Genese 27 - Iaai Bible 1901 (New Caledonia)

¹ KE hingat ut Isaaka me hadedak li emakan, me me ca khana he ka wâ, me e ame hao Esau a nokon a atö, me ha kâu, ka habe, Nökuk lö: me haingen kâu, ka habe, Inya ang.

² Ke haingen, ka habe, Wâ bi, iny hingat ut, ke ca khanö nya bong oge me he ka mokcu hnyin.

³ Anyin a wale he thö walang ang ka hom ânyâm ta je ûnyi hnân hlingâ meno, a ânyâm thi fana me cafana, ke he thö ka hnyi hnyot ka uö ök meno;

⁴ ke ânyâ thö hobi könya utiö ae bo so helâ me wek, me hom but könya, me oge me he ka han; me me he hanuk ka hahnahici u inye tiga ca mok.

⁵ Ke Rebeka ame löng hna ha hnö Isaaka kö Esau a nokon. Ke Esau ame he but ka hnyi hnyot ka uö meno, me he ka hom.

⁶ Ke Rebeka ame ha kö Jekob a nokon, ka habe, Wâ bi, oge löng ut hna, ha hnen kâmâm kö Esau a tuhâm, ka habe,

⁷ Ho jem meno könya, ke ânyâ thö hobi könya utiö ae bo so, mʼ inye he ka han me hahnahici u hnyi hnyimakö Iehova, kʼ inye tiga ca mok.

⁸ Anyin a wale nokuk lö, löng ju hoton hok hofuc, helâ me hnök hna he ka hûna köu.

⁹ He thö ka hnyi hnahat meno, me hom but jem lo li lakon got ae so; ke oge me he ka ânyâ e hnân utiö ae bo so hobi kâu kâmâm helâ me hnen hna weny:

¹⁰ ke u ma he ka hom e ka kâmâm, me me he ka han, me me he but ka hahnahici u e me tiga ca mokcu.

¹¹ Ke Jekob ame ha kö Rebeka a hinyen, ka: habe, Wâ bi, at ae kû leûnen Esau, kʼ inya at khabalaû unyik.

¹² Ame ne he la cica! ka abö nya, me iny at ae thoi kâu; waleling mʼ oge me he ka oâ hnaûhangö könya, ke ba bi bnahicik.

¹³ Ke haingen hinyen kâu, ka habe, e so ame takû nya bi hna hangö u nökuk: ke löng ju hoton hok hofuc, ke he thö ka hom könya.

¹⁴ Ke e ame he but ka hom, me hom ka hinyen: ke hinyen ame ânyâ utiö ao bo so, helâ me weny kamen.

¹⁵ Ke Rebeka ame hom je ûkhaû ae so anyi Esau nokon a atö, eiö hnyin uma, me okhaûö Jekob nokon a wakeiat:

¹⁶ ke e ame lan li hnyamen, me hon nyin ae khabalaû hnen ke hnyiban unen li lakon got:

¹⁷ ke e ame ham utiö ae bo so, me areto e ame penapena ka hnyi li hnyamö Jekob a nokon.

¹⁸ Me e ame o ka kamen, me ha, ka habe, Cica lö: me haingen, ka habe, Iny ang nökuk, u ia?

¹⁹ Me haingö Jekob ka kamen, ka habe, Inya Esau nokom a atö; oge hia but ânyâ helâ me hnâm hna hûna könya: höhöi thö, me laba thö he ka han hanik, mʼ u ma he ka hahnahici nya.

²⁰ Ke haingö Isaaka ka nokon, ka habe, Nökuk a hawa u je ie wâ? Me haingen, ka habe, Anyin a hnö Iehova Khongom hna ohwegi nya.

²¹ Me haingö Isaaka kö Jekob, ka habe, Nökuk lö me hok ju jem mʼ inye he ka abö u, ame ne Esau u nökuk, ame ne ia.

²² Ke Jekob ame hakekeny dö kö Isaaka a kamen, ke e ame aba ju e, me ha, ka habe, Haba hwan me ho Jekob, ke haba li hnyam, a li hnyamö Esau bi.

²³ Ke ca manen e kâu, anyin ae kû leûnen li hnyamen, helâ me li hnyamö Esau a tuhan: me e ame hahnahicâ e.

²⁴ Ke e ame ha, ka habe, E hnathu u Esau a nökuk? Me haingen, ka habe, E.

²⁵ Ke haingen, ka habe, Hö jem könya, mʼ inye he ka han hanem nökuk, mʼ inye he ka hahnahici u. Me e ame hom kâu, me e ame han: ke e ame hom waina, me e ame ic.

²⁶ Ke Isaaka a kamen ame ha kâu, ka habe, Nökuk lö, hok ju jem könya, me ûcimhnyimak mönya.

²⁷ Me e ame hakekeny, me ûcimhnyimak më: me e ame hnulâ bunen ûkhaûen, me hahnahicâ e, me ha, ka habe, Wâ bi, haba bunen nökuk, Me helâ me bunen utkânâ hnö Iehova hna hahnahicâ:

²⁸ Ke ame he Khong ka ham köu hau ûnyi hnyi drany, Me pipikhenyainy hmeledrany, Me hwit me waina ae gan hmâ:

²⁹ E so ame he tavat ka hulwa köu, Me ta je hnyei he ka nom ju köu: U me he ka thaniny je liamekeiny möu, Ke ame he je lakon hinyâm ka nom ju köu: Ame he ka hangâ but at ame hangö u, Kʼ ame he ka hnahic ut at ame hahna hici u.

³⁰ Ke a hia but Isaaka hahnahici Jekob, ke Jekob ame hap didrut ûnyi Isaaka a kamen, me waleling ame ie o but Esau a tuhan ûheny hnyi hna uö meno.

³¹ Ke a hia but ânyâ utiö ae bo so minya, me hom e ka kamen; me e ame ha ka kamen, ka habe, Cica lö, höhöi thö, me han hanik, me u ma he ka hahnahici nya.

³² Ke haingö Isaaka a kamen, ka habe, U ia? Me e ame ha, ka habe, Inya Esau nokom a bân.

³³ Ke Isaaka ame öbubuny gan hmâ but, me ha, ka habe, Ie at wale a hia but uö meno me oâ könya, ke oge hia but han ke tiga hiö u, me oge hia but hahnahicâ e? eke, kʼ ame he balua but e ka hnahic.

³⁴ Ke a löng ut Esau hofuc hwan kamen, me e ame tenge gan hmâ hmönyin, me haingen ka kamen, ka habe, Cica lö, hahnahici nya minya thö walö nya eang.

³⁵ Ke haingen, ka habe, A mwi ang kem ka iyawö, me a hia but hom ânyâm hnahic.

³⁶ Ke haingen, ka habe, Hawa, e ca ûcû hnödra hna hwenyi ien me Jekob? anyin a olo but obö nya: e ame bân ka hûgûnâ anyik atö; ke wâ bi, walang ang a hia but hûgûnâ hnahicik. Me e ame ha, ka habe, Hawa, e ba ke hnahic u je ip hobi könya minya?

³⁷ Ke Isaaka ame thu me ha kö Esau, ka habe, Wâ bi, oge hia but otilâ me hnân tuhâm, me oge hia but ham kâu je liamekeiny hia më me lanyin; ke oge hat e ge hwit me waina: ke ie ûnyi oge ma ânyâ köu nökuk?

³⁸ Ke haingö Esau ka kamen, ka habe, Cica lö, hawa khaca thibi hnahic unyâm? Hahnahici nya minya thö, walö nya ang. Ke Esau ame tenge hwege göranyai.

³⁹ Me Isaaka a kamen ame thu kâu, me ha, ka habe, Wâ bi, ame he ka e hnyabam hnyi kânâ ae pipikhenya, Me hau ûnyi hnyi drany ethö;

⁴⁰ Ke u me he ka möt hnen ânyâm hele vat, ke u ma he ka bi athnyabainy kem; Ke haba hnyi ûen u ka he ka hon, Me u ma he ka hota degecâ ûnyi hon nyem hnen hna ohmâ.

⁴¹ Ke Esau ame hûkötö ga Jekob, can hnahic a ham kâu kamen: ke haingö Esau eû hnyi hnyekon, ka habe, E hakekeny jut ûen ka hnyamoki Cica, me oge me he ka hlingö Jekob a keik.

⁴² Ke adre me thumetu Rebeka ge hofuc ho Esau nokon a bân; me e ame ûkhûnöng ka hao Jekob nokon a wakeiat, me haingen kâu, ka habe, Wâ bi, Esau a tuhâm ame ip hnâm he ka hlingö u.

⁴³ Anyin a wale nökuk lö, löng ju hoton hok hofuc, me todrö, kec dö Karan ai kö Labana a hanik;

⁴⁴ me tha laba më hnyi ke je bong, ke ne o but ame aû but hmönyin anyin tuham;

⁴⁵ ke ne o but ame hwiö but hna hmönyini u hnen tuhâm, me ame hnying ut hnâm hna ânyâ kâu: ke hamök he ka ûkhûnöng ka hao u ûheny e: hnân eû ka tha hiʼ öbu gak hnyi bong a khaca?

⁴⁶ Ke haingö Rebeka kö Isaaka, ka habe, E hmak ut hnyekuk can li momo Heth: a ne he Jekob ka hok âiân ûnyi hnyi je lakon Heth a je hlu, helâ mödru li momoiny hnyei, hnân eû hmetu möt könya?