi eling: me e ame ha kö Labana, ka habe, Ieû e u je ânyâ könya? hawa, oge ca huliwa köu hwabö Rakela? ieû gam u je iyawö nya.

²⁶ Ke haingö Labana kâu, ka habe, Ca hwakecin ihmun hnyei he ka ham bânâ wakeiat, ke biliny bi atö.

²⁷ Oumo thö wikiny at ang, ke öhmun e he ka ham minya köu ke at, a hwaban huliwa u ma he ka ânyâ könya hnyi seven hmetu ta je huna.

²⁸ Me Jekob ame ânyâ helâe, me oumo anyin wik: me e ame ham Rakela a nokon me hnân âiân.

²⁹ Ke Labana ame ham Bila a athnyabainy kö Rakela a nokon, me hnân anyin hlu.

³⁰ Ke e ame tha laba me Rakela minya, ke e ame betenge ga Rakela hu Lea, me e ame huliwa kâu hnyi seven hmetu ta je huna.

³¹ Ke Iehova ame wâ a gʼ adre me höciö Lea, me e ame ohnoko e: ke toûnyi bi Rakela.

³² Ke Lea ame erkin dut me e ame hnokoâ da, me hwenyi ien Reubena: ke haingen, ka habe, Anyin a wâ but Iehova anyik vec; kʼ ame he öiök ka betenge gak walang ang.

³³ Ke e ame erkin hmetu, me e ame hnokoâ da, ke haingen, ka habe, Anyin a Iehova ame löng hna höciö nya, me e ame ham minya könya da eang: ke e ame hwenyi ien Simeona.

³⁴ Ke e ame erkin hmetu, me e ame hnokoâ da; me haingen, ka habe, Ame ne ûen dut ang ame he öiök ka tha hnyok mönya, anyin oge hia but hnokoâ kun lakon ta baga: anyin a wale adre hwenyi ien Levi.

³⁵ Ke e ame erkin hmetu, me e ame hnokoâ da: ke haingen, ka habe, Walang ang Oge me he ka ogânö Iehova: anyin a wale e ame kwenyi ien Juda; ke e ame mwi thö.