Genese 24 - Iaai Bible 1901 (New Caledonia)

¹ KE hingat ut Aberahama, me se hia je hunainy: ke Iehova ame hia but ohnahici Aberahama hnyi ta je ûnyi hia.

² Ke Aberahama ame ha ka athnyabainy, a hingatiny hnyaba, at ame musö anyin ta je ûnyi hia, ka habe, Inâ ju hnyamâm hmelen jevak:

³ me oge me he ka ha köu he ka khemanyin könya hnyi hnyimakö Iehova, Khongon drany, me Khongon hmeledrany, a u me ca he ka hok âiân nökuk unyin je hlu lakon at Kanana, wale oge me laba unyidra:

⁴ ke u ma he ka hnyi ik hnyei, me anyik lap, me hok âiân nökuk jia Isaaka.

⁵ Ke haingen athnyaba kâu, ka habe, Ke so bi ame ne ca hmehmela hlu ka he hotuk ka hnyi hnyei eang: hawa, hamök he ka su nokom ka hnyi hnyei u je he but ûnyi hnyin?

⁶ Ke Aberahama ame ha kâu, ka habe, Wâ eâu, u nye he thö ka su hmetu nökuk kâ e.

⁷ Haba Iehova, Khongon drany, waleji at a hum nya ûhek hnyi hnyaba cica, me ûnyi hnyi hnyei adre hnöku nya hnyin, at ame ha könya me khemanyin könya, ka habe, Oge me he ka ham hnyei eang ka ta je mâtrânâm; haba at eling ame he ka kunâ anyin angela hnyi hnyimâkâm, ke u me he ka hok ûnyi eling âiân nökuk.

⁸ Ke a ne ca hmehmela hlu ka he hotom, awe, me u gufa hnyi hnam hna khemanyin könya eang; ke so bi u ma ca he bi ju ka su nökuk kâ e.

⁹ Me haba athnyaba ame inâ hnyamen hmelen jeva Aberahama a tuhan, me khemanyin kâu hnyi ûnyi eling.

¹⁰ Ke haba athnyaba ame hom ke je kamela a libenyita hanen je kamela haleny tuhan, me he but; anyin a e ame musö ta je ûnyi hia anyin tuhan: ke e ame tot me he Mesopotamia ai, ka hnyi taun i Nahora.

¹¹ Ke e ame ocibouca je kamela hoton taun hnyi an, hnyi sahac, hnyi ûen ame he omomo ka se köiö.

¹² Me e ame ha, ka habe, Iehova Iö, Khongu Aberahama a tuhök, ö u kunâ so könya hnyi bong ang, me betenge ju kö Aberahama a tuhök.

¹³ Wâ bi oge me tot hnyi an; kʼ ame he jem ta je hlu lakon aten taun he ka se köiö:

¹⁴ ke so e helâng, a haba hlu oge me he ka ha kâu, ka habe, Ö u sâû thö ânyâm kaia mʼ inye ic; me e ame he ka ha, ka habe, Ic dö, ke oge me he minya ka habelen halem je kamela: e so e e bi at e u je ûca hobi kö Isaaka athnyabaem; ke waleling oge me he ka wâhmakhmeto a u je omanenâ ibetengiö ka tuhök.

¹⁵ Ke e ame tiga ha hofuc, me wâ bi a o thö Rebeka nöku Bethuela a nöku Mileka, öiö Nahora, liamekeiny me Aberahama, ke e hu kaia hon bajebenyin.

¹⁶ Ke ti so hmainy hlu at ka wâ, ke hlu hnathu ae tiga ca tha laba me baga; me e ame utut ka hnyi an me öunöngötâ anyin kaia me ölö hmetu.

¹⁷ Ke ame wadring athnyaba ka ûkhanö më, me ha, ka habe, Ö u habelik ge ke ong utköiö.

¹⁸ Ke haingen hlu, ka habe, Than lö, ic dö: me e ame ie hna but kaia ka hnyi hon hnyamen, me habelen.

¹⁹ Ke a hia but habelen, me e ame ha, ka habe, Oge me he minya ka se köiö hobi kâu halem ta je kamela ke ne o but ödrin e um dö ic.

²⁰ Ke e ame ie hingâlâ but anyin kaia ka hnyi kumete, me wadring hmetu ka hnyi an ka sâû, kʼ ame se köiö hobi kâu je kamela hia.

²¹ Ke haba at ame wâ hmâ hlu, me laba hnyibû, me me khana a ne hia but Iehova ohnahicâ hnen hna vheno, ame ne ba.

