Genese 23 - Iaai Bible 1901 (New Caledonia)

¹ KE khaca haded ke twente seven ta je hunai Sara: wale ta je hunainy anyin möt.

² Ke a mokcu Sara hnyi Kiriath-areba (wale Heberona) hnyi hnyei Kanana: ke ame o but Aberahama he ka hnyamok me tenge ga Sara.

³ Kʼ ame todrö Aberahama unyin kokiny komok, me ha ka je laku Heth, ka habe,

⁴ Iny atkanyua me at ame më laba unyibun: e so öbun e ham könya ke utkânâ hnân khön komok hnyin unyibun mʼ inye konâm kokik mʼ iny ca wâ but.

⁵ Haba je laku Heth adre me thu kö Aberahama me ba kâu, ka habe,

⁶ Than lö, löng ju köhmun: u than ae gan hmâ hmönyin unyihmun: konâm ju kokâm hnyi anyihmun erkemok u je ûca; ke ba at gahmun ame he ka behanö u ge anyin erkemok, mʼ u me he ka konâm kokâm.

⁷ Me ame todrö Aberahama, me nom ju ka aten hnyei, wale je laku Heth.

⁸ Ke e ame ûhnenamö mödra, ka habe, A ne webun a oge me he ka konâm kokik mʼ iny ca wâ bi, löng ju könya me tengiö nya kö Eferona nöku Zohara,

⁹ me me ham könya op e Makepela, a obiny, hnyi haten iny hnyei; e so e ame he ka ham e könya hnân hwaban ae bekhöt hnyi wanböbun me me anyik dok hnân khön komok hnyin.

¹⁰ Ke haba Eferona ame hnyi laba unyin lakon Heth: me Eferona at Heth ame thu kö Aberahama, ke ame löng lakon Heth, walʼ ödra hia adre me didrö ka hnyi homagöuleny taun, haingen, ka habe,

¹¹ E ba than lö, ling nya ju: haba utkânâ inya oge me ham but köu, me op eû hnyin oge me ham köu; oge me hna but köu hnyi hnyimakan lakon aten ik hnyei: konâm ju kokâm.

¹² Ke Aberahama ame nom ju hnyi hnyimakan aten hnyei.

¹³ Me e ame ha kö Eferona kʼ ame löng aten hnyei, haingen, ka habe, U je ne wem, u na löng ju könya: oge me he bi nya ka ham hwaban utkânâ; hom dö ûnyi gak, mʼ oge me he ka konâm eling kokik.

¹⁴ Ke Eferona ame thu kö Aberahama me ha kâu, ka habe,

¹⁵ Ling nya ju, than lö, haba ong utkana ae ûcû hwaban me vak ta haded je sekeliny sileva, ke hnân eû e kötu? anyin a wale, konâm ju kokâm.

¹⁶ Ke Aberahama ame löng kö Eferona; me Aberahama ame tuluto kö Eferona ta je sileva, waleji e ame ha hnyi hnyimakan je lakon Heth, a vak ta haded je sekeliny sileva, mone adre labö ûco ka at ûcû.

¹⁷ Me haba utkânâ i Eferona, e Makepela, cicö Mamere, wale utkânâ me op eû hnyin, me ta je ûö hia hnyi utkânâ hnyi ta je hounyin igigilö, adre me ohmâ

¹⁸ kö Aberahama me gan hnyi hnyimakan je lakon Heth a tavat hia adre me didrö ka hnyi homagöuleny anyin taun.

¹⁹ Ke hwaban dö e Aberahama ame könim Sara âiân hnyi op hnyi utkânâ e Makepela cicö Mamere (wale Heberona), hnyi hnyei Kanana.

²⁰ Ke haba utkânâ me op eû hnyin, adre ohmâ kö Aberahama hnen je lakon Hethme anyin dok hnân khönkomok hnyin.