Genese 28 - Iaai Bible 1901 (New Caledonia)

¹ KE Isaaka ame hao Jekob, me hahnahicâ e, me hûna kâu, me ha kâu, ka habe, U ma ca he ka hok momo ûnyi hnyi je hluiny hnyei Kanana.

² Todrö, he thö Padanarama ai, ka hnyi hnyaba Bethuela, kamen hinyâm; me hok âiâm ju ûnyi e unyin je laku Labana a je hlu, a mahinyâm.

³ Ke e so ame he Khong Ataekhanahia he ka ohnahici u, me odedu u, me osi u, me me se hia em je hnyei;

⁴ me ham köu hna hahnahici Aberahama, köu, me ka ta je mâtrânâm; mʼ u ma he ka hu bi hnyei u me laba kanyua hnyin, waleji hnen Khong hna ham kö Aberahama.

⁵ Ke Isaaka ame kunö Jekob: me e ame he Padanarama ai kö Labana, nöku Bethuela, at Suria, hani Rebeka, hinyö Jekob me Esau.

⁶ Ke ame wâ Esau a ga um but Isaaka hahnahici Jekob, me kunâ e Padanarama ai, he ka hok âiân ûnyi e; ke ame hahnahicâ e, me hûna kâu, ka habe, U ma ca he ka hok momo ûnyi hnyi je hluiny hnyei Kanana;

⁷ kʼ ame wâ a gʼ ame löng hoton kamen me hinyen hnö Jekob, me he Padanarama ai:

⁸ ke a wâ Esau a gʼ ame hûkötiâ hnö Isaaka a kamen ta je hluiny hnyei Kanana;

⁹ me Esau ame he kö Isamaela, me hum Maalatha me hanen lâiân, wale hlu nöku Isamaela, a nöku Aberahama, hani Nebaioth, me me âiân.

¹⁰ Ke Jekob ame hna but Bere-seba, me he Karan ai.

¹¹ Ke e ame o but hnyi ke dok, me e ame mokut ju eling, anyin a didrut seûnö; ke e ame hom ke veto hnyi dok eling me hnân hunen, ke e ame mokut hnyi dok e.

¹² Ke e ame bwi, me wâ bi ke wacûat adre otilâ hon kânâ, kʼ ame kâlâ thö ethö drany ke hnyiban e: ke wâ bi ame ölö me utut hnyin ta je angela anyin Khong.

¹³ Ke wâ bi, ame tot Iehova ethö hon e, me ha, ka habe, Inya Iehova, Khongu Aberahama a kâmâm, me Khongu Isaaka: haba kânâ u me mokut hnyin, oge me he ka ham e köu, me je mâtrânâm;

¹⁴ ke ame he ta je mâtrânâm ka helâ me sesâiny kânâ, ke u ma he ka lau jio, me deiö, me hwadrö, me hwaiöu: kʼ ame he ka hnahic ta je hnyei hia eang hmeledrany ûnyi gam me ûnyi ge ta je mâtrânâm.

¹⁵ Ke wâ bi, tha inya möu, ke oge me he ka tuö u hnyi je hnyei hia u je he ka hnyin, me ohmetu u ka hnyi hnyei eang: anyin oge ma ca he ka hnö u ke ne o but oge hia but ânyâ hnök hna ha köu.

¹⁶ Ke Jekob ame hmak dö ûheny hnyi hna mokut, me e ame ha, ka habe, E hnathu Iehova hnyi dok ang; ke ca khanö nya but.

¹⁷ Ke e ame ot, me ha, ka habe, Hnân outen dok eang, haba dok ang me wale thibi e uma umen Khong, me homagöuleny drany.

¹⁸ Ke Jekob ame vesâkong me hom veto e ame hunâ, me otilâ e hnân haten, me hû hon ge wakaco.

¹⁹ Ke e ame hwenyi ien dok e, me, Bethela: ke Luza ien hnyei e a bân.

²⁰ Ke Jekob ame hipʼ khöbi, me ha, ka habe, Ame ne he Khong ka tha e mönya, me tuö nya hnyi gethen ang oge me vheno, me haök, me ha khauk,

²¹ mʼ oge me he ka o hmetu ka hnyi hnyaba cica hnyi hnahic, awe, Iehova but Khonguk,

²² ke haba veto eang, wale oge otilâ hnân haten, ame be ka hnen uma umen Khong: ke ûnyi hnyi ta je ûnyi hia u ma he ka ham könya, e hnathu oge me he ka ham hmetu köu je ke keihen a libenyitainy.