²² Ke a um dö ic je kamela, haba at ame hom otu gol haf sekel ihmakiny me li waen gol hobi kâu li hnyamen a libenyita ta sekel ihmakiny;

²³ me haingen, ka habe, U nöku ia? bethe thumetu nya. Hawa e hu hna mokut hobi köhmun hnyi hnyaban kâmâm?

²⁴ Me haingen, ka habe, Inya nöku Bethuela, a nöku Mileka, waleji e ame hnoköâ nöku Nahora.

²⁵ Me haingen minya kâu, ka habe, E hu thatûnyin hwit me an meno unyihmun, me hna mokut minya.

²⁶ Ke haba at e ame nom ju me ogânö Iehova.

²⁷ Ke haingen, ka habe, E so adre me haisoi Iehova, Khongu Aberahama a tuhök, at ame ca hota degecâ anyin ibetengiö me hnathu ka tuhök: ke haba inya, me a hia but Iehova su nya hnyi getheniny hnyaban liamekeiny me tuhök.

²⁸ Ke haba hlu ame wadring me thumeto lap anyin hinyen ge ta je ûnyi e.

²⁹ Ke e hu hani Rebeka, Labana ien: me Labana ame wadring ka at ka hnyi an.

³⁰ Ke e ame wâ otu, me li waen hnyi hnyamen haniny, kʼ ame löng ut ho Rebeka a haniny, ka habe, Ame ha helâe könya at; me e ame o ka at; ke wâ bi e ame tot unyin je kamela hnyi an.

³¹ Me e ame ha, ka habe, Hna ohnahicâ hnö Iehova lö, didrö; ieû gam u me tot eû? anyin oge hia but ânyâwia uma, me hna mokut hobi kâu je kamela.

³² Me haba at, e ame didrö ka hnyin uma, ke e ame thang je töïny je kamela; ke e ame ham thatûnyin öwit me an je kamela, me utköiö hnân ösûâ li can me je li cadrin hanen anyin bunyen.

³³ Ke adre me ip jeû hnyi hnyimakan: ke haingen kâu, ka habe, Oge me ca he ka me han, ke oge me he ka me ha can hna kunö nya jem. Me haingen, ka habe, Ha thö.

³⁴ Ke e ame ha, ka habe, Inya athnyabai Aberahama.

³⁵ Ke a hia but Iehova ohnahicâ gânâ tuhök; ke gan hmâ e: ke e ame hia but ham kâu ta je hnahat mamoe, me kâu, me sileva, me gol, me je lathnyabainy obaga me omomo, me je kamela, me je asina.

³⁶ Ke haba Sara âiân tuhök e ame hnokoâ nokon tuhök a baga, ke somaca but: ke a hia but ham kâu anyin ta je ûnyi hia.

³⁷ Ke tuhök ame kunö nya ka khemanyin, ka habe, U me ca he ka hok âiân nökuk ûnyi hnyi je hlu lakon at Kanana, hnyei oge me laba hnyin:

³⁸ ke u ma he ka hnyi hnyaba cica, me anyik lap, me hok âiân nökuk.

³⁹ Ke oge me ha ka tuhök, ka habe, Ame ne ca hmehmela hlu ka he hotuk.

⁴⁰ Me haingen könya, ka habe, Ame he Iehova, wale oge me he hnyi hnyimakan, ka kunâ anyin angela ka tha e möu, me ohnahicâ ûhem; ke u ma he ka hok âiân nokuk ûnyi hnyi anyik lap, me hnyaba cica:

⁴¹ waleling mʼ u me he ka gufa hnyi hnâm hna khemanyin könya, u ka o ka anyik lap; ke ödrin e ne ca ham köu hlu, me u me he ka gufa hnyi hnâm hna khemanyin könya.

⁴² Ke oge me o but eja ka hnyi an, me oge me ha, ka habe, Iehova lö, Khongu Aberahama a tuhök, u je ne he ka ohnahicâ hnök hna vheno:

⁴³ wâ bi, oge me he ka tot hnyi an; ke so ame he ka e bi, a haba hlu ame he jem ka se köiö, at oge me he ka ha kâu, ka habe, Ö u habelik ge ke ong utköiö;

⁴⁴ kʼ ame he ka ha könya, ka habe, Ic dö, ke oge me he minya ka se köiö hobi kâu halem je kamela: e so e hlu ame ûca Iehova hobi kâu nokon tuhök.

⁴⁵ Ke iny tiga ca um do ha hofuc e eû hnyi hnyekuk, wâ bi, Rebeka ame o me kaia hon bajebenyin; ke e ame utut ka hnyi an ka sâû: ke oge me ha kâu, ka habe, Ö u habelik.

⁴⁶ Me e ame logötö hna but kaia ûnyi hon bajebenyin, me ha, ka habe, Ic dö, ke oge ma he minya ka habelen halem je kamela: me oge me ic, ke e ame habelen minya je kamela.

⁴⁷ Ke oge me hnö e, ka habe, Nöku ia u? Ke haingen, ka habe, Nöku Bethuela, a nöku Nahora, wale Mileka ame hnokoâ me nokon: me oge me ip otu hnyi hnyimakan, me li waen hnyi li hnyamen.

⁴⁸ Me oge me nom ju, me khudrung kö Iehova, me oganö Iehova, Khongu Aberahama a tuhök, waleji at ame hum nya hnyi gethen ae wisa he ka hom hlu nokon liamekeiny me tuhök hobi kâu nokon.

⁴⁹ Ke walang ang, öbun e ne he ka betenge me hnathu ka tuhök, thumetu nya thö: ke a ne ba, thumetu nya thö; me oge me he bi nya ka saû ka hnyi ke keihen metâ, ame ne ke keihen me.

⁵⁰ Me ame thu Labana me Bethuela, ka habe, Unyi ga Iehova ûnyi eang: e ca khanʼ öhmu he ka ha köu kong me so.

⁵¹ Wâ bi, wale Rebeka hnyi hnyimâkâm, hom dö, me tha he thö më, me e ame he ka âiân nokon tuhâm, helâ me hna ha hnö Iehova.

⁵² Ke a löng ut hodru hnen athnyabai Aberahama, me e ame nom ju hnyikânâi kö Iehova.

⁵³ Ke haba athnyaba ame hom ta je omjeû a sileva, me je omjeû a gol, me je ûkhaû, me ham kö Rebeka: e ame ham minya ta je ûnyi ae ûnyi hnathu hmönyin ka haniny, me hinyen.

⁵⁴ Me ödrin e han me ic, e me tavat unyin, me mokut eling; ke ödrin e hmak dö hnyi hnyomakatu, me e ame ha, ka habe, Hnö nya but ka tuhök.

⁵⁵ Ke haingen haniny me hinyen, ka habe, E so e me tha laba thibi möhmun hlu hnyi ke je bong, ame ne libenyita; hwaban e, e ame he ka he.

⁵⁶ Ke haingen ködru, ka habe, Ca ovheli nya, anyin a hia but Iehova ohnahicâ anyik he; hnö nya but mʼ inye he hmetu ka tuhök.

⁵⁷ Ke haingödru, ka habe, Öhmu me he ka hawâ hlu me hnö weny.

⁵⁸ Me ödru me hawo Rebeka, me ha kâu, ka habe, Hawa, u me he ka tha he me at ang? Me haingen, ka habe, Oge ma hnyi he.

⁵⁹ Me ödrin e hnö Rebeka but a hanidrin, me momo at a hat e, me athnyabai Aberahama, me tavat unyin.

⁶⁰ Me ödrin e ha hnahici Rebeka, me ha kâu, ka habe, Hanihmun lö, e so u ma he ka hinyen ta je thauzan me je libenyita ta je thauzan, ke so ame he je mâtrânâm ka laba hnyi ta je homagöuleny tavat adre me hûköti ödra.

⁶¹ Ke ame todrö Rebeka, me je hluiny a je hlu, ke ödrin e tabâ je kamela, me he hoton at: kʼ ame hum Rebeka hnen athnyaba me he but.

⁶² Ke haba Isaaka ame he hnyi gethen ûheny Bere-lahai-roi; anyin a e ame laba hnyi hnyei ka hnyi Whaiöu.

⁶³ Ke Isaaka ame he but hnyi sahac ka hnyi utkânâ hnân he ka ûnykûme: ke e ame bwele me wâ, ke wâ bi ame he jem je kamela.

⁶⁴ Ke Rebeka ame bwele me o Isaaka, me e ame utut ûnyi hon kamela.

⁶⁵ Anyin a e ame ha ka athnyaba, ka habe, Ia at e ame he hnyi utkânâ he ka ûkhanö mötin? Kʼ ame thu hnen athnyaba, ka habe, Tuhök ʼling: me e ame hom mano hnân tubi, me tube e bi.

⁶⁶ Ke athnyaba ame aû gaga kö Isaaka ta je ûnyi hia e ame ânyâ.

⁶⁷ Ke Isaaka ame su e ka hnyi uma mano umo Sara a hinyen, me hum Rebeka, me me âiân; ke e ame betenge gan: ke Isaaka ame hnyibû ju hwaban imekiny hinyen